見工嘅時候，通常都會問你期待薪金，每個人緊係想寫越多越好啦，但又怕寫得太離地會嚇怕HR唔請你，但係寫得少自己又唔想，有邊個唔想自己人工可以節節上升。 事實上，公司每次請一個人，其實都暗裡有個budget，會唔會因為你寫少左就一定請你呢？答案係唔會。 其實HR請人最緊要係合眼緣、同埋你有無能力勝任哩份工，如果你係心水人物，傾到最後HR就會自自然然同你傾期待薪金。但如果覺得你唔適合，你就算低於市價都無用，因為分分鐘請錯人，HR都要孭鑊架。 當你去到同HR傾薪金哩一步，恭喜你！代表你都合HR心水，哩個時候，其實就係一個開底牌嘅時候，HR想知要幾錢先請到你，而你又想知HR有幾多budget，又真係好想嗌到高啲喎，（心諗多一千就係一千），咁可以試下咁做法： 唔好講實一個數，俾一個約數HR，例如大約$xxK -$xxK（當然你要做好 research 好清楚自己市價），再補一句「我相信你會根據我嘅經驗去俾一個合理薪金我嘅。」咁就等HR開俾你啦，如果好想請你而又係公司budget內，咁通常都會鬆手少少；假若真係over budget，HR就會再同你傾價錢。 如果你堅持提高自己個價，HR一來要計budget，就會從新考慮有無其他人可以代替你。所以如果你好想入哩間公司，所謂有前景即係有錢景，就唔好計較爭少少錢，入到去做左表現出黎先，先把自己做好，就係將來提高自己的籌碼。 祝大家人工都可以節節上升！

而家咩都話work-life balance，HR都好鍾意用哩條問題去考人， 萬一見工時遇著HR咁問，你會點去答呢？ 如實答，我係一個好work-life balance嘅人，咁HR會諗，咁即係唔洗旨意你OT啦，咁唔上進點請你呀，我自己都要OT呀！ 但老實說，有邊個唔想work-life balance? HR自己都想啦！但有時工作迫埋身，真係唔加班都做唔掂。 但如果你話自己好鍾意做野唔介意加班，就算係真嘅，但HR都唔會信你啦。 如果遇上咁嘅問題應該點答呢？ 你要知道事業嘅道路上很漫長，一起步當然係努力衝啦，臨近退休就緊係會放慢腳步。 所以你可以答：雖然自己都好同意要work-life balance，但哩幾年係自己嘅黃金時期，都想努力打拼，所以會以做好工作為先，再從中取得生活平衡。 咁答HR就會覺得請你返黎係肯做野嘅，其實大部分HR心態唔係要請個好叻嘅員工，係要請個肯做又穩定嘅員工，佢哋先可以同老闆交代。

搵工面試中，「離職原因」唔係最難答嘅問題，最難答應該係被問「你有甚麼缺點 /弱點？」基本上無人係完美，話自己無缺點都無人信啦，咁答更會令HR覺得你拒絕了回答問題；但照事實講出黎又怕HR唔請喎，咁究竟點答先可以令HR聽得舒服，缺點變成優點呢？ 首先不妨認真諗諗自己的優缺點，優缺點有時只是一線之差。大家可以參考以下例子，做足準備應戰： 例子一： 我知道自己有時會大意，所以我習慣凡事都會double check。 註：HR聽到哩個答案就會覺得你做野都幾小心，做事有Double check的習慣。 例子二： 我英文寫同讀都無大問題，但同人講時就覺得唔夠流利。 註：哩個例子只應用於甚少使用英語的工作，咁HR就會覺得你的缺點唔會影響工作。 例子三： 我個人做野好急，所以有時會俾到身邊嘅人壓力。 註：咁如果你應徵嘅係管理層，咁就岩晒喇，你嘅缺點同時亦係你嘅優點，請咗你公司可能更有效率。 所謂知己知彼，百戰百勝。如果求職者在招聘面試中能夠知道自己的缺點並作出改善，HR印象會加分；相反，答非所問、過度自卑或自我膨脹的求職者，相對較難獲聘。

新一年，亦係轉工高峰期，要準備一份好嘅 CV，係成功嘅一半。不過唔好諗住下下照抄網上 CV sample，人地岩嘅又未必岩你，各行各業寫法都各有不同。小編得到獵頭公司朋友分享，準備喺度分享俾大家小小貼士，務求大家都可以未見其人，先贏一仗。 履歷小貼士 1. 簡而清 CV 切忌太長，一頁起兩頁止已足夠，太長太多字 HR都唔會想睇。 2. 關鍵字 跟據獵頭公司高層指出，因為工作繁多，所以佢哋平均睇每份CV嘅時間只係15秒！無錯，因為他們不會細仔睇你份CV，只會「立下眼」，睇吸引到佢哋眼球嘅關鍵字！唔同職位所需要關鍵字亦有不同，例如： 做銷售嘅，關鍵字就係數字，要寫啲實質數字俾HR知道你過往搵幾多生意，每月有幾多新客等等。如果你曾經幫客做過大型project更加要寫。 做文職嘅，要寫下你平時工作範疇，每個月要處理幾多個report，咩report係你負責，要寫多D，對公司有過咩貢獻。 做marketing嘅，要寫下曾經做過嘅大型project，平時要做啲咩數據分析等。 3. 適當留白 適當留白，例如注意段數行距等，都好影響HR睇你張CV睇得舒唔舒服架！ 4. CV風格 市面上有好多唔同既CV 模板，不過都要睇你係邊行用返唔同嘅式樣，例如做創作行業可以加多少少色彩創意，做銀行會計嘅就要用返啲正規嘅式樣喇。 希望以上小小貼士都幫到大家啦！ 祝各位搵工順利！