美容業持續不衰，無論經濟好與壞，女士對美容都會有一定需求，故令行業長期需要招聘人手，不斷要有新血加入。如果有興趣入行，可報讀由仁愛堂舉辦的「初級美容師基礎證書」課程，免學費又可學一技之長，畢業後可由初級美容師做起。 由仁愛堂舉辦的「初級美容師基礎證書」課程，是一個僱員再培訓局就業掛勾課程，負責任教的美容導師Terry Siu表示：「課程適合未學過有關美容行業技能嘅人士報讀，或者曾經入過行，但依家生疏咗，想提升番自己重投美容業，都好啱嚟讀呢個課程。」 課程共180個小時，理論與實習並重，Terry說：「除咗基本護理，好似皮膚種類及分析、面部護理等外，仲會教授肩、頸及膊頭按摩技巧、眼部護理等。學員亦會學到儀器嘅運用，好似電眼睫毛及生暗瘡點樣去消炎等。」 教埋化妝美甲 為了令學員對美容行業有多方面的認識，故課程內容涵蓋多方面的知識，Terry說：「我哋都會教化妝及美甲，比重係分別佔課程內容嘅十分一，學員會學到基本化妝技巧、手部護理及塗指甲油等。如果學員對呢兩方面有興趣，喺完成課程後，可以繼續報讀『化妝助理基礎證書』及『美甲師基礎證書』課程。」 課程特別之處，會有個人素養部分，Terry表示：「可能有部分學員好耐冇做嘢，唔知點樣與同事溝通合作，或者大家嘅生活文化背景有唔同，同事之間容易起衝突。所以中心會安排社工教學員點樣管理自己及情緒，包括叫學員進行角色扮演，學習點與同事相處，及用九型人格分析學員嘅性格，令學員更熟悉自己。」 教授求職技巧 學懂美容知識及技巧後，Terry指學員還要學求職技巧及職安健等知識，「我哋會教寫求職信及進行模擬面試，甚至安排僱主嚟做模擬面試，我哋會要求學員化妝及着合適嘅衣着，體驗真實見工嘅情況。」 當學員通過筆試及技能試成功畢業後，中心會有3個月就業跟進，Terry說：「學員可以自己搵工，我哋亦會有就業轉介。其實有唔少僱主都會嚟中心進行招聘活動，畢業嘅學員都會由初級美容師做起。」 學員互相練習做面部護理。 初級美容師基礎證書課程會教授不同的美容知識及技巧，課程理論與實習並重，幫助學員可以找到工作。   仁愛堂培訓及就業服務 課程名稱：初級美容師基礎證書 訓練時數：17天全日＋11天半日 入學要求：待業人士；中三學歷程度；須通過面試 上課地點：屯門澤豐 學費：全免 查詢及報名：31040820 網址：www.jctc.yot.org.hk