良心炸魚薯條店回饋社會 抗疫堅持到底

2020-09-09T12:47:46+08:009 月 9th, 2020|創業故事|

香港人創業愛選擇開餐廳,從英國讀書回來的Vicky也不例外,她先在社福界工作,她認為經營社會企業應以可持續發展為宗旨,之後她先後開設2間炸魚薯條店,以回饋社會為目標。店內聘用智障、自閉症人士或少數族裔人士工作;同時採用環保餐具及包裝,超過80%餐具包裝都可作生物分解。雖近來受新冠肺炎影響,生意跌了4成,但Vicky仍樂觀面對,望能堅守到最後。   新冠肺炎疫情持續,香港各行各業均大受影響,當中飲食業可謂首當其衝。Vicky開設的CHIP IN,現有西貢及灣仔兩間分店,主做外賣炸魚薯條生意,她表示受疫情影響,生意額下跌4成,「條街少咗人行,好在我哋主力做外賣生意,附近街坊都會嚟幫襯,總算捱到大半年。」 面對疫情的打擊,Vicky認為經營食肆很難有應對的方法,「我哋冇要員工放無薪假、減少工作時間等,因為佢哋都要開飯。雖然有申請政府資助補貼,但幫到嘅好有限,呢段時間做老闆惟有堅持,我有同業主商量可唔可以減租,及同銀行傾借貸。」 要可持續持發展 Vicky在英國修讀心理學,06年回港後到社福界工作,她主要擔任社會企業管理的角色。「我發現香港做NGO及社福機構好依靠funding,如果申請唔到,咪冇得繼續落去?社會企業應該要可持續發展先至啱,我覺得自己可以經營一門咁樣嘅生意。」剛巧當時Vicky有創業的念頭,她發現香港少有專門食炸魚薯條的食肆,「呢樣嘢係英國好流行,我覺得可以開鋪頭做留港外國人嘅生意。」 Vicky認為做外賣炸魚薯條較有成本效益,「租金相對較低 ,做外賣店的尺數不用太大,200呎就夠。需要人手又相對較少,一間店鋪一般只需2位員工已可以運作。餐單會簡單啲,食材亦相對簡單,食材流動性高,坐貨時間短,資金流動得快。」 西貢開業試反應 當時Vicky做過調查,發現香港最多外國人居住的地區是中西區,有23%,其次為西貢的9%。「喺12年,我決定喺西貢開業試反應,因為中西區範圍太大,西貢外國人口會集中啲,租金亦相對平啲。我揀咗西貢碼頭附近嘅敬民街約200呎鋪位,租金連裝修等,開業花咗約30萬。」 開設CHIP IN,Vicky秉承着社會企業的宗旨,希望可以回饋社會,店內的6至7成的支出是用來付社會責任,並以可持續發展來經營。「我哋係推廣有質素嘅快餐,所有食物即叫即造,減少使用副食品,不含味精。加上製作炸魚薯條唔複雜,重複性高,我會聘請智障或自閉症人士嚟做服務台幫客人落單。而店內有超過80%餐具包裝都係可以作生物分解,支持環保。」 透過社企請人 Vicky表示透過NGO及勞工處展能就業科聘請智障或自閉症人士,「可能佢哋幫手落單會有啲慢,最初要喺側邊幫下佢,都會好快上手。環保餐具方面,其實成本同普通餐具差不多,只要你肯,實搵到貨源。」 西貢店反應不俗,1年內回本,便想到開分店,Vicky說:「15年,喺九龍城開分店,間鋪有800呎,月租$65,000,可以做埋堂食,諗住客源係區內嘅中產客,區內仲有唔少服務式住宅,都有唔少外籍人士。但做落發覺生意發展潛力唔大,冇想像中咁好,做咗半年就結業,好彩可以平手離場。」 灣仔再開分店 直至18年,Vicky再到灣仔皇后大道中開分店,店內請了少數族裔人士來當服務生。最初生意都不錯,每月有近18萬的生意額,但直至上年中社會運動開始至現在的新冠肺炎疫情第三波爆發,令店鋪生意下跌4成,經營日漸困難。 Vicky說:「其實依家政局混亂都唔睇好前景,覺得政府好忽略中小企嘅力量,支助唔多,好似灣仔店會請兩個全職員工,如果結業代表住有兩個家庭受到影響。業主好好都肯減租,由$55,000慢慢減到$40,000,但如果經營環境繼續差落去,真係做唔住,依家作為老闆,只好堅持到最後一刻。」 CHIP IN www.chipin.com.hk Vicky表示會善用所有食材,達至近0%廚餘。「好似用淨嘅魚可以造魚柳包,而洋蔥嘅蕊可以做他他醬。」 做外賣店不需太多人手,CHIP IN只需兩個人便可以運作。圖為Vicky與廚師研究餐單有否改進空間。 店內採用的都是環保餐具。 這隻偵探貓是CHIP IN的吉祥物,店內有大小的擺設。 灣仔店內牆上印上了CHIP [...]

唔做銀行要做演講教練 80後女生教說話技巧 目標創造一個行業

2020-08-20T15:43:34+08:008 月 20th, 2020|創業故事, 各行各業, 自我增值|

當你打銀行工,會被認為是有前途兼安穩的工作。曾是銀行經理的Yuki(黃銓玉),因熱愛說話演講,希望當一位演講教練。她毅然辭去工作,創立公司主攻司儀工作及教說話技巧班。憑着一股熱血,她將公司帶上軌道,雖然受新冠肺炎疫情打擊,但她透過zoom視像開班,令生意回穩,她誓要走過這個難關,向着自己的夢想進發。 新冠肺炎疫情持續大半年,Yuki自言公司生意也大受影響,「喺疫情影響下,今年2、3月開始已經冇公司搞event,冇司儀工作。」慶幸的是她也有舉辦說話技巧班,令公司生意維持得到,「自6月開始,生意回穩,依家係100%教班。」 Yuki所創立的司博禮,以司儀及教班為主,開業5年來,主持超過千場活動及舉辦超過2百個說話技巧班,以商業客戶為主,當中包括貿發局、銀行等。「我哋試過一星期接100項工作,星期一至六由朝到晚,全靠一班同事幫手。」 Yuki在科大修讀市場學,11年畢業後在銀行擔任經理一職,一次到海外培訓令她得到啟發,「發現外國教人講嘢可以係一門職業,我都想做一位演講導師。」Yuki鍾情演講及說話技巧,由小到大,她參加過大大小小有關演講的比賽,贏得四、五十個獎杯。但當朋友家人知道她的夢想後,都大潑冷水,家人說:「揀老師都唔揀你,你都唔夠老。」仲威脅要丟掉她的所有獎杯。 銀行工作成轉捩點 令Yuki真正走上成為演講導師的轉捩點是在工作上的領會,「當時做銀行經理自己只係廿零歲,有次開OT,同事同我講佢個女叫工人姐姐做媽咪,因為返工時間長少見個女,搞到咁。而喺2013年嘅生日時,我照返工,好記得嗰日氣溫得9度,我喺公司做緊嘢時打咗一個噴嚏,喺眼跌咗嚿膠出嚟,隻眼跟住開始矇,我同上司講要請假,但上司唔批,我照走去睇醫生,原來係分泌物走錯位,好在隻眼冇事。呢兩件事令我覺得咁辛苦工作唔知為乜,我想做自己想做嘅事,努力向演講教練方向發展。」 之後Yuki上過不少有關說話技巧的課程,看有關的事,不斷進修。到2015年,她開設司博禮,「我有上網搵過有冇演講教練嘅職業,原來香港冇人請,冇就自己開。理想總是美滿,最初以為開公司就有生意,但現實當然係相反,都捱咗一段時間。我第一單生意都係媽媽求人畀一個婚禮司儀我做;喺冇生意嘅情況下,惟有上網cold call成百間PR公司,結果只得一間回覆,最後畀我做咗一個海外婚禮嘅司儀。」 加入商會學做生意 Yuki並沒有放棄,在不斷努力下,找到學校讓她開演講技巧班,「雖然當時係初創公司,資歷同經驗係唔夠,但我讀書時贏過唔少比賽,加上我係國際演講會嘅area director,有啲學校信任我,畀我教班。」Yuki認為加入BNI商會,都學到怎樣做生意,「應該做B TO B,唔係做B TO C,即係要做批發,同公司機構簽約要簽1年,教班要簽2年。」 貿發局、星展銀行及香港大學等都有找司博禮合作,在這些機構的名氣幫助下,令客人對公司有信心,客源也漸漸增多。Yuki指做司儀的應變執生能力及注意細節都非常重要,「我試過主持一個政府嘅event,有位嚟參加嘅局長原來喺昨日升咗職,但份稿係前日寫,我冇為意。當我讀咗局長個舊職位出嚟時,先醒起局長升咗職,惟有即時補鑊,話局長原來啱啱升咗職。所以做司儀唔係照稿讀咁簡單,要注意好多細節。」 最主要教講故事 公司發展至2017年,有7成生意是司儀,其餘為演講教學,到2019已經變為五五之比。證明Yuki的初心沒有錯,市場對說話技巧有需求,她表示演講技巧不外乎講故事、應用在重要場合及有特殊需要。「講故事係幫助銷售產品嘅技巧,以sell保險產品為例,應該講一啲case,份保單係點樣幫到客戶,唔係齋講乜嘢可以賠乜嘢唔可以。例如個客買咗份保單,原來可以保障到佢6個月嘅生活開支,可以照顧到小朋友。」 「重要場合即公司鼓勵大會發言、見工面試或與投資者會面等。特殊情況可能係結婚時,新人需要講一段嘢。我哋試個有客人要面試香港小姐搵我哋教佢說話技巧;又試過教上市公司嘅法律顧問點樣同同事講嘢。」 學生年齡冇限制 司博禮所開設的說話技巧班,學生的年齡並沒有限制,教班由1對1 到 1對12-15不等。Yuki說:「我主要教大學以上,公司都有開中小學嘅班,主要由同事負責,會教小朋友講故事、朗誦、drama及聲音運用等。其實同說話技巧有關都會開,好似教拍Tik Tok嘅技巧,即教講故事嘅結構。」 教班亦有不少難忘事,Yuki說:「試過教60歲以上嘅長者班,最初都怕老人家反應慢,原來佢哋好有活力,反應好快,仲成日講笑,問我係咪中大畢業?原來係中央肥大學院咁解。落堂後,會同佢哋傾偈,分享好多人生閱歷,都學到好多嘢。」 zoom教班生意回穩 Yuki指擔任司儀工作及教班,在高峰期每月收入可達15萬,平時平均每月也可逹5、6萬,但年初疫情爆發,令生意一落千丈。幸好在2月頭,Yuki拍了一條片教人怎樣使用zoom,放在facebook有超過3萬個瀏覽人數,亦帶來不俗的反應。「二月歸零,變回創業初時,點都要交租。喺呢段時間會積極問客戶有乜嘢幫到手,當時都冇咁多人認識zoom,條片用有趣嘅角度介紹zoom嘅功能,好似點樣去分房。有個客畀我哋用zoom教班,之後慢慢多咗用zoom嚟開班。由6月開始生意穩定,雖然司儀方面冇生意,但教班方面嘅生意都有上升,依家有7成係透過zoom教班,有3成係實體班。」 現在家人由反對變支持,Yuki表示:「媽媽會煲湯畀我飲,屋企人仲會一齊幫我準備班課物資」。說到未來目標,Yuki的夢想十分宏大,「我好想改變呢個世界嘅溝通模式,小朋友教育好,可以改變到生活。好似我出身基層家庭,因為讀到書,可以做演講教練,我希望創造一個行業,提供到就業機會畀年經人。」 司博禮 http://www.spotknight.com Yuki自少已開始參加演講比賽,贏過四、五十個獎杯。圖為她參加南中國演講比賽得到亞軍。 [...]

諗橋抗疫 做KOL直銷產品

2020-06-23T15:59:23+08:006 月 23rd, 2020|創業故事, 各行各業|

新冠肺炎爆發至今,有不少打工仔的生計受到影響,被迫放無薪計,甚至被炒。Sonic亦受到疫情打擊,正所謂窮則變,變則通,Sonic見在疫情下,出街購物人次大幅減少,便想到用KOL身分在facebook做直播推銷產品,吸引愛購物的香港人網購,結果銷情不俗,反應出乎意料,不足一個月,followers的人數已過萬。Sonic預計這盤生意在半年內可回本。 現時KOL直播賣每逢星期一及四在facebook開show,直播售賣產品,產品售價約是坊間的6折。Sonic是主持人之一,每次他都會與一位靚女KOL一同主持節目。「現時每場都有約8百人睇直播購物,我哋與其他直銷節目唔同嘅地方,除咗開show會較密外,限時購物時間會係由開show嘅9pm至第二日嘅12nn,唔會限死客人只能喺直播時段內購買。」 今年3月尾舉行第一場KOL直播賣,反應非常好,有超過1500人觀看。Sonic說:「第一場show一定要搞下gimmick,全場400件貨品,每件只需要$1,仲要包郵,貨品包括口罩等防疫用品及王朝滴雞精等。反應非常好,好快賣晒。」KOL直播賣的facebook專頁不足一個月便有過萬的followers,為了慶祝,Sonic更首創全港網上$10店,當日更有5百幾張訂貨單,保持專頁及網店的人氣。 辭工轉接wifi工程 今年35歲的Sonic,本身當媒體廣告推銷員,「我做過好多間媒體,好似《東Touch》、《蘋果日報》,但到佔中時,生意跌,收入減少,都有諗過轉行。」到15年,他認識了一班從事IT的朋友,成了轉行的契機,「Wifinnity係由佢哋成立,當時全港有成2千幾個免費wifi點。我覺得大家可以合作,市民免費用wifi前要睇廣告,會係一個商機。所以我辭咗份工,開公司接單再同佢哋分賬。頭一年生意唔錯,前景唔差。」 好景不常,Sonic最後被拍檔飛起。「當時我簽成咗同UA財務合作,收咗2百幾萬,同佢哋set up一個wifi工程,放廣告入wifi平台。但負責IT班拍檔收咗錢後就走咗佬,張約係我簽,結果要我揹起條數,我要賣表賣車,及直接同電訊商溝通,搞番掂佢。由於要還債,過咗6、7個月真係頂唔住,好彩最後有幾個商家朋友夾咗2百幾萬畀我,成功過渡。」 疫情下網購 在Sonic經營下,Wifinnity發展至今全港已有4千7百幾個免費wifi點,並接到不同的wifi工程,如政府資訊科技總監辦公室等。但自19年中起的社會運動及今年初的新冠肺炎疫情爆發,令生意一落千仗。「我本身唔鍾意網購,但見喺疫情期間,香港嘅網購生意反而不俗,香港人鍾意買嘢,冇得出街就多咗上網購物。」 Sonic希望在疫情下能夠生存,有了點子後,便積極找貨源及合作機會。「我以前做sales,識落唔少商家,可以畀我低價拎貨去賣。香港興KOL,我做埋一份,每次開show都搵個女仔KOL嚟一齊做直播,好似ToTo、黃榕等。而我賣出貨品先入貨,唔怕賣唔出,砸死晒啲貨。」 廣告客戶特約節目 KOL直播賣的反應好,開始有KOL自薦出show,Sonic表示:「嚟緊都會搵啲明星藝人上節目,好似最近邀請咗E-kids嘅Alan上嚟。」KOL直播賣的限時購物時段為開show的9pm至第二日的12nn,網店可吸引32,000多人次瀏覽,故得到不少廣告客戶垂青,開始有廣告客戶的特約節目,增加收入。Sonic說:「到依家呢刻,都有8、9場show有特約,直播時會有廣告客戶的特約banner。」 Sonic預計半年可收支平衡,雖然市面多了競爭者,但他自言不怕競爭,「先做好自己,嚟緊可能會開popup store,或者喺街做直銷,亦會做multi media,例如拍片賣廣告等。」 facebook@KOL直播賣 網址:kolliveshow.com 最近Sonic(右)邀請了E-kids的Alan一起做節目。 圖為Sonic(左)與E-kids的Alan一起主持節目,會介紹所賣的產品。 Sonic自言不怕上鏡,「我細個有被星探搵去拍廣告,唔怕面對鏡頭,加上自己做過sales,講嘢介紹產品,唔會有問題。 在facebook專頁會有預告,Sonic將會與那一位KOL一起主持節目。 最近多了廣告客戶的特約節目,直播時會見到廣告客戶的特約banner。

推動餐飲自動化 慳人手提升服務質素

2020-05-21T17:04:19+08:005 月 21st, 2020|創業故事, 各行各業|

去食肆用膳的過程中,有用過平板電腦點餐嗎?有用過自助點餐機嗎?這些都是餐飲自動化的實際例子。推行餐飲自動化,可以優化工序及節省人手,令食肆更有效率去提升服務,客人會有更好的用餐體驗。Web-On的創辦人Ben (李浩賢) 早着先機,近年大力發展餐飲自動化系統,當中包括電子顯示屏、平板電腦點餐、自助等位派籌系統 (俗稱排隊機)、自助點餐機及付款機等。最近由於武漢肺炎疫情嚴重,Ben將新研發的帶位機械人改良為消毒機械人,可以為辦公室及食肆等噴消毒藥水,進行消毒程序。 現時Ben與不少連鎖餐飲集團合作,當中包括太興、牛陣、牛角、OUTBACK、Pizza Hut及大家樂等,為他們提供POS系統、電子顯示屏、自助點餐平板電腦、自助等位派籌系統 (排隊機)、自助點餐機及付款機等服務。當中排隊機是公司主要業務之一,收費由2萬多元起。 Ben說:「我哋提供嘅餐飲自動化系統比坊間嘅唔同,好似我們嘅排隊機除咗有一般嘅功能外,仲可以接駁到領展嘅手機應用程式,客人可以透過手機app,就可以喺領展旗下商場嘅食肆拎籌等位。」此外,Ben所研發的POS系統可以直接連接前台的電子顯示屏及廚房的顯示系統,「當廚房通知前台有某啲食物要暫停供應,只要喺POS系統更改,廚房、電子顯示屏及點餐機都會同時更改,唔需要逐個系統去更新資料,方便及有效率好多。」   最低工資見商機 Ben是Web-On的創辦人,顧名思義,之前Web-On是為不同公司提供製作網站的服務,「我哋有幫過Pizza Hut製作可以畀客人上網訂pizza嘅網站,令我哋了解到餐廳系統嘅運作。之後我哋有為板長壽司製作畀客人訂外賣壽司嘅網站,當時板長嘅老闆Ricky(鄭威濤)問我可唔可以幫分店加設排隊機,其後再加入用平板電腦點餐的系統。咁啱政府喺12年開始實施最低工資,人工提高令餐飲業嘅營運成本增加,加上餐飲業亦好難請人,我覺得餐飲自動化係一個商機,因為可以節省到人手及提高營運效率。所以慢慢將Web-On嘅重心,轉移去提供餐飲自動化嘅服務。」 提高服務質素 餐飲自動化的最終目的是提高服務質素,令客人享受到優質的用餐體驗。Ben說:「我哋會同餐廳老闆講採用餐飲自動化系統,可以慳到最少一個人手,有啲餐廳可以慳到4至5個。其實採用餐飲自動化系統都係想令服務質素提升,好似用tablet點餐,系統直接連接去廚房,加快咗個落單嘅流程。」 Web-On在上個年度有8位數字的營業額,但踏入2020年,武漢肺炎疫情嚴重,但Ben表示公司首個季度的業績未見影響,「我哋可能因餐廳結業少咗生意,但係網站製作方面,生意額反而有上升,好似幫食肆製作訂餐嘅網站,或其他公司嘅網站等。」 改良帶位機械人 Ben不停為公司注入新元素,如研發了一個新軟件,可透過電腦操作咖啡機,現已為微軟位於數碼港的辦公室安裝這部咖啡機。此外,3月時港鐵表示引入20部消毒機械人為車廂消毒,雖未有提供每部消毒機械人的購買價,但港鐵表示投入新科技總共用上2千多萬元。Ben表示:「我哋研發嘅帶位機械人,底部安裝咗激光雷達,可以scan餐廳嘅空間及枱凳嘅位置,機械記低晒呢啲資料後,就可以帶客人入座。最近我哋加以改良,安裝咗新配件,變成一部消毒機械人,可為食肆、辦公室等唔同嘅空間地方,噴消毒藥水進行消毒。每部售價只係3萬幾蚊。早排Viu TV嘅節目《今日疫情》,都有介紹過我哋嘅消毒機械人。」 Web-On www.web-on.com Ben不時去講talk,介紹餐飲自動化的好處。 Web-On本身只從事網站製作的業務,Ben看到餐飲自動化的商機,便大力發展。 自助等位派籌系統(俗稱排隊機)是Web-On的主要業務之一。 電子顯示屏與自助付款機可連接POS系統,更改資料會更加方便。 Ben改良帶位機械人,加上配件便可噴消毒藥水進行消毒。

老字號藥行與星級髮型屋合作 創香港品牌推出護髮湯包

2020-03-27T14:15:51+08:003 月 27th, 2020|創業故事|

近年潮牌都愛crossover,為品牌及產品帶來新鮮感。其實百年老店都一樣可以玩聯乘,就如過百年歷史的協德榮參茸藥行,最近與星級髮型屋Hair Corner,合作推出護髮寶湯包,有防脫髮及烏髮功效,照顧客人需要,切合近年流行健康飲食的大前提。 「協德榮係百年老字號,Hair Corner都有三十幾年歷史,喺髮型界嚟講都算係老字號,我覺得大家可以合作創造一個香港品牌出嚟,護髮寶嘅宗旨係想幫人保養好頭髮。」Hair Corner的老闆Jofee說。 護髮寶分養髮系列的核桃製何首烏湯及烏髮系列的黑豆枸杞湯,共兩款湯包,售價為$118兩包。核桃製何首烏湯的材料包括杜仲、紅棗、薑、核桃仁及何首烏;黑豆枸杞湯的材料則有黑芝麻、黑豆及枸杞。Jofee說:「養髮系列可以令毛囊更加鞏固,減少頭髮折斷;而烏髮系列可以改善白髮問題,減慢出白髮嘅速度。中國人煲湯好鍾意加豬肉,但肉會令啲湯好油膩,最後決定唔加肉,湯包會啱素食人士飲用。」 客人常問養髮問題 近年流行健康飲食,如無機食品、素食十分受歡迎,連黑色飲食也有不少人關心。 身為髮型屋老闆的Jofee說:「近年有好多客人都有甩頭髮及多白頭髮嘅問題,會成日問我點去保養,佢哋又問我食多啲黑色嘅食物係咪會有效,好似用何首烏、合桃、黑芝麻及黑豆等嚟煲湯,飲咗會有烏髮嘅作用。咁啱髮型師Sue都遇到同樣嘅問題,我哋傾開係咪可以推出一啲保健食品嚟養髮,幫到客人?」 Jofee醒起多年來幫襯的客人潘先生,是百年老字號協德榮參茸藥行的老闆,他應該懂得有關養髮的藥方。潘先生說:「我識咗Jofee好多年,傾開呢方面嘅問題,其實藥行有很多關於護髮嘅藥方,我會知道邊啲藥方會比較好,可用嚟推出湯水系列。」 製作過程跟足規格 有見及此,潘先生、Jofee及Sue決定合資7位數,今年3月開始籌備,至10月護髮寶正式推出,製作過程十分順利。潘先生說:「我哋設有廠房,之前有試過幫客人製作湯包,有相關嘅經驗。成個製作過程跟足政府規格,要經過高溫消毒,不含防腐劑及人造色素,湯包可存放兩年。」 Sue表示從中醫嘅角度看,補腎對護髮有幫助,所以愈早調理愈好,希望能透過現今流行的速食文化去幫助客人。「我哋採用鋁膜包裝嘅湯包,客人可將湯包摺合放入咖啡杯內,加入熱水坐3分鐘,用手撕開就飲得,好方便。如果喺屋企可以用碗嚟坐熱,貪快可以用微波爐叮10秒鐘,但我唔建議,用微波爐冇咁健康。」 不同地方陸續上架 首階段試市場反應,兩款湯包合共推出2千包,Jofee表示反應不俗,推出首月已售出超過一半。「依家護髮寶湯包喺協德榮及Hair Corner各分店有售,另外仲傾緊去唔同地方上架,好似Soda Mall、HKTV Mall及點點綠等。」 護髮寶 地址:尖沙咀廣東道116至120號海威商業中心8樓 查詢:2869 4333(Abbie/May) 潘先生(中)、Jofee(右)及Sue表示推出湯包是從幫人的角度出發,「近年多咗人關頭髮護理嘅問題,愈早調理愈好,血氣足就冇咁易脫髮。」 護髮寶分養髮系列的核桃製何首烏湯(右)及烏髮系列的黑豆枸杞湯,採用鋁膜包裝,售$118兩包。 核桃製何首烏湯(右)的材料包括杜仲、紅棗、薑、核桃仁及何首烏;黑豆枸杞湯的材料則有黑芝麻、黑豆及枸杞。 潘先生(右)找Jofee剪髮多年,現今成為生意上的拍檔。 Sue建議湯在中午飲,血氣好了,令成個人更精神。「放晒黑色食材喺枱面,我都唔識點煲,幸好潘生一口答應可以造髮寶湯出嚟。」 [...]

80後女生搞廣告公司 宗旨是為客戶解決問題

2020-02-07T14:53:44+08:002 月 7th, 2020|創業故事, 各行各業|

香港人夠創意,令廣告行業百花齊放。兩位同為80後的女生Carman及Chucky,也看好這一行的潛力,故一起創業搞廣告公司。她們在以往的工作中累積各方面的人脈,認識不少演員、導演、攝影師及化妝師等,令工作安排得更順利。她們表示在工作上不會視其他人為競爭對手,只會是合作伙伴,希望為客戶及同行解決問題,願景是令公司愈走愈遠,全香港人都認識她們。 Carman及Chucky相識於8年前,大家都在某電訊公司的廣告部工作,之後她們各自出來創業,Carman經營wifi蛋生意,Chucky開製作公司。Carman說:「16年尾,咁啱大家遇到,出嚟食過幾次飯,喺傾偈時講起大家喺以往嘅工作中,識落唔少演員及模特兒,我哋覺得市場對生面口嘅演員需求好大,覺得可以開廣告公司,以呢個做我哋嘅賣點,加上Chucky係開製作公司,會有唔少呢方面嘅工作經驗。」 17年頭,Chucky及Carman成立Everyone Agency,「將公司叫做Everyone,係因為我哋覺得每個人都可以係演員,有發揮自己嘅舞台,可以演出電影裏面嘅唔同角色。我哋搵演員唔會局限於靚仔靚女,都會搵talent,可能客戶會有唔同嘅需要,好似拍樓盤廣告想,要搵有鄰家feel嘅演員嚟演一家大細。」現時Everyone擁有過千位演員、模特兒的資料庫,可安排他們出演各類型的廣告及活動。 Everyone Agency的宗旨是為客戶解決問題,Chucky表示連開製作公司在內,入行多年都未有接過任何投訴,令她感到很自豪。「我哋覺得自己係一個百寶袋,要幫客戶及行家精準地解決問題。我們唔會視其他人做競爭對手,客戶、模特兒公司、導演及製作公司等,大家只會係合作伙伴。有時一齊合作嘅製作團隊超過百人,每個project 都會有唔同嘅需要,加上每位導演、攝影師及化妝師都有唔同style,我們要精準地去配對,確保每個細節能夠run得更有效率,做到最大嘅成本效益。」 公司開業至今,拍過不少廣告,當中包括鑽飾、食品、運動用品及樓盤等,每年營業額達7位數字。Carman表示銀碼不是問題,最緊要令客戶滿意。「每個project嘅收費由幾千到過百萬不等,即使只叫我哋幫手搵演員都冇問題。」 在工作上,Carman及Chucky遇過不少難忘事,Chucky說:「試過搵一位明星拍嘢,本身都好地地,有位工作人員即場提佢就番個位,搞到佢唔開心,跟住走咗入化妝間唔拍。如果因為咁搞到要ot,就會增加製作成本。我要入去氹番佢,好在佢最後都肯拍番。」 做廣告這行,捱更抵夜少不免,有時忙起上來,通頂一個星期對Carman及Chucky來說也是小事。「我們覺得沒有事情是解決不到,要拍嘢假期都照樣開工,好似有次遇着做冬,我哋去咗航拍一個樓盤廣告。我哋又試過用3日拍好一條TVC兼出埋街;有次去台灣,掛10號風球都照樣出去拍嘢。」 拍某些廣告,不時會出動數十至過百演員,Carman表示見識過國際級的工作團隊,令她們眼界大開。「之前幫一個國際品牌喺香港搵40個瑜伽導師出鏡,呢次合作需要簽保密協議。喺拍攝嗰日,我哋去到拍攝場地,工作人員要求用貼紙貼住手機鏡頭,以防洩露廣告內容,去唔同嘅區域又要戴唔同嘅手帶,去識別工作人員。」 Carman認為拍攝廣告,除了記性要好,還要有即場要有執生能力。「有次去澳門,幫旅遊局拍攝宣傳片,有個演員竟然冇嚟到,我們惟有即場搵人代替,最後搵咗拍攝場地嘅餐廳廚師幫手出鏡,好彩澳門旅遊局嘅負責人冇反對。」 說到未來目標,她們希望令全香港人都認識Everyone,Chucky說:「我哋依然睇看好香港嘅市場,因香港人有創意及彈性,遇到任何困難都會克服到。」 Everyone www.everyone.agency 有次賭場開幕,Carman(中左)及Chucky(中右)帶領model出席活動。 拍某些廣告未必要見樣,可能只需讓model的靚手靚腳出鏡。Carman說:「我哋有時都會親自出馬。我哋試過做耳仔model,戴耳環拍廣告,我哋仲要即場剪走耳仔旁邊嘅的水。」 圖為Carman(中)及Chucky(右)與一位年長的演員,為鑽飾品牌Mabelle拍廣告,飾演一家人。 Carman(左)及Chucky表示最緊要是互相信任,「我哋兩個都係80後,背景差唔多,志趣相投,喺工作上好有默契。有時做決定大家都唔需要商量,會信任對方。」

開小朋友專用salon 剪髮要有夢幻體驗

2020-01-03T16:51:16+08:001 月 3rd, 2020|創業故事, 各行各業|

現今父母肯使錢在子女身上,令到與小朋友有關的事情,衣食住行也變成了一門商機。髮型師Sue開設了專為小朋友而設的髮型屋,全店裝修猶如兒童樂園,令小朋友愛上剪頭髮,並希望培養他們剪頭髮的習慣及興趣。 只要走近位於K11 MUSEA的So Sweet,你已看到店外的排到密麻麻的冬甩裝飾,店內的雪糕及糖果造型的座位,加上粉色的主調,十分夢幻。老闆兼髮型師Sue表示:「店鋪已成為打咭位,大人小朋友都鍾意喺度影相,有啲小朋友仲主動拉媽咪入嚟剪頭髮。」 Sue表示家長都好放心帶小朋友來剪頭髮,「啲小朋友喺度剪緊頭髮嘅時候,好多家長都會好放心坐喺店外面等。好多小朋友唔鍾意洗頭,家長都想剪短佢哋嘅頭髮。其實好多小朋友都好貪靚,如果佢哋個髮型剪得好睇,被人讚會記住;反之,如果頭髮突然被剪得太短,佢哋又會好唔開心,所以我同髮型師都會喺剪髮前,問下小朋友嘅意見。」 與小朋友溝通,Sue有不少心得,「小朋友可能見到把梳會驚,我哋會畀把梳佢掂下,原來係唔痛架喎。喺剪髮時,有啲小朋友見頭髮跌落嚟會伸手去接,咁會影響到我哋剪髮,所以會畀玩具或木頭佢哋拎住。要小朋友開心,最緊要溝通,好似有個女仔本身係留長髮,突然想剪短係有機會受朋友影響,或者鍾意嘅明星係短髮。如果佢哋想留長頭學跳舞,我哋就唔會剪太短,幫佢哋修下個型。」 剪髮要舒服環境 本在Hair Corner擔任星級髮型師的Sue,很喜歡小朋友,她發現有些小朋友會驚剪頭髮,「佢哋可能嚟到陌生環境,甚至見到髮型師高大啲都會驚。有次我遇到一個小朋友大喊大叫,要拉佢入VIP房先冇事,發現原來小朋友身處舒服嘅環境情緒會穩定啲,所以我之後同老闆商量,我哋決定合資開一間專為兒童而設嘅salon,以So Sweet作為主題,畀一個合適嘅環境小朋友剪髮。」 So Sweet的宗旨是童心童型,從小裁培剪頭髮的習慣及興趣。而裝修風格走樂園路線,全因Sue希望讓小朋友留下美好回憶。「以前自己細個去剪頭髮,覺得係一件好幸福嘅事,呢度嘅氣氛似玩具反斗城,我都想小朋友嚟剪頭髮都會有一個開心回憶。」 長方形鋪一字排開 由選址到訂造座位與用具,So Sweet總共用了4年時間來籌備開業,Sue說:「之前有睇過愉景新城及Yoho Mall等商場,都覺得唔合適。我哋最後揀咗喺K11 Musea開業,因為哋想要一個長方形嘅鋪位,夠長夠薄夠淺,座位可以一字排開,途人只要經過都會知道我哋係髮型屋。加上商場附近會有滑梯、Legoland,隔離鋪係playgroup,會吸引到一班親子客。」 Sue指訂造店內的座位也花了兩年時間,「用咗3個月設計、倒模又要用咗3個月,我哋希望個座要夠穩支持到個雪糕造型;張凳要造到完美高度就到髮型師剪頭髮,呢度都改動過十幾次;鏡位仲可以播放卡通片。另外,我哋有一個糖果造型嘅座位,可以畀小朋友剪完髮夾扭蛋,個造型可以話係全球獨家。」 捲Elsa頭做獎勵 So Sweet在8月尾開業,共投資7位數字開業,現每月要投入6位數字去營運,她有信心可半年至9個月回本。Sue說:「啱啱開業,家長經過好願意過嚟拎咭片同查詢,到9月已有超過90%新客。星期六日最多人,平日就多3歲以下嘅小朋友嚟剪髮,因為唔使返學。有家長會喺小朋友去學校面試前,帶佢哋嚟剪髮;可能小朋友表現好,又會帶佢哋嚟捲Elsa頭做獎勵。」 在推廣及發展方面,Sue已有不少計劃,「嚟緊會開workshop,教家長點樣幫小朋友剪髮、吹頭,正確使用捲髮器捲頭髮。又會搞法國週講法文播法國音樂。喺11月尾,我哋會同model公司合作,喺model總決賽幫小朋友設計造型。另外,我哋正同跳舞學校傾合作,當小朋友出去表演時,幫佢哋扮靚。我哋都有計劃開分店,想開喺太古城、將軍澳等地區,吸納多啲家庭客。」 店鋪流滿兒童樂園的氣氛。 胡諾言的仔仔也是由Sue剪頭髮。 店內的雪糕造型座位很受小朋友歡迎,鏡的位置可播放卡通片。 另一張糖果機械人造型座位,可讓小朋友夾扭蛋。 剪髮前,Sue會與小朋友溝通,問問他們想剪甚麼髮型。 都有不少家長帶小朋友來電髮,Sue說:「小朋友用嘅電髮藥水,我哋係重新調配成gel狀,唔會掂到小朋友嘅頭皮。」 [...]

幼師創自家品牌 賣新派水果乳酪飲品

2019-12-05T15:11:37+08:0012 月 5th, 2019|創業故事|

現今年輕人最愛喝茶,飲品店開到成行成市。Ivy見有商機,想挑戰自己做老闆,放棄幼稚園教師的工作,開設飲品店輕時光,她用天然健康作賣點,專賣水果乳酪飲品。雖然創業過程遇到挫折,但她仍積極面對,不斷推出新口味及吸跨區寫字樓客,令生意打穩陣腳。 18年9月,Ivy在天后開設了專賣新派水果乳酪飲品的「輕時光」飲品店,提供優格果昔及水果優格蓋茶等飲品。Ivy本為幼稚園教師,但她不理家人的反對,辭去工作選擇創業。「雖然教書係我嘅志願,但我想趁年輕嘗試搵新個方向,可以有其他嘅挑戰,所以想做老闆,發展自家嘅品牌。其實家人知我想創業都有反對,擔心我太過冒險。我有幼師嘅資格,如果創業唔成功,都可以返去教書。」 令Ivy放棄教了6年教職,全因她喜愛手搖飲品,「之前我去澳洲工作假期時,我好鍾意當地流行嘅新鮮水果飲品。到17年嘅聖誕節,我去咗泰國旅行,喺當地試咗一杯士多啤梨乳酪,我覺得好好飲,味道好難忘,令我想開一間屬於自己嘅飲品店。」 Ivy決定完成該學期才正式創業,但在這大半年間,她不停去研發產品,「要研究點樣去沖調飲品,每個週未我都去深圳幫襯喜茶,參考佢哋嘅飲品款式及味道;我又飛去台灣,試勻當地嘅飲品店。」 以健康作賣點  棄用糖漿 Ivy希望以健康作賣點,故想到以水果配乳酪,「我冇做飲食業嘅經驗,發現入貨好難,原來香港嘅水果係入口為主,價格都幾貴,為咗保持新鮮,最後決定每日喺果欄直接入貨。我又上網搵其他材料嘅供應商資料,最終都解決到入貨嘅問題。」 當時每天Ivy都不停沖調飲品,試了過百杯,創出了主打的優格果昔及水果優格蓋茶。「我想再健康啲,唔想有添加劑,所以唔用糖漿嚟沖調飲品。我上YouTube見到製作桂花糕嘅短片,我得到啟發,我教書通常會飲冰糖水嚟潤肺降火,我試下將兩者結合,發現桂花冰糖水好清,同水果好夾,飲品入口有桂花嘅清香。另外,我將乳酪嘅味道,調得清淡啲,令到乳酪唔會遮蓋水果嘅原味。」 揀天后鋪位啱budget 到18年7月,學期結束,Ivy正式辭去工作,並為店鋪選址,準備開業。「我細個嗰陣住鰂魚通,好鍾意區內嗰份人情味,所以想揀喺港島區開業。我仲想揀一個單邉鋪位,旁邉有後巷,可以擺放植物,可以畀客人好舒服咁坐低飲嘢傾偈。銅鑼灣區內嘅租金太貴,最後發現只有西環及天后嘅鋪位啱預算,最後揀天后,因為呢度有單邊鋪,租鋪前有去電器道觀察過,發現人流都唔少。」 18年9月,輕時光正式開業, Ivy開業前預算,每天賣100杯飲品便可收支平衡,但現實中理想與現實差距很大,「開業初期每日賣得30杯,同預期差好遠,頭兩個月要蝕錢。之前明明見到會有人流行入橫街,但後來發現多數係住喺附近嘅街坊,佢哋趕住返屋企,好少會入嚟買飲品。」Ivy並沒有灰心,她想盡方法去改善業績,如在facebook落廣告,但成效不大。「我有去派傳單及搞免費試飲,又去附近嘅工廈攝優惠券入信箱。」 傳媒採訪生意好轉 直至上年12月,有傳媒來採訪,令生意反彈,Ivy說:「篇報導出街後,個迴響好大,多咗好多跨區客嚟幫襯,令到呢個月開始有錢賺,仲賺咗8萬。」高峰過後,盈利漸見回落,現時每月平均約賺兩三萬。為了吸回頭客,Ivy務求先做好口碑,「我參考咗starbuck及麥當勞嘅做法,推出期間限定,好似冬天推出熱飲,及抹茶系列;我仲會每個半月推出新口味,好似8月推出西瓜優格蓋茶,9月推出優格鮮果杯,依家就有榴槤優格果昔等。有客人問我賣唔賣魚蛋燒賣等小食,我驚會偏離品牌形象,暫時唔會考慮。」 為了增加競爭力,Ivy繼續研發新產品,如今年6月推出了樽裝陳皮冰糖燉檸檬及陳皮川貝冰糖燉檸檬,她秉承品牌健康形象的作風,全採用低糖配方,味道不太甜,有下火潤喉的功效。「反應好好,有唔少回頭客,間唔中會賣到斷貨。」另一方面,Ivy表示會主力吸納寫字樓客,甚至會跨區送貨,西環、上環及中環的寫字樓客會透過WhatsApp落order買飲品,「我會叫GOGOVAN或LALAMOVE送貨,我會用紙盒包裝好放上貨van,最遠試過送去火炭。」 與TNG合作開cafe 最近Ivy與TNG合作,在他們公司內開設café,只供員工使用,她會派員工駐場提供飲品。「呢個係一個好嘗試,我都有諗過開分店,但暫時唔會考慮特許經營,驚保持唔到品質。雖然創業過程唔係好順暢,但我想將輕時光發展成一個成功嘅香港品牌,我會繼續去達成呢個目標。」 開業成本 租金:$180,000(3按1上+經紀佣金) 裝修:$110,000 器材:$50,000 總投資:$340,000 每月收支 營業額:$145,000 租金:$40,000 人工:$38,000(2名全職) 材料:$35,000 雜費:$6,000 盈利:$26,000 TAKE YOUR TIME 輕時光 [...]

健身熱潮 與香港先生合作搞網上健身配對平台

2019-12-30T10:33:58+08:0010 月 30th, 2019|創業故事, 各行各業|

香港的健身熱潮歷久不衰,造就坊間有不少健身中心開業。而personal training的市場也很受重視,林忠良(Jay)便和香港先生Rocky看中這個商機,便合作搞網上健身配對平台,方便大眾找適合自己的健身教練,也讓教練多一個賺錢途徑。 10年大學畢業後,Jay入行當健身教練,他見坊間有不少人對治療痛症有需求,便考取相關證書,成為復康教練。「透過運動可以治療各類痛症,好似記者因工作關係,容易有頸椎強直嘅情況,即冇咗頸椎嘅天然弧度,令到頸椎移位,出現肩頸痛等問題,其實長遠可從姿勢去改善,例如糾正坐姿,增強背肌等。」 直至16年,Jay和香港先生Rocky一起成立網上健身配對平台「GoFit揾教練」,「我同Rocky之前已經認識,有次大家傾開,佢話香港近年好流行健身,一對一私人訓練嘅市場好大,想搞番一個網上搵健身教練嘅平台,我都覺得有得做,大家決定合作。」 自主有彈性 當客人上「GoFit揾教練」平台後,可因應自己需要搵教練,包括修身減肚腩,教練會上門親自授課,或到指定私人健身上堂,每堂收費$650起,視乎套票堂數而定。Rocky說:「客人可以喺我哋嘅網上平台搵健身教練,佢哋唔需要畀入會費、手續費及唔會有合約嘅約束,自由及有彈性。」 因Jay識人去成立網站,故最初只需投資5位數字金額,當找到十多位教練加盟後,便正式開業。「最初透過身邊朋友介紹教練加盟,我哋會再面試先決定請唔請,包括考下應徵者嘅基本功,好似掌上壓及深蹲做得正唔正確。我哋亦要求應徵者有3年全職教學經驗,仲會睇下佢哋嘅健身教練證書有冇過期,過咗期就唔會請。」 靠Rocky知名度 Jay和Rocky認為這種網上平台在美國好普及,但香港算是新概念,故他們積極宣傳。Jay說:「網站設有電話專線,畀客人打嚟查詢。我哋仲有喺google度買keyword,Rocky又會喺facebook及ig等社交平台宣傳,喺Rocky嘅知名度帶動下,對生意有好大幫助。開業頭半年,每個月約有30個成功配對個案。」 Jay指「GoFit揾教練」最初只提供一對一健身教練配對,到現時已發展到提供瑜伽課程及治療痛症等服務,「不斷有客人問有冇呢方面嘅服務,見有市場就加埋。我哋要跟住市場走,所以個網站個layout都轉過兩三次,網站仲會採用真實嘅上堂相,畀到客人信心。」 復康運動有市場 Rocky負責教健身及修身,而Jay是教治療痛症及復康運動。現時「GoFit揾教練」提供的一對一健身教練服務,約佔生意額的7成,其餘3成是公司客,當中包括宏利保險、香港旅遊業議會、香港大學及理工大學等。Jay說:「我哋有為企業提供僱員健康服務,有啲公司可能請我哋去解決僱員嘅健康需要,好似坐得多會腰痠背痛,我哋會為佢哋舉辦講座及伸展班。亦會有公司買咗一啲健身器械,好似樓梯機,會搵我哋去教佢哋嘅員工點樣去使用。」 現「GoFit揾教練」約有四十位教練,提供不同的健身服務,每年營業額約有6位數字。Jay表示:「增長都幾穩定,每年營業額增加約20%。我同Rocky嚟緊會計劃開一間健身中心,可以畀網站旗下嘅健身教練喺度教學生。」 GoFit揾教練  http://www.gofit.hk/ 作為復康教練,Jay會教授如何透過運動去改善痛症。 Jay(左)會代表「GoFit揾教練」去不同機構舉辦講座,講解痛症成因及治療方法。 Jay在講座上也會示範一些按摩技巧。 除了講座外,Jay還會為機構員工舉辦伸展班。 香港先生Rocky是一位演員,也是一名資深健身教練。 GoFit揾教練網站用上真實的上課相片,讓客人更有信心。

TVB藝員攻飲食業 油麻地賣吐司

2019-09-21T15:26:27+08:009 月 21st, 2019|創業故事|

「叁拾壹係代表一個月裏面嘅每一日,堂係一個空間畀人嚟坐下,店裏面掛咗31個牌,寫咗唔同嘅字,有好有壞,畀人去反思警醒,人生好嘅嘢要學,壞嘅嘢要領略,咁先係一個人生。」Benny(石浩東)是一位資深演員,曾演出過不少電視劇及電影,如《使徒行者2》、《愛·回家之開心速遞》及《毒·誡》等。除了幕前的演出外,原來他十分喜愛烹飪,並在今年4月在油麻地開設叁拾壹堂專賣吐司及早餐。   叁拾壹堂主打除了全日早餐外,還有7款特色吐司,包括蒜香雞扒蛋吐司、香茅豬扒蛋吐司、手撕雞炒蛋吐司及餃子吐司等,Benny表示每日平均賣約四、五十份吐司,主要做外賣生意。 雖然Benny是一位演員,但他也是叁拾壹堂的老闆,「我好鍾意煮嘢食,以前一得閒就去學煮嘢食,主要係西餐。6年前,我仲喺荃灣區內嘅樓上鋪開咗一間cooking studio,主要做私房菜。但我希望賣一啲較貼地及價錢實惠嘅食物,所以喺1年前轉賣吐司及全日早餐。」 油麻地懷舊風情 轉賣吐司及早餐後,Benny發現反應不俗,為了接觸到更多的顧客,故轉到油麻地區內地鋪開設叁拾壹堂,「我喺油麻地區長大,覺得呢區有好多舊式店鋪,好有懷舊風味,好適合開小店。依家德昌里呢個鋪位約2百平方呎,月租約萬二、三,租金比出面街起碼平一半,創業風險低好多。加上依家好多人鍾意行舊區,附近有專上學院,學生街坊都係我嘅目標顧客。」 Benny曾從事設計行業,分別做過平面設計、室內設計及櫥窗設計等,對開業很有幫助,「我會知道點樣裝修比較好及點樣出牌,同設計公司夾會快好多;之前我都開咗幾年樓上鋪,會清楚點樣入貨,所以開業嘅過程好順利。」 與外賣app合作 現時Benny主要透過社交平台宣傳,「有唔同媒體嚟訪問及介紹過我間鋪,反應唔錯,星期一至五會多街坊、學生及附近上班嘅客人,假期就會多區外客。暫時唔會派傳單,想環保啲;喺7月中,我同外賣app合作,推廣生意。」當要去拍劇,Benny會找兼職幫手,兼職多數都是演員出身。 叁拾壹堂於今年4月開業,Benny有信心店鋪只需半年便收支平衡,「我都有計劃開分店,最多開多兩間吐司店,都係以小店形式營運。如果可以嘅話,我仲開其他種類嘅食肆,進一步喺飲食業發展。」 叁拾壹堂高烤吐司 地址:油麻地德昌里1至9號德喜大廈地下4號鋪 電話:5540 3134 Benny的吐司店是近期的人氣店,有不少傳媒來採訪。 Benny在《使徒行者2》內飾演劉傑明督察。 叁拾壹堂店內裝飾,掛滿字句的木牌。 All day breakfast連凍檸茶 $85 香茅豬扒蛋吐司 $28(套餐連飲品薯條$55) [...]

Load More Posts