推動餐飲自動化 慳人手提升服務質素

2020-05-21T17:04:19+08:005 月 21st, 2020|創業故事, 各行各業|

去食肆用膳的過程中,有用過平板電腦點餐嗎?有用過自助點餐機嗎?這些都是餐飲自動化的實際例子。推行餐飲自動化,可以優化工序及節省人手,令食肆更有效率去提升服務,客人會有更好的用餐體驗。Web-On的創辦人Ben (李浩賢) 早着先機,近年大力發展餐飲自動化系統,當中包括電子顯示屏、平板電腦點餐、自助等位派籌系統 (俗稱排隊機)、自助點餐機及付款機等。最近由於武漢肺炎疫情嚴重,Ben將新研發的帶位機械人改良為消毒機械人,可以為辦公室及食肆等噴消毒藥水,進行消毒程序。 現時Ben與不少連鎖餐飲集團合作,當中包括太興、牛陣、牛角、OUTBACK、Pizza Hut及大家樂等,為他們提供POS系統、電子顯示屏、自助點餐平板電腦、自助等位派籌系統 (排隊機)、自助點餐機及付款機等服務。當中排隊機是公司主要業務之一,收費由2萬多元起。 Ben說:「我哋提供嘅餐飲自動化系統比坊間嘅唔同,好似我們嘅排隊機除咗有一般嘅功能外,仲可以接駁到領展嘅手機應用程式,客人可以透過手機app,就可以喺領展旗下商場嘅食肆拎籌等位。」此外,Ben所研發的POS系統可以直接連接前台的電子顯示屏及廚房的顯示系統,「當廚房通知前台有某啲食物要暫停供應,只要喺POS系統更改,廚房、電子顯示屏及點餐機都會同時更改,唔需要逐個系統去更新資料,方便及有效率好多。」   最低工資見商機 Ben是Web-On的創辦人,顧名思義,之前Web-On是為不同公司提供製作網站的服務,「我哋有幫過Pizza Hut製作可以畀客人上網訂pizza嘅網站,令我哋了解到餐廳系統嘅運作。之後我哋有為板長壽司製作畀客人訂外賣壽司嘅網站,當時板長嘅老闆Ricky(鄭威濤)問我可唔可以幫分店加設排隊機,其後再加入用平板電腦點餐的系統。咁啱政府喺12年開始實施最低工資,人工提高令餐飲業嘅營運成本增加,加上餐飲業亦好難請人,我覺得餐飲自動化係一個商機,因為可以節省到人手及提高營運效率。所以慢慢將Web-On嘅重心,轉移去提供餐飲自動化嘅服務。」 提高服務質素 餐飲自動化的最終目的是提高服務質素,令客人享受到優質的用餐體驗。Ben說:「我哋會同餐廳老闆講採用餐飲自動化系統,可以慳到最少一個人手,有啲餐廳可以慳到4至5個。其實採用餐飲自動化系統都係想令服務質素提升,好似用tablet點餐,系統直接連接去廚房,加快咗個落單嘅流程。」 Web-On在上個年度有8位數字的營業額,但踏入2020年,武漢肺炎疫情嚴重,但Ben表示公司首個季度的業績未見影響,「我哋可能因餐廳結業少咗生意,但係網站製作方面,生意額反而有上升,好似幫食肆製作訂餐嘅網站,或其他公司嘅網站等。」 改良帶位機械人 Ben不停為公司注入新元素,如研發了一個新軟件,可透過電腦操作咖啡機,現已為微軟位於數碼港的辦公室安裝這部咖啡機。此外,3月時港鐵表示引入20部消毒機械人為車廂消毒,雖未有提供每部消毒機械人的購買價,但港鐵表示投入新科技總共用上2千多萬元。Ben表示:「我哋研發嘅帶位機械人,底部安裝咗激光雷達,可以scan餐廳嘅空間及枱凳嘅位置,機械記低晒呢啲資料後,就可以帶客人入座。最近我哋加以改良,安裝咗新配件,變成一部消毒機械人,可為食肆、辦公室等唔同嘅空間地方,噴消毒藥水進行消毒。每部售價只係3萬幾蚊。早排Viu TV嘅節目《今日疫情》,都有介紹過我哋嘅消毒機械人。」 Web-On www.web-on.com Ben不時去講talk,介紹餐飲自動化的好處。 Web-On本身只從事網站製作的業務,Ben看到餐飲自動化的商機,便大力發展。 自助等位派籌系統(俗稱排隊機)是Web-On的主要業務之一。 電子顯示屏與自助付款機可連接POS系統,更改資料會更加方便。 Ben改良帶位機械人,加上配件便可噴消毒藥水進行消毒。

80後女生搞廣告公司 宗旨是為客戶解決問題

2020-02-07T14:53:44+08:002 月 7th, 2020|創業故事, 各行各業|

香港人夠創意,令廣告行業百花齊放。兩位同為80後的女生Carman及Chucky,也看好這一行的潛力,故一起創業搞廣告公司。她們在以往的工作中累積各方面的人脈,認識不少演員、導演、攝影師及化妝師等,令工作安排得更順利。她們表示在工作上不會視其他人為競爭對手,只會是合作伙伴,希望為客戶及同行解決問題,願景是令公司愈走愈遠,全香港人都認識她們。 Carman及Chucky相識於8年前,大家都在某電訊公司的廣告部工作,之後她們各自出來創業,Carman經營wifi蛋生意,Chucky開製作公司。Carman說:「16年尾,咁啱大家遇到,出嚟食過幾次飯,喺傾偈時講起大家喺以往嘅工作中,識落唔少演員及模特兒,我哋覺得市場對生面口嘅演員需求好大,覺得可以開廣告公司,以呢個做我哋嘅賣點,加上Chucky係開製作公司,會有唔少呢方面嘅工作經驗。」 17年頭,Chucky及Carman成立Everyone Agency,「將公司叫做Everyone,係因為我哋覺得每個人都可以係演員,有發揮自己嘅舞台,可以演出電影裏面嘅唔同角色。我哋搵演員唔會局限於靚仔靚女,都會搵talent,可能客戶會有唔同嘅需要,好似拍樓盤廣告想,要搵有鄰家feel嘅演員嚟演一家大細。」現時Everyone擁有過千位演員、模特兒的資料庫,可安排他們出演各類型的廣告及活動。 Everyone Agency的宗旨是為客戶解決問題,Chucky表示連開製作公司在內,入行多年都未有接過任何投訴,令她感到很自豪。「我哋覺得自己係一個百寶袋,要幫客戶及行家精準地解決問題。我們唔會視其他人做競爭對手,客戶、模特兒公司、導演及製作公司等,大家只會係合作伙伴。有時一齊合作嘅製作團隊超過百人,每個project 都會有唔同嘅需要,加上每位導演、攝影師及化妝師都有唔同style,我們要精準地去配對,確保每個細節能夠run得更有效率,做到最大嘅成本效益。」 公司開業至今,拍過不少廣告,當中包括鑽飾、食品、運動用品及樓盤等,每年營業額達7位數字。Carman表示銀碼不是問題,最緊要令客戶滿意。「每個project嘅收費由幾千到過百萬不等,即使只叫我哋幫手搵演員都冇問題。」 在工作上,Carman及Chucky遇過不少難忘事,Chucky說:「試過搵一位明星拍嘢,本身都好地地,有位工作人員即場提佢就番個位,搞到佢唔開心,跟住走咗入化妝間唔拍。如果因為咁搞到要ot,就會增加製作成本。我要入去氹番佢,好在佢最後都肯拍番。」 做廣告這行,捱更抵夜少不免,有時忙起上來,通頂一個星期對Carman及Chucky來說也是小事。「我們覺得沒有事情是解決不到,要拍嘢假期都照樣開工,好似有次遇着做冬,我哋去咗航拍一個樓盤廣告。我哋又試過用3日拍好一條TVC兼出埋街;有次去台灣,掛10號風球都照樣出去拍嘢。」 拍某些廣告,不時會出動數十至過百演員,Carman表示見識過國際級的工作團隊,令她們眼界大開。「之前幫一個國際品牌喺香港搵40個瑜伽導師出鏡,呢次合作需要簽保密協議。喺拍攝嗰日,我哋去到拍攝場地,工作人員要求用貼紙貼住手機鏡頭,以防洩露廣告內容,去唔同嘅區域又要戴唔同嘅手帶,去識別工作人員。」 Carman認為拍攝廣告,除了記性要好,還要有即場要有執生能力。「有次去澳門,幫旅遊局拍攝宣傳片,有個演員竟然冇嚟到,我們惟有即場搵人代替,最後搵咗拍攝場地嘅餐廳廚師幫手出鏡,好彩澳門旅遊局嘅負責人冇反對。」 說到未來目標,她們希望令全香港人都認識Everyone,Chucky說:「我哋依然睇看好香港嘅市場,因香港人有創意及彈性,遇到任何困難都會克服到。」 Everyone www.everyone.agency 有次賭場開幕,Carman(中左)及Chucky(中右)帶領model出席活動。 拍某些廣告未必要見樣,可能只需讓model的靚手靚腳出鏡。Carman說:「我哋有時都會親自出馬。我哋試過做耳仔model,戴耳環拍廣告,我哋仲要即場剪走耳仔旁邊嘅的水。」 圖為Carman(中)及Chucky(右)與一位年長的演員,為鑽飾品牌Mabelle拍廣告,飾演一家人。 Carman(左)及Chucky表示最緊要是互相信任,「我哋兩個都係80後,背景差唔多,志趣相投,喺工作上好有默契。有時做決定大家都唔需要商量,會信任對方。」

開小朋友專用salon 剪髮要有夢幻體驗

2020-01-03T16:51:16+08:001 月 3rd, 2020|創業故事, 各行各業|

現今父母肯使錢在子女身上,令到與小朋友有關的事情,衣食住行也變成了一門商機。髮型師Sue開設了專為小朋友而設的髮型屋,全店裝修猶如兒童樂園,令小朋友愛上剪頭髮,並希望培養他們剪頭髮的習慣及興趣。 只要走近位於K11 MUSEA的So Sweet,你已看到店外的排到密麻麻的冬甩裝飾,店內的雪糕及糖果造型的座位,加上粉色的主調,十分夢幻。老闆兼髮型師Sue表示:「店鋪已成為打咭位,大人小朋友都鍾意喺度影相,有啲小朋友仲主動拉媽咪入嚟剪頭髮。」 Sue表示家長都好放心帶小朋友來剪頭髮,「啲小朋友喺度剪緊頭髮嘅時候,好多家長都會好放心坐喺店外面等。好多小朋友唔鍾意洗頭,家長都想剪短佢哋嘅頭髮。其實好多小朋友都好貪靚,如果佢哋個髮型剪得好睇,被人讚會記住;反之,如果頭髮突然被剪得太短,佢哋又會好唔開心,所以我同髮型師都會喺剪髮前,問下小朋友嘅意見。」 與小朋友溝通,Sue有不少心得,「小朋友可能見到把梳會驚,我哋會畀把梳佢掂下,原來係唔痛架喎。喺剪髮時,有啲小朋友見頭髮跌落嚟會伸手去接,咁會影響到我哋剪髮,所以會畀玩具或木頭佢哋拎住。要小朋友開心,最緊要溝通,好似有個女仔本身係留長髮,突然想剪短係有機會受朋友影響,或者鍾意嘅明星係短髮。如果佢哋想留長頭學跳舞,我哋就唔會剪太短,幫佢哋修下個型。」 剪髮要舒服環境 本在Hair Corner擔任星級髮型師的Sue,很喜歡小朋友,她發現有些小朋友會驚剪頭髮,「佢哋可能嚟到陌生環境,甚至見到髮型師高大啲都會驚。有次我遇到一個小朋友大喊大叫,要拉佢入VIP房先冇事,發現原來小朋友身處舒服嘅環境情緒會穩定啲,所以我之後同老闆商量,我哋決定合資開一間專為兒童而設嘅salon,以So Sweet作為主題,畀一個合適嘅環境小朋友剪髮。」 So Sweet的宗旨是童心童型,從小裁培剪頭髮的習慣及興趣。而裝修風格走樂園路線,全因Sue希望讓小朋友留下美好回憶。「以前自己細個去剪頭髮,覺得係一件好幸福嘅事,呢度嘅氣氛似玩具反斗城,我都想小朋友嚟剪頭髮都會有一個開心回憶。」 長方形鋪一字排開 由選址到訂造座位與用具,So Sweet總共用了4年時間來籌備開業,Sue說:「之前有睇過愉景新城及Yoho Mall等商場,都覺得唔合適。我哋最後揀咗喺K11 Musea開業,因為哋想要一個長方形嘅鋪位,夠長夠薄夠淺,座位可以一字排開,途人只要經過都會知道我哋係髮型屋。加上商場附近會有滑梯、Legoland,隔離鋪係playgroup,會吸引到一班親子客。」 Sue指訂造店內的座位也花了兩年時間,「用咗3個月設計、倒模又要用咗3個月,我哋希望個座要夠穩支持到個雪糕造型;張凳要造到完美高度就到髮型師剪頭髮,呢度都改動過十幾次;鏡位仲可以播放卡通片。另外,我哋有一個糖果造型嘅座位,可以畀小朋友剪完髮夾扭蛋,個造型可以話係全球獨家。」 捲Elsa頭做獎勵 So Sweet在8月尾開業,共投資7位數字開業,現每月要投入6位數字去營運,她有信心可半年至9個月回本。Sue說:「啱啱開業,家長經過好願意過嚟拎咭片同查詢,到9月已有超過90%新客。星期六日最多人,平日就多3歲以下嘅小朋友嚟剪髮,因為唔使返學。有家長會喺小朋友去學校面試前,帶佢哋嚟剪髮;可能小朋友表現好,又會帶佢哋嚟捲Elsa頭做獎勵。」 在推廣及發展方面,Sue已有不少計劃,「嚟緊會開workshop,教家長點樣幫小朋友剪髮、吹頭,正確使用捲髮器捲頭髮。又會搞法國週講法文播法國音樂。喺11月尾,我哋會同model公司合作,喺model總決賽幫小朋友設計造型。另外,我哋正同跳舞學校傾合作,當小朋友出去表演時,幫佢哋扮靚。我哋都有計劃開分店,想開喺太古城、將軍澳等地區,吸納多啲家庭客。」 店鋪流滿兒童樂園的氣氛。 胡諾言的仔仔也是由Sue剪頭髮。 店內的雪糕造型座位很受小朋友歡迎,鏡的位置可播放卡通片。 另一張糖果機械人造型座位,可讓小朋友夾扭蛋。 剪髮前,Sue會與小朋友溝通,問問他們想剪甚麼髮型。 都有不少家長帶小朋友來電髮,Sue說:「小朋友用嘅電髮藥水,我哋係重新調配成gel狀,唔會掂到小朋友嘅頭皮。」 [...]

修讀青年學院職專文憑 參加世界技能大賽開眼界

2019-11-06T11:44:31+08:0011 月 4th, 2019|各行各業, 職場消息, 自我增值|

行行出狀員,只要找到興趣所在,便能發揮自己的潛能。修讀青年學院職專文憑(髮型設計)的Billy(王彬城),剛於今年8月到俄羅斯喀山參與「世界技能大賽」,出戰「美髮」項目並獲得優異獎章,Billy表示能參與世界性賽事令自己眼界大開。他現已畢業,並在一間連鎖髮型屋工作,任職髮型師助理,他希望能在行內發展,以成為髮型師為目標。 今年20歲的Billy(王彬城),完成中四課程後,便升讀屬VTC機構成員的青年學院所舉辦的職專文憑(髮型設計)課程,「我鍾意髮型設計,所以想報讀有關嘅課程。」 課程為期3年,Billy需學習洗頭、剪髮、電髮及染髮等技巧,他認為剪髮難度最高,「因為每個人嘅頭形都唔同,所以我會請教導師點樣去剪,同埋同學之間會互相做對方嘅model,可以試剪多啲唔同嘅頭形。」 青年學院會安排學生參與不同的比賽,增加實戰經驗。Billy曾參與多個髮型設計比賽,包括在「亞洲髮型化妝大賽」與多個亞洲地區的參賽者較量,獲得組別優異獎;又於髮型品牌舉辦的港澳髮型比賽中,奪得「Youth Design Award」冠軍。 獲得優異獎章 而在剛剛過去的8月,Billy更代表香港到俄羅斯喀山參加每兩年一次的「世界技能大賽」,出戰「美髮」項目,更獲得優異獎章,他在來自34個參賽國家及地區的代表中排名第八,「美髮」項目也是歷屆最好成績。「上年導師同我講有呢個比賽,我好有興趣,於是報名參加。」 青年學院(葵芳)髮型及造型設計組高級講師Stephen(馬振強)表示,「世界技能大賽」是公開讓大眾參加,只要出賽時在22歲以下及有相關行業背景。「Billy通過初選,由最初的三十幾個參加者中,突圍而出成為『美髮』項目嘅四位『優勝選手』之一,最後成功作為代表香港嘅選手。」 出戰大賽有挑戰性 Billy認為參加「世界技能大賽」是一個非常難得的機會,因大會規定每名選手只可參加「世界技能大賽」一次,這次比賽令他有機會與各地選手交流,認識不少行內精英,見識各地美髮技術的發展。「我備戰咗一年,導師同我不停去練習。比賽時總共有7個項目,有啲會用上真人模特兒,我哋要跟據大會提供嘅相片,剪出一樣嘅造型,仲要加上自己嘅創意,覺得好有挑戰性。」 因之前有不少比賽經驗,故Billy出戰「世界技能大賽」並沒有怯場,但當中有不少難忘的體驗,「好似其中有一個項目要為男士剪髮剃鬚,外個嘅男model會有好多鬍鬚,我可以喺其他選手身上學到剃鬚嘅技巧。當同眾多選手一齊開始比賽,一齊完成,真係好有成功感。」 導師Stephen指職專文憑(髮型設計)課程着重多元化學習,「課程會分3個部分,包括美髮內容,好似學洗剪吹電染等技巧;通用科目則包括學中英數及電腦知識;持續發展方面,會教學生嘅溝通技巧,點樣去增加自信。」 理論與實踐並重 在這3年裏面,課程內容會由淺入深,理論與實踐並重。Stephen說:「考試嘅比重係實務佔70%,理論佔30%。課程會由淺入深,除咗鍛煉美髮嘅技巧外,仲會畀學生去解難,及安排佢哋組隊做project,對髮型師嘅工作有更深嘅體會。好似題目係如何幫客人變身,佢哋要研究客人嘅資料,例如適合乜嘢髮型及顏色,再喺其他同學面前present,反省自己有乜嘢不足,會唔會剪髮嘅時間太耐、剪得好唔好等。到yr3時,學生仲要學寫CV及面試技巧等。」 Stephen表示畢業後大部分學生都會加入美髮行業,亦有學生會選擇繼續升學。而今年畢業的Billy,現於一間連鎖髮型屋內任職髮型師助理,「我讀過課程,學過髮型嘅技巧,所以好多工作都會好快上手。我嚟緊嘅目標係成為髮型師,同埋可以擁有自己嘅髮型屋。」 課程名稱:職專文憑(髮型設計) 舉辦機構:青年學院 修讀年期:3年全日制 入學要求:完成中三或同等學歷。 學費:中三畢業生一般可獲3年學費豁免;中四畢業生一般可獲2年學費豁免。 課程內容:教授學生有關美髮業所需的基本知識與技能,包括剪髮、染髮、電髮、美髮造型、頭髮護理,甚至髮型與文化和營運知識等。 查詢:2897 6111 網址:http://www.vtc.edu.hk 青年學院職專文憑(髮型設計)畢業生Billy,於今年8月到俄羅斯喀山參與「世界技能大賽」,出戰「美髮」項目並獲得優異獎章。 青年學院 (葵芳) [...]

健身熱潮 與香港先生合作搞網上健身配對平台

2019-12-30T10:33:58+08:0010 月 30th, 2019|創業故事, 各行各業|

香港的健身熱潮歷久不衰,造就坊間有不少健身中心開業。而personal training的市場也很受重視,林忠良(Jay)便和香港先生Rocky看中這個商機,便合作搞網上健身配對平台,方便大眾找適合自己的健身教練,也讓教練多一個賺錢途徑。 10年大學畢業後,Jay入行當健身教練,他見坊間有不少人對治療痛症有需求,便考取相關證書,成為復康教練。「透過運動可以治療各類痛症,好似記者因工作關係,容易有頸椎強直嘅情況,即冇咗頸椎嘅天然弧度,令到頸椎移位,出現肩頸痛等問題,其實長遠可從姿勢去改善,例如糾正坐姿,增強背肌等。」 直至16年,Jay和香港先生Rocky一起成立網上健身配對平台「GoFit揾教練」,「我同Rocky之前已經認識,有次大家傾開,佢話香港近年好流行健身,一對一私人訓練嘅市場好大,想搞番一個網上搵健身教練嘅平台,我都覺得有得做,大家決定合作。」 自主有彈性 當客人上「GoFit揾教練」平台後,可因應自己需要搵教練,包括修身減肚腩,教練會上門親自授課,或到指定私人健身上堂,每堂收費$650起,視乎套票堂數而定。Rocky說:「客人可以喺我哋嘅網上平台搵健身教練,佢哋唔需要畀入會費、手續費及唔會有合約嘅約束,自由及有彈性。」 因Jay識人去成立網站,故最初只需投資5位數字金額,當找到十多位教練加盟後,便正式開業。「最初透過身邊朋友介紹教練加盟,我哋會再面試先決定請唔請,包括考下應徵者嘅基本功,好似掌上壓及深蹲做得正唔正確。我哋亦要求應徵者有3年全職教學經驗,仲會睇下佢哋嘅健身教練證書有冇過期,過咗期就唔會請。」 靠Rocky知名度 Jay和Rocky認為這種網上平台在美國好普及,但香港算是新概念,故他們積極宣傳。Jay說:「網站設有電話專線,畀客人打嚟查詢。我哋仲有喺google度買keyword,Rocky又會喺facebook及ig等社交平台宣傳,喺Rocky嘅知名度帶動下,對生意有好大幫助。開業頭半年,每個月約有30個成功配對個案。」 Jay指「GoFit揾教練」最初只提供一對一健身教練配對,到現時已發展到提供瑜伽課程及治療痛症等服務,「不斷有客人問有冇呢方面嘅服務,見有市場就加埋。我哋要跟住市場走,所以個網站個layout都轉過兩三次,網站仲會採用真實嘅上堂相,畀到客人信心。」 復康運動有市場 Rocky負責教健身及修身,而Jay是教治療痛症及復康運動。現時「GoFit揾教練」提供的一對一健身教練服務,約佔生意額的7成,其餘3成是公司客,當中包括宏利保險、香港旅遊業議會、香港大學及理工大學等。Jay說:「我哋有為企業提供僱員健康服務,有啲公司可能請我哋去解決僱員嘅健康需要,好似坐得多會腰痠背痛,我哋會為佢哋舉辦講座及伸展班。亦會有公司買咗一啲健身器械,好似樓梯機,會搵我哋去教佢哋嘅員工點樣去使用。」 現「GoFit揾教練」約有四十位教練,提供不同的健身服務,每年營業額約有6位數字。Jay表示:「增長都幾穩定,每年營業額增加約20%。我同Rocky嚟緊會計劃開一間健身中心,可以畀網站旗下嘅健身教練喺度教學生。」 GoFit揾教練  http://www.gofit.hk/ 作為復康教練,Jay會教授如何透過運動去改善痛症。 Jay(左)會代表「GoFit揾教練」去不同機構舉辦講座,講解痛症成因及治療方法。 Jay在講座上也會示範一些按摩技巧。 除了講座外,Jay還會為機構員工舉辦伸展班。 香港先生Rocky是一位演員,也是一名資深健身教練。 GoFit揾教練網站用上真實的上課相片,讓客人更有信心。

星級化妝師Meegan:學化妝終身受用

2019-11-05T17:53:08+08:007 月 21st, 2019|創業故事, 各行各業, 自我增值, 見工貼士|

以前學化妝可能只是一心入行當化妝師,但時移世易,現今年輕人學化妝可用來增值自己。星級化妝師Meegan表示學好化妝技巧,能一世受用,適用於不同的行業,「你做KOL出鏡都可以化個靚妝見人!」 星級化妝師Meegan入行多年,為不少明星藝人化妝,包括周汶錡、車婉婉、黎瑞恩、陳嘉寶、Angelababy及文詠珊等。Meegan表示現今學化妝,目的不只是為入行當化妝師,應視為自己增值的一門技巧,「學化妝對自己嘅人生及事業會好有幫助,好似畢業生識得化靚自己去影相,寄CV都會好睇啲;加上入職唔同嘅行業都會有用,例如平日返工或出席公司宴會,令老闆上司留下好印象。依家咁流行KOL,為自己化個靚妝,上鏡都會吸引到多啲觀眾嚟睇你。」 Meegan在澳門理工學院修讀商科,畢業後從事文職工作,但她心裏卻想當一位化妝師,「做文職都幾悶,話就話返朝9晚6,但成日要OT,有時一日要做成十幾個鐘,人工及自由度又唔高,當時覺得自己嘅人生唔應該係咁。」Meegan自小便有創業的念頭,她對化妝師的工作很有興趣,想創一番事業。「見周街都係大學生,想增加自己嘅競爭力,學一門自己鍾意嘅手藝,就決定辭職到香港及英國報讀化妝課程。」 由助手做起 以前做化妝師,要由低做起,Meegan也不例外,她自言「好肯跟人」,「我會跟唔同嘅化妝師做助手,主要負責執頭執尾,遞下化妝掃,做落當佢哋覺得我嘅工作態度及手藝好,遇到佢哋唔得閒接嘅job時,就會畀我去試。最初頭幾次可能冇錢收,我會當係一個學嘢嘅機會,凡事要睇遠啲。」亦因為這些機會,令Meegan的手藝得到賞識,接到的工作愈來愈多,包括為雜誌幫model化妝、接私人宴會或活動的化妝工作、為新娘及明星藝人化妝等。 由04年開始入行做化妝師,到10年,Meegan便開始設化妝學校,「之前有朋友叫我開學校,我都想將化妝呢門手藝傳承落去,學校就選址喺尖沙咀天文台道。開學校有自己嘅studio,可幫人化妝之餘,又可以開個人自學班。」 出書增教學信心 雖然開設學校,但Meegan認為自己還未夠經驗,未有信心教大型教學班,直至她推出《Meegan’s Magic Makeup Bible》一書,十分受歡迎。「呢本係將50個平凡人大變身嘅化妝工具書,會分析唔同個案嘅面形問題,作出唔同嘅化妝技巧,靈感源自台灣一個電視綜藝節目,將一個女仔一邊面保留素顏,另一邊面進行化妝。我發現當中有好多難題,好似眼形都可以分幾千種,喺製作完呢本書後,覺得自己做得到,可以教到大班,之後學校就搬到銅鑼灣一個較大嘅地方。」 不只化妝技術,連授課技巧都要與時並進,Meegan表示:「依家教學冇以前咁嚴謹,唔會每個化妝step跟到足,反而要啟發學生,由佢哋自由發揮。好似以前上堂會講明教乜嘢題目,依家我就會出一條題目,例如係關於舞台化妝,學生要自己上網搵資料消化咗先,等佢哋了解完再話畀我聽想學化乜嘢妝。」 用WhatsApp交功課 此外,溝通方式都會貼近年輕人,Meegan會透過WhatsApp引起學生的學習意欲,「我會透過WhatsApp畀啲參考圖片佢哋睇,佢哋亦會喺WhatsApp交功課,我會品評佢哋化嘅妝,其他同學又會睇到,大家互相學習。」Meegan認為實習亦十分重要,「畢業前,我會帶佢哋去唔同嘅地方實習,除咗婚宴化新娘妝工作外,仲會接演唱會及舞台劇等化妝工作。」 現Meegan有多年教學經驗,說到未來目標,她表示:「依家我計劃緊到廣東及澳門教班,畀多啲人認識我哋間學校。長遠嘅目標係希望帶學生到國際嘅層面,之前我都有去過美國紐約及法國巴黎嘅時裝show工作;亦去過西安教過班。我希望令自己嘅學生走向國際,令佢哋成為國際性嘅化妝師,化妝可以有自己嘅人生體驗,開到眼界。」 Bridal Corner 課程查詢: 網址:www.bridalcorner.com.hk Facebook: bridalcorner makeup course 周汶錡是與Meegan合作的明星藝人之一。 《黎瑞恩感恩有你演唱會2018》宣傳海報的妝容由Meegan負責。 演唱會進行時,Meegan在後台為黎瑞恩補妝。 [...]

【各行各業】專賣長者家居用品 令老友品味生活

2019-07-21T10:26:43+08:007 月 5th, 2019|各行各業|

香港人口的老化趨勢上升,隨之而來也是對各種長者生活配套的需求。由80後的 Aries與拍檔 Elis成立的好好生活百貨,專賣具品味的長者生活用品,除着重功能外,設計及外觀均走精品路線。她們的目標是讓長者能夠享受更高品質的生活質素及方便。   好好生活百貨專賣長者生活用品,包括閱讀、戶外、傢俬、餐飲及養生等超過3百款產品,從台灣、日本、美國、英國及德國等地入口,售價由$30至$4,000不等,功能與生活品味並重。老闆Aries(李燕儂)說:「我覺得長者都可以有生活態度,enjoy得型啲,點解一定要用cheap嘢?好似買一支拐杖,分分鐘係長者人生最後嘅一支,應該買最好嘅,用得開心及又安全啲。」 採訪當日是平日的下午,記者來到好好生活百貨位於西環卑路乍街的新分店,看到不少街坊老友記入內參觀。Aries表示:「我哋之前喺呢區開第一間門市,之後因租約期滿業主收番間鋪,就搬去銅鑼灣嘅樓上鋪。見西環有好多長者,最近再返嚟呢區開分店,銅鑼灣店就變做office及陳列室,畀團體客預約嚟參觀選購貨品。」 創業的契機 Aries曾到加拿大修讀數學學士課程,05年畢業回港後,她便投身銀行業。12年,因媽媽中風,需要坐輪椅代步,令她產生創業的念頭,「媽咪只得五十幾歲,平時好注重儀表,好難接受自己要俾人照顧。」當時Aries到處找適合媽媽用的家居用品,包括輔助扶手、床欄等,她見香港市面上的長者用品功能雖然齊全,但外觀設計卻很普通,「我喺網上見到歐美、日本及台灣等地嘅長者用品款式多又精美,我就喺外國訂返嚟畀媽咪用,佢都好滿意。」 Aries見自己有這方面的需求,即代表其他人亦有可能有同樣的需要,便找來修讀電腦的好朋友Elis合資創業。「我哋諗住網店與實體店都會開,首先係要喺網上搵啱嘅產品,再飛去日本及台灣當地直接同品牌代表傾入貨;歐美嘅產品就透過 email去傾。用咗大半年時間先傾好入貨,之後Elis亦製作好網站。」 長者教做生意 見時機成熟,Aries於14年辭去工作,她們在西營盤租了一個 200呎的單位,成立好好生活百貨,最初只有眼鏡、拐杖、輔助扶手等產品售賣。Aries和Elis沒有零售經驗,開業初期店鋪生意不似預期,全靠長者們的意見,令生意逆轉。「初時我哋只係成日諗入乜嘢貨,點樣擺靚個陳列架,冇乜做過宣傳。開業最初嗰大半年生意唔係太好。喺看鋪時,我哋有同公公婆婆傾偈,原來佢哋見識好多,有啲仲搞過生意,佢哋教路叫我哋落街派傳單、擺展覽、參加商會活動及創業比賽等,我哋有跟住做,仲吸引到傳媒嚟採訪,畀多咗人認識我哋。除咗街坊外,亦有區外客嚟幫襯,生意多咗好多,慢慢做到收支平衡。」 推自家產品 此外,好好生活百貨也有推出自家產品,Aries說:「日本、台灣人嘅身型同香港人相似,佢哋嘅產品會較啱我哋使用;但歐美地區就唔係樣樣產品都啱用,好似拐杖會太長,我哋會要求廠商去改良長短。喺15年,見生意開始平穩發展,我哋同設計師合作,推出自家品牌嘅產品,好似𠵱家老人家都鍾意玩電話,加上有老人家反映唔鍾意掛繩眼鏡,所以我哋設計掛頸式濾藍光老花眼鏡,推出後好受長者歡迎。」 17年 3月,好好生活百貨搬去銅鑼灣600呎的樓上鋪,19年5月,她們亦回到西環開分店。Aries表示客人的年齡層很廣泛,「由年輕人到老友記都有,主要係四、五十歲。年紀輕嘅係嚟買嘢送畀父母同屋企人,長者亦會嚟買嘢畀自己。近年都多咗團體客,好似NGO、長者中心,亦有職業治療師或醫院轉介病人嚟買用品。」 不同寄賣點 現時好好生活百貨的產品也有在不同的地方售賣,包括商務印書館、健樂坊等。Aries說:「沙田、北角及鰂魚涌嘅商務印書館會售賣我哋嘅閱讀類產品,例如老花鏡、放大鏡等;荃灣健樂坊就會賣養生類別嘅用品。而BigBigChannel都有介紹過我哋嘅產品,亦有喺Big BigShop內售賣,好似佢哋之前介紹過拉筋板,都會令呢個產品賣得多咗。」 生意額上升,令到Aries和Elis十分振奮,「證明近年長者接受到有品味嘅用品,長者嘅生活都可以精采及有質素。佢哋辛苦大半世,子女都應該畀佢哋用到最好,對長者嚟講唔只係一件產品,仲係一份愛及心意。」 好好生活百貨回到西環開分店,Aries表示有不少舊街坊來支持。 西環分店裝修簡約,貨品陳列清晰。 好好生活百貨找來老友記做model,充分表現出長者也能有生活態度。 熊貓放大鏡頸鍊 $388 Classic Canes時尚可摺式打吡手杖(紅葡萄) $680 [...]

【創業故事】智能理財app幫90後儲錢 用戶增長每月過萬

2019-06-19T12:45:46+08:006 月 19th, 2019|創業故事, 各行各業|

人工智能近年成為普及的生活科技,而香港人日常煩惱總離不開錢,多間港產初創企業都將人工智能的應用聚焦在金融科技(FinTech),其中一間跑出的startup是去年才成立的Planto,同名的加密理財應用程式專攻年輕人市場,強調安全簡易,透過大數據分析為用戶提供理財建議,大半年吸納超過7萬名用戶。 賺回贈,Planto的創辦人Ankit Suri示範如何透過該手機應用程式,找出那一張信用咭最適合自己,「將銀行賬戶連結到Planto後,個app會分析用戶嘅消費習慣,然後向佢哋推薦賺到最多嘅信用咭。每位用戶都可獲取度身訂造嘅可靠建議。」當記者試用Planto後,驚覺自己一直「碌錯咭」,如依照建議申請另一張咭,一年可賺多近$2,500的現金回贈。 除信用咭外,Planto能管理儲蓄、強積金、八達通、投資、貸款及按揭賬戶,並在咭數到期、收到存款利息或戶口有大額交易等情況下,向用戶發推送通知。用戶又可設定儲錢計劃,Ankit說:「例如你想儲錢買樓,Planto可幫你計好首期及所有相關支出;我哋開發緊新功能,日後可向用戶推薦埋按揭計劃」。 創業因理財太難 今年27歲的印裔港大畢業生Ankit自言不是理財專家,「喺讀大學時,我試過遲找咭數,甚至唔知只還min pay(最低還款額)有乜嘢後果。當時我對呢啲常識一無所知,犯過多次小錯誤。」畢業後,他投身銀行工作,發現很多「千禧世代」(millennials,泛指1980至1990年代出生者)跟他一樣對理財感到困惑,於是決定辭職,與兩名志同道合的前同事創業,「香港人應該要有更簡單嘅理財方法」。 資訊安全好重要 Planto的賣點是簡單好用,但要讓用戶放心使用,安全性十分重要。Ankit表示應用程式採用「AES-256加密」,規格與美國政府及銀行所採用的同級,而銀行戶口的登入賬戶及密碼在加密後,只會儲存於用戶的手機,不會儲存在Planto的伺服器,保障用戶的私隱及數據安全。「我哋會每半年一次,搵獨立機構做安全審核,並向用戶發表安全報告。」 Ankit與拍擋都是來自投資科技行業,對寫應用程式駕輕就熟,他們憑着創業諗頭及技術,先後獲數碼港及香港大學iDendron贊助資金和免費辦公室,私人投資者包括加拿大的Portag3 Ventures 、本港的Leadway Ventures及Zeroth.ai等。 融資不可空談理念 Ankit指startup創辦人游說潛在投資者時,不可空談理念,「融資前應先做好產品原型,並要展示出你嘅startup希望解決到乜嘢問題、個問題有幾大;而你公司有潛力發展到乜嘢地步,包括產品研究路線圖、用戶增長目標及擴展團隊時間表等。」目前Planto的集資額達7位數字,團隊人數由最初的3人擴充至現時的15人。 Planto免費供用戶使用,只向合作的金融機構收費,如用戶在應用程式內申請信用咭,發咭機構就須向Planto付費。去年10月,Planto在開放下載後,數周內註冊人數衝破1萬,每月增長約1至2萬,「現時有超過7萬名用戶,佔香港千禧世代人口3%。我哋嘅團隊不時同用戶見面,希望收集多啲review,令個app更好用」。Ankit期望明年將應用程式推廣至其他亞洲城市。 Planto網站及下載連結:www.planto.hk   *申請數碼港創意微型基金計劃 Ankit在香港所申請的創業資助,當中包括了「數碼港創意微型基金」(CCMF),計劃會提供10萬元基金,讓初創公司在6個月計劃期內,將創新概念付諸實踐。成功申請計劃並通過面試後,數碼港會提供師友計劃指導、提供辦公室免租及幫助宣傳等支援。Ankit表示申請前需要準備詳盡的計劃書,令評審了解該創業計劃的長遠目標及發展方向。 查詢:www.cyberport.hk Planto由(左起):Yousaf、Ankit 及 Taha 創辦。 Ankit經常與同事開會,討論研發應用程式的方向。 Planto團隊共有十多人,對startup而言算是頗具規模。 Planto在App Store的評價不俗。 [...]