以前學化妝可能只是一心入行當化妝師，但時移世易，現今年輕人學化妝可用來增值自己。星級化妝師Meegan表示學好化妝技巧，能一世受用，適用於不同的行業，「你做KOL出鏡都可以化個靚妝見人！」 星級化妝師Meegan入行多年，為不少明星藝人化妝，包括周汶錡、車婉婉、黎瑞恩、陳嘉寶、Angelababy及文詠珊等。Meegan表示現今學化妝，目的不只是為入行當化妝師，應視為自己增值的一門技巧，「學化妝對自己嘅人生及事業會好有幫助，好似畢業生識得化靚自己去影相，寄CV都會好睇啲；加上入職唔同嘅行業都會有用，例如平日返工或出席公司宴會，令老闆上司留下好印象。依家咁流行KOL，為自己化個靚妝，上鏡都會吸引到多啲觀眾嚟睇你。」 Meegan在澳門理工學院修讀商科，畢業後從事文職工作，但她心裏卻想當一位化妝師，「做文職都幾悶，話就話返朝9晚6，但成日要OT，有時一日要做成十幾個鐘，人工及自由度又唔高，當時覺得自己嘅人生唔應該係咁。」Meegan自小便有創業的念頭，她對化妝師的工作很有興趣，想創一番事業。「見周街都係大學生，想增加自己嘅競爭力，學一門自己鍾意嘅手藝，就決定辭職到香港及英國報讀化妝課程。」 由助手做起 以前做化妝師，要由低做起，Meegan也不例外，她自言「好肯跟人」，「我會跟唔同嘅化妝師做助手，主要負責執頭執尾，遞下化妝掃，做落當佢哋覺得我嘅工作態度及手藝好，遇到佢哋唔得閒接嘅job時，就會畀我去試。最初頭幾次可能冇錢收，我會當係一個學嘢嘅機會，凡事要睇遠啲。」亦因為這些機會，令Meegan的手藝得到賞識，接到的工作愈來愈多，包括為雜誌幫model化妝、接私人宴會或活動的化妝工作、為新娘及明星藝人化妝等。 由04年開始入行做化妝師，到10年，Meegan便開始設化妝學校，「之前有朋友叫我開學校，我都想將化妝呢門手藝傳承落去，學校就選址喺尖沙咀天文台道。開學校有自己嘅studio，可幫人化妝之餘，又可以開個人自學班。」 出書增教學信心 雖然開設學校，但Meegan認為自己還未夠經驗，未有信心教大型教學班，直至她推出《Meegan’s Magic Makeup Bible》一書，十分受歡迎。「呢本係將50個平凡人大變身嘅化妝工具書，會分析唔同個案嘅面形問題，作出唔同嘅化妝技巧，靈感源自台灣一個電視綜藝節目，將一個女仔一邊面保留素顏，另一邊面進行化妝。我發現當中有好多難題，好似眼形都可以分幾千種，喺製作完呢本書後，覺得自己做得到，可以教到大班，之後學校就搬到銅鑼灣一個較大嘅地方。」 不只化妝技術，連授課技巧都要與時並進，Meegan表示：「依家教學冇以前咁嚴謹，唔會每個化妝step跟到足，反而要啟發學生，由佢哋自由發揮。好似以前上堂會講明教乜嘢題目，依家我就會出一條題目，例如係關於舞台化妝，學生要自己上網搵資料消化咗先，等佢哋了解完再話畀我聽想學化乜嘢妝。」 用WhatsApp交功課 此外，溝通方式都會貼近年輕人，Meegan會透過WhatsApp引起學生的學習意欲，「我會透過WhatsApp畀啲參考圖片佢哋睇，佢哋亦會喺WhatsApp交功課，我會品評佢哋化嘅妝，其他同學又會睇到，大家互相學習。」Meegan認為實習亦十分重要，「畢業前，我會帶佢哋去唔同嘅地方實習，除咗婚宴化新娘妝工作外，仲會接演唱會及舞台劇等化妝工作。」 現Meegan有多年教學經驗，說到未來目標，她表示：「依家我計劃緊到廣東及澳門教班，畀多啲人認識我哋間學校。長遠嘅目標係希望帶學生到國際嘅層面，之前我都有去過美國紐約及法國巴黎嘅時裝show工作；亦去過西安教過班。我希望令自己嘅學生走向國際，令佢哋成為國際性嘅化妝師，化妝可以有自己嘅人生體驗，開到眼界。」 Bridal Corner 課程查詢： 網址：www.bridalcorner.com.hk Facebook： bridalcorner makeup course 周汶錡是與Meegan合作的明星藝人之一。 《黎瑞恩感恩有你演唱會2018》宣傳海報的妝容由Meegan負責。 演唱會進行時，Meegan在後台為黎瑞恩補妝。 [...]

人工智能近年成為普及的生活科技，而香港人日常煩惱總離不開錢，多間港產初創企業都將人工智能的應用聚焦在金融科技（FinTech），其中一間跑出的startup是去年才成立的Planto，同名的加密理財應用程式專攻年輕人市場，強調安全簡易，透過大數據分析為用戶提供理財建議，大半年吸納超過7萬名用戶。 賺回贈，Planto的創辦人Ankit Suri示範如何透過該手機應用程式，找出那一張信用咭最適合自己，「將銀行賬戶連結到Planto後，個app會分析用戶嘅消費習慣，然後向佢哋推薦賺到最多嘅信用咭。每位用戶都可獲取度身訂造嘅可靠建議。」當記者試用Planto後，驚覺自己一直「碌錯咭」，如依照建議申請另一張咭，一年可賺多近$2,500的現金回贈。 除信用咭外，Planto能管理儲蓄、強積金、八達通、投資、貸款及按揭賬戶，並在咭數到期、收到存款利息或戶口有大額交易等情況下，向用戶發推送通知。用戶又可設定儲錢計劃，Ankit說：「例如你想儲錢買樓，Planto可幫你計好首期及所有相關支出；我哋開發緊新功能，日後可向用戶推薦埋按揭計劃」。 創業因理財太難 今年27歲的印裔港大畢業生Ankit自言不是理財專家，「喺讀大學時，我試過遲找咭數，甚至唔知只還min pay（最低還款額）有乜嘢後果。當時我對呢啲常識一無所知，犯過多次小錯誤。」畢業後，他投身銀行工作，發現很多「千禧世代」（millennials，泛指1980至1990年代出生者）跟他一樣對理財感到困惑，於是決定辭職，與兩名志同道合的前同事創業，「香港人應該要有更簡單嘅理財方法」。 資訊安全好重要 Planto的賣點是簡單好用，但要讓用戶放心使用，安全性十分重要。Ankit表示應用程式採用「AES-256加密」，規格與美國政府及銀行所採用的同級，而銀行戶口的登入賬戶及密碼在加密後，只會儲存於用戶的手機，不會儲存在Planto的伺服器，保障用戶的私隱及數據安全。「我哋會每半年一次，搵獨立機構做安全審核，並向用戶發表安全報告。」 Ankit與拍擋都是來自投資科技行業，對寫應用程式駕輕就熟，他們憑着創業諗頭及技術，先後獲數碼港及香港大學iDendron贊助資金和免費辦公室，私人投資者包括加拿大的Portag3 Ventures 、本港的Leadway Ventures及Zeroth.ai等。 融資不可空談理念 Ankit指startup創辦人游說潛在投資者時，不可空談理念，「融資前應先做好產品原型，並要展示出你嘅startup希望解決到乜嘢問題、個問題有幾大；而你公司有潛力發展到乜嘢地步，包括產品研究路線圖、用戶增長目標及擴展團隊時間表等。」目前Planto的集資額達7位數字，團隊人數由最初的3人擴充至現時的15人。 Planto免費供用戶使用，只向合作的金融機構收費，如用戶在應用程式內申請信用咭，發咭機構就須向Planto付費。去年10月，Planto在開放下載後，數周內註冊人數衝破1萬，每月增長約1至2萬，「現時有超過7萬名用戶，佔香港千禧世代人口3%。我哋嘅團隊不時同用戶見面，希望收集多啲review，令個app更好用」。Ankit期望明年將應用程式推廣至其他亞洲城市。 Planto網站及下載連結：www.planto.hk   *申請數碼港創意微型基金計劃 Ankit在香港所申請的創業資助，當中包括了「數碼港創意微型基金」（CCMF），計劃會提供10萬元基金，讓初創公司在6個月計劃期內，將創新概念付諸實踐。成功申請計劃並通過面試後，數碼港會提供師友計劃指導、提供辦公室免租及幫助宣傳等支援。Ankit表示申請前需要準備詳盡的計劃書，令評審了解該創業計劃的長遠目標及發展方向。 查詢：www.cyberport.hk Planto由(左起)：Yousaf、Ankit 及 Taha 創辦。 Ankit經常與同事開會，討論研發應用程式的方向。 Planto團隊共有十多人，對startup而言算是頗具規模。 Planto在App Store的評價不俗。 [...]

Tony看中了香港的運輸物流業需要大量的臨時工，便成立樂力為不同公司提供包裝、倉務、速遞、跟車及拆櫃等臨時工，成功在市場搶佔席位，發展短短數年，樂力現時每月盈利已達2百萬。為了趁年輕作多方面發展，他迎合市場需要，設立跨媒體公司，為客戶提供拍攝短片的宣傳服務，更推出雜誌，全面配合業務發展。 採訪當日，Tony與拍檔Max在屯門的辦公室內開會，傾談有關新業務的發展，Tony說：「依家主力發展餐飲業嘅服務，好似搵人手，甚至設計餐單傳單。另外，我哋想發展跨媒體製作，依家成立咗自己嘅團隊，可以幫客人拍片做宣傳。我哋只收$3,888，可以幫一間茶餐廳搵網紅拍片，之後放喺YouTube、唞音等頻道宣傳。」 Tony表示現已找了不少網紅合作，「標準係佢哋嘅ig、facebook等有最少5千個followers。」拍檔Max也是網紅之一，在YouTube及唞音有自己的頻度，伍仔也是他們的合作夥伴。 Tony是做運輸物流業的承包商起家，他成立了樂力人力資源，為不同公司提供包裝、倉務、速遞、跟車及拆櫃等臨時工，每日外派超過500個職位，現時與樂力合作的公司共有約80間，包括4PX、7-11、榮華、嘉頓及維他奶等。「雖然樂力生意唔錯，但始終人力資源仲介服務太過容易俾人抄，所以嚟緊想發展新業務，成立『到位』接各行各業嘅廣告宣傳生意。」 想靠創業改變生活 現年33歲的Tony在公屋長大，他自小便想創業，「屋企人係做地盤散工，做嘢好辛苦，我想透過搞生意改善生活。」中五畢業後，他曾教授結他，之後他向家人借了6萬元，與朋友夾份到廣州做紅酒買賣，做了3年多，最終結業收場。 10年，Tony只帶着200人民幣回香港，「自己冇錢，一返到香港就周圍打電話問朋友有冇散工介紹，貪可以現金出糧。當晚有朋友帶我去會展做場務，做搬搬抬抬及清潔等。喺工作期間，我見淨係一個地方已經需要4、5百人手，發覺短期嘅工市場好大。」當時Tony意識到自己可當判頭，向公司介紹人手應該有得做。 到12年，Tony嘗試開展人力資源仲介業務，只靠一部電話，在家中找生意。「我主動打電話畀物流公司，話可以幫佢哋搵人做臨時工，需唔需要人手，大約打畀10間公司，先得1、2間會理我。我仲會喺網上論壇留意有冇招聘post，會打過去問需唔需要仲介服務。」 最怕臨時工放飛機 Tony表示未正式成立公司，存在不少困難及風險，「我冇同客戶及臨時工簽合約，有時介紹咗人手過去，臨時工會直接同間公司聯絡，咁就損失咗人力資源。」此外，Tony最怕臨時工失約，「當時我要朝早6點半起身call人返工，但點都會有人放飛機，個客打過嚟話有幾多人冇返，我就要即刻再搵人手，或者自己去頂個位，唔想得失個客。」 到13年，Tony見業務發展只有年多，每個月約有超過6萬盈利，前景不俗，便成立樂力人力資源，在荔枝角租單位作辦公室，也請了員工幫手，「我哋開始與唔同嘅公司簽合約，好似講明勞工係我哋嘅資源，如果被搲走要畀一次性轉介費等，用嚟保障自己。同時我哋喺facebook、報刊等落廣告，喺街擺易拉架、派傳單，吸引多啲人嚟登記做臨時工，令到我哋資料庫不斷增大。」正式開公司不久，樂力便找到Fedex合作，這是一個好開始。 每年增長50% Tony表示現時樂力人力資源每年盈利也有50%的增長，全靠提供好的服務滿足客人的需要。現時公司的資料庫，有過萬名散工的資料，以日薪計算。「每個散工我哋都要面試，睇下合唔合乎要求。而我哋定嘅日薪，比坊間公司高出1至2成，由$450至$1,000，視乎工種而定。希望班臨時工做得開心，咁先留到人力資源。」 Tony現在荔枝角及屯門都設有辦公室，在18年11月，他在屯門辦公室成立新公司「到位」。「除咗可以搵網紅配合拍片做宣傳外，5月22號我哋仲會推出雜誌《到位攻略》，有吃喝玩樂資訊嘅介紹，亦可畀各行各業落廣告。希望喺多方面發展新業務。」   採訪當日，Tony與拍檔Max正開會，討論新公司的發展。 樂力人力資源約有30名員工，主要處理在網上發佈職位空缺的訊息，及每天編排足夠的人力提供給各間公司。 樂力主要是提供運輸物流業的臨時工。 在屯門的辦公室內，設有studio，可讓網紅拍片及進行影片剪接。 網紅伍仔是《到位》的合作夥伴，圖為伍仔拍短片宣傳一間度身度訂造西裝的店鋪。 《到位攻略》在5月22日出版，創刊號找來藝人姚亦澧拍攝封面。

香港人愛創業，自己做老闆可以話晒事。在眾多生意當中，以食肆最受歡迎，因為香港人愛美食，故對食肆的需求很大。80後阿心在2016年創立的麻甩佬狗仔粉，主打狗仔粉、豆腐花、鮮蝦雲吞、碗仔翅等傳統小食，憑着自家新鮮製作及對用料要求高，獲得街坊的支持。在2018年，阿心再開分店，以餐廳形式營運，除招牌菜狗仔粉外，更推出不少新款菜式，吸引食家的味蕾。 麻甩佬狗仔粉的分店開設在長沙灣，位於房協新樓盤喜漾下的地鋪。老闆阿心表示：「見屯門店已經打穩陣腳，就開始諗開分店，本來諗住喺元朗開，點知咁啱見到呢個鋪位，九龍開鋪可以有多啲客路，而有食客同我哋反映點解唔做堂食，就聽意見開餐廳做堂食，依家新店約有30個座位。」 長沙灣分店 新店推出套餐 分店在18年6月開張，除同樣以狗仔粉及各款小食作主打外，阿心和家人花盡心思研發新菜式。「做餐廳唔同做小食店，小食店嘅繁時段係客人收工後或者飯後嚟買宵夜；餐廳就午市及晚市最忙，同嚟得餐廳食嘢，唔只食小食，所以我哋有推出套餐，好似豬油撈飯、咖喱牛腩飯等，仲有屯門店賣嘅鮮蝦雲吞，新店可以配米粉。」 採訪當天，只是下午時段，餐廳仍不停有客人光顧，生意不俗。阿心說：「其實呢度嘅位置唔算好好，最初開業生意冇想像中咁好，但有次有YouTuber嚟食嘢，仲拍片介紹我哋嘅食物，之後多咗人嚟，除咗附近嘅街坊外，仲有唔少跨區客嚟幫襯，慢慢做出口碑，生意愈嚟愈好。其實喺九龍區開鋪，真係方便到客人。」 自小想開小食店 麻甩佬狗仔粉正店在16年開業，由阿心與丈夫及媽媽一同經營，「細個鍾意掃街，好想有自己嘅小食店，當打咗一段時間工後，我同屋企人提起話想創業，大家都支持。喺要討論賣乜嘢小食時，大家都懷念狗仔粉嘅味道，加上唔係周圍食到，覺得係賣點。」原本阿心以為男士比較願意花錢掃街，故用麻甩佬做店名，「做落發現乜嘢客人都有，學生、家庭主婦及上班族都會嚟幫襯。」 在食物製作上，前後花了幾個月時間，全部真材實料。阿心說：「開業前，我哋有買材料喺屋企試整麵條，想要彈牙得嚟又吸到湯底嘅味，材料比例都試咗十幾次。然後就搵粉麵廠訂製，湯底亦係自己調製。」 在屯門食街開業 此外，阿心選在屯門龍門居開業，全因這裏是區內知名的食街，「媽咪住喺屯門龍門居附近，佢話呢度人流唔錯，我哋有嚟睇過環境，見鋪金平過荃灣、旺角，最後決定租咗一個約200呎嘅鋪位。」 沒有經營過小食店，於是阿心與丈夫在農曆新年時到太子擺檔賣狗仔粉，汲取經驗，「我哋砌咗部木頭車，第一次賣小食真係手忙腳亂。我哋整好晒一煲狗仔粉拎去賣，發現全日不斷加熱後，狗仔粉會糊，冇咁彈牙，所以到正式開業時，我哋轉為每次只整少量，賣晒再整。工作會比較繁複，但可以保持到個質素。」 麻甩佬狗仔粉在開業後，阿心不停聽客人的意見，進行改善，「驚只賣狗仔粉太單調，我哋賣埋自家包製嘅鮮蝦雲吞及咖喱三寶。但有客人反映得3款嘢食唔多夠，可以加埋碗仔翅，之後陸續加入豆腐花、生菜魚肉湯及芝麻糊等。現時約賣緊約十數款小食。」阿心認為食店最重要是食物味道，故店內食物全部自家烹調，好食自然有口碑。 開新店有拗撬 經營兩年後，便開分店，阿心表示都遇到不少困難，「開分店都會同家人有拗撬，除咗要不停諗新菜式保持新鮮感外，人手調配都係問題，依家請人好困難。其實大家都係為件事好，好快會有共識。」現時阿心主理正店，分店則由丈夫及媽媽打理。 現時分店生意也漸上軌道，阿心堅信保持質素十分重要，「為咗要畀到客人新鮮感，我哋不時推出新菜式，好似蜆蚧鯪魚球、涼伴海蜇及花彫醉鴨舌等，keep住有新嘢，先吸引到客人再嚟幫襯。」 麻甩佬狗仔粉  地址： 屯門龍門路43號龍門居第2座地下35號鋪 長沙灣福榮街500號喜漾商場地下4號鋪 現時阿心主力打理屯門店，主攻小食。 分店由阿心媽媽負責打理 招牌狗仔粉 $24 [...]