About admin

該作者尚未填入任何詳細資訊
So far admin has created 38 blog entries.

諗橋抗疫 做KOL直銷產品

2020-06-23T15:59:23+08:006 月 23rd, 2020|創業故事, 各行各業|

新冠肺炎爆發至今,有不少打工仔的生計受到影響,被迫放無薪計,甚至被炒。Sonic亦受到疫情打擊,正所謂窮則變,變則通,Sonic見在疫情下,出街購物人次大幅減少,便想到用KOL身分在facebook做直播推銷產品,吸引愛購物的香港人網購,結果銷情不俗,反應出乎意料,不足一個月,followers的人數已過萬。Sonic預計這盤生意在半年內可回本。 現時KOL直播賣每逢星期一及四在facebook開show,直播售賣產品,產品售價約是坊間的6折。Sonic是主持人之一,每次他都會與一位靚女KOL一同主持節目。「現時每場都有約8百人睇直播購物,我哋與其他直銷節目唔同嘅地方,除咗開show會較密外,限時購物時間會係由開show嘅9pm至第二日嘅12nn,唔會限死客人只能喺直播時段內購買。」 今年3月尾舉行第一場KOL直播賣,反應非常好,有超過1500人觀看。Sonic說:「第一場show一定要搞下gimmick,全場400件貨品,每件只需要$1,仲要包郵,貨品包括口罩等防疫用品及王朝滴雞精等。反應非常好,好快賣晒。」KOL直播賣的facebook專頁不足一個月便有過萬的followers,為了慶祝,Sonic更首創全港網上$10店,當日更有5百幾張訂貨單,保持專頁及網店的人氣。 辭工轉接wifi工程 今年35歲的Sonic,本身當媒體廣告推銷員,「我做過好多間媒體,好似《東Touch》、《蘋果日報》,但到佔中時,生意跌,收入減少,都有諗過轉行。」到15年,他認識了一班從事IT的朋友,成了轉行的契機,「Wifinnity係由佢哋成立,當時全港有成2千幾個免費wifi點。我覺得大家可以合作,市民免費用wifi前要睇廣告,會係一個商機。所以我辭咗份工,開公司接單再同佢哋分賬。頭一年生意唔錯,前景唔差。」 好景不常,Sonic最後被拍檔飛起。「當時我簽成咗同UA財務合作,收咗2百幾萬,同佢哋set up一個wifi工程,放廣告入wifi平台。但負責IT班拍檔收咗錢後就走咗佬,張約係我簽,結果要我揹起條數,我要賣表賣車,及直接同電訊商溝通,搞番掂佢。由於要還債,過咗6、7個月真係頂唔住,好彩最後有幾個商家朋友夾咗2百幾萬畀我,成功過渡。」 疫情下網購 在Sonic經營下,Wifinnity發展至今全港已有4千7百幾個免費wifi點,並接到不同的wifi工程,如政府資訊科技總監辦公室等。但自19年中起的社會運動及今年初的新冠肺炎疫情爆發,令生意一落千仗。「我本身唔鍾意網購,但見喺疫情期間,香港嘅網購生意反而不俗,香港人鍾意買嘢,冇得出街就多咗上網購物。」 Sonic希望在疫情下能夠生存,有了點子後,便積極找貨源及合作機會。「我以前做sales,識落唔少商家,可以畀我低價拎貨去賣。香港興KOL,我做埋一份,每次開show都搵個女仔KOL嚟一齊做直播,好似ToTo、黃榕等。而我賣出貨品先入貨,唔怕賣唔出,砸死晒啲貨。」 廣告客戶特約節目 KOL直播賣的反應好,開始有KOL自薦出show,Sonic表示:「嚟緊都會搵啲明星藝人上節目,好似最近邀請咗E-kids嘅Alan上嚟。」KOL直播賣的限時購物時段為開show的9pm至第二日的12nn,網店可吸引32,000多人次瀏覽,故得到不少廣告客戶垂青,開始有廣告客戶的特約節目,增加收入。Sonic說:「到依家呢刻,都有8、9場show有特約,直播時會有廣告客戶的特約banner。」 Sonic預計半年可收支平衡,雖然市面多了競爭者,但他自言不怕競爭,「先做好自己,嚟緊可能會開popup store,或者喺街做直銷,亦會做multi media,例如拍片賣廣告等。」 facebook@KOL直播賣 網址:kolliveshow.com 最近Sonic(右)邀請了E-kids的Alan一起做節目。 圖為Sonic(左)與E-kids的Alan一起主持節目,會介紹所賣的產品。 Sonic自言不怕上鏡,「我細個有被星探搵去拍廣告,唔怕面對鏡頭,加上自己做過sales,講嘢介紹產品,唔會有問題。 在facebook專頁會有預告,Sonic將會與那一位KOL一起主持節目。 最近多了廣告客戶的特約節目,直播時會見到廣告客戶的特約banner。

IVE成立「S-SHOP@TMIT」智慧商店 讓學生發揮創意

2020-06-06T16:06:09+08:006 月 6th, 2020|其他, 自我增值|

科技日新月異,香港慢慢發展成為智慧城市,為了趕及科技潮流,香港專業教育學院(IVE) 的屯門院校,於2020年初設立一所名為「S-SHOP@TMIT」的模擬智慧商店,呈現以科技營造的無人購物體驗。「S-SHOP@TMIT」智慧商店可供修讀軟件工程高級文憑,與人工智能及手機軟件開發高級文憑課程的學生學習之用,發揮他們的創意,將課堂學到的知識實踐出來,為將來社會工作做足準備。 「S-SHOP@TMIT」智慧商店(以下簡稱智慧商店)融合人工智能、金融科技、移動支付、數據分析及物聯網等科技的應用。香港專業教育學院(IVE)屯門院校資訊科技系講師鄧鼎革表示:「智慧商店喺今年初正式啟用,可以提供無人商店嘅購物體驗,即冇店員顧客都可以購物。智慧商店採用新技術,用人工智能數據進行分析。」 智慧商店內設有智慧銀行,團隊利用區塊鏈技術,設計了一款名為「Vitcoin」的虛擬加密貨幣,模擬讓顧客於店內消費及轉帳之用。鄧sir說:「店內會有顯示屏列出商店嘅交易紀錄、設施運作嘅狀態,同時可以睇到股票價格及保險計劃等資訊。顧客仲可以透過電話睇到廣告,提升宣傳效能,我哋利用AR技術,用手機scan貨品,就會popup貨品嘅資料,包括出產地、食物嘅材料等。系統亦會跟據顧客嘅購物紀錄及喜好,顯示啱佢哋嘅商品廣告。」 讓學生發揮創意 智慧商店內設有智慧售賣機和智慧儲物櫃,方便顧客透過手機應用程式選購及取得網購商品,更加方便。鄧sir說:「有咗呢個平台,可以畀學生發揮創意,開發自己嘅應用程式,喺出嚟工作前有實戰嘅經驗。」現時「S-SHOP@TMIT」計劃供IVE(屯門)軟件工程高級文憑,與人工智能及手機軟件開發高級文憑課程的學生學習之用,將課堂上學到的知識實踐出來。 李澤賢是IVE軟件工程高級文憑的二年級學生,因為喜歡IT及編程,故在中學畢業後,升讀IVE資訊科技的基礎課程文憑,及後再升讀IVE軟件工程高級文憑課程。「我自小已經自學編程及設計網站嘅技術,到中學時,我有選修資訊及通訊科技嘅科目,更自行開發家用嘅理財記賬系統。我睇好IT行業嘅前景及香港會成為智慧城市,所以選修呢科。」 應用區塊鏈技術 李澤賢有份參與智慧商店的部分開發項目,包括開發智慧銀行系統、智慧商店的應用程式及AR技術的應用等。「參與智慧商店可以應用到課堂學到嘅知識,喺開發嘅過程中,會學到項目管理、時間成本及用到企業級軟件,呢啲係之前比較少接觸。喺導師及拍檔嘅幫助下,學習將區塊鏈技術應用喺加密貨幣嘅交易紀錄儲存、資料加密及數據分析上,可以確保到資料嘅安全,令我對區塊鏈嘅技術加深了解。」 此外,李澤賢於修讀一年級時獲院校安排到日本東京交流,參與「亞洲電腦圖像和互動技術會議及展覽」(SIGGRAPH Asia 2018),認識擴增實境(AR)、虛擬實境(VR)及三維模型等多項先進技術。「畢業後,我想繼續進修,想學更多IT嘅知識。在工作方面,我比較偏向互聯網行業,希望去大企業工作,吸收更多項目管理嘅經驗。」 90小時實習 鄧sir表示課程有90小時的實習,讓學生到中小企實習工作。「通常畢業生升學及就業會各佔一半。軟件工程高級文憑課程嘅畢業生,可以做programmer、技術支緩人員及程式開發人員等。人工智能及手機軟件開發高級文憑課程嘅畢業生,可以擔任手機程式、人工智能及網頁開發等工作。」 軟件工程高級文憑 舉辦機構:香港專業教育學院(IVE) 入學要求:香港中學文憑考試5科成績達第二級或以上,包括英國語文及中國語文;或VTC基礎文憑(級別三)/基礎課程文憑;或VTC中專教育文憑/職專文憑;或毅進文憑;或同等學歷。 修讀年期:2年全日制 學費:$31,570 課程內容:為學生提供各類實用的電腦軟件開發技術,並着重軟件的設計及品質和項目管理,使畢業生能設計及開發智能電話、互聯網和企業應用軟件。 查詢:2897 6111 網址: http://www.vtc.edu.hk 人工智能及手機軟件開發高級文憑 舉辦機構:香港專業教育學院(IVE) 入學要求:香港中學文憑考試5科成績達第二級或以上,包括英國語文及中國語文;或VTC基礎文憑(級別三)/基礎課程文憑;或VTC中專教育文憑/職專文憑;或毅進文憑;或同等學歷。 修讀年期:2年全日制 學費:$31,570 課程內容:為有志成為智能手機、平版電腦及穿戴式裝置軟件開發專才提供專業培訓,融合人工智能及不同移動平台科技,配合行業多元化發展。 查詢:2897 6111 [...]

推動餐飲自動化 慳人手提升服務質素

2020-05-21T17:04:19+08:005 月 21st, 2020|創業故事, 各行各業|

去食肆用膳的過程中,有用過平板電腦點餐嗎?有用過自助點餐機嗎?這些都是餐飲自動化的實際例子。推行餐飲自動化,可以優化工序及節省人手,令食肆更有效率去提升服務,客人會有更好的用餐體驗。Web-On的創辦人Ben (李浩賢) 早着先機,近年大力發展餐飲自動化系統,當中包括電子顯示屏、平板電腦點餐、自助等位派籌系統 (俗稱排隊機)、自助點餐機及付款機等。最近由於武漢肺炎疫情嚴重,Ben將新研發的帶位機械人改良為消毒機械人,可以為辦公室及食肆等噴消毒藥水,進行消毒程序。 現時Ben與不少連鎖餐飲集團合作,當中包括太興、牛陣、牛角、OUTBACK、Pizza Hut及大家樂等,為他們提供POS系統、電子顯示屏、自助點餐平板電腦、自助等位派籌系統 (排隊機)、自助點餐機及付款機等服務。當中排隊機是公司主要業務之一,收費由2萬多元起。 Ben說:「我哋提供嘅餐飲自動化系統比坊間嘅唔同,好似我們嘅排隊機除咗有一般嘅功能外,仲可以接駁到領展嘅手機應用程式,客人可以透過手機app,就可以喺領展旗下商場嘅食肆拎籌等位。」此外,Ben所研發的POS系統可以直接連接前台的電子顯示屏及廚房的顯示系統,「當廚房通知前台有某啲食物要暫停供應,只要喺POS系統更改,廚房、電子顯示屏及點餐機都會同時更改,唔需要逐個系統去更新資料,方便及有效率好多。」   最低工資見商機 Ben是Web-On的創辦人,顧名思義,之前Web-On是為不同公司提供製作網站的服務,「我哋有幫過Pizza Hut製作可以畀客人上網訂pizza嘅網站,令我哋了解到餐廳系統嘅運作。之後我哋有為板長壽司製作畀客人訂外賣壽司嘅網站,當時板長嘅老闆Ricky(鄭威濤)問我可唔可以幫分店加設排隊機,其後再加入用平板電腦點餐的系統。咁啱政府喺12年開始實施最低工資,人工提高令餐飲業嘅營運成本增加,加上餐飲業亦好難請人,我覺得餐飲自動化係一個商機,因為可以節省到人手及提高營運效率。所以慢慢將Web-On嘅重心,轉移去提供餐飲自動化嘅服務。」 提高服務質素 餐飲自動化的最終目的是提高服務質素,令客人享受到優質的用餐體驗。Ben說:「我哋會同餐廳老闆講採用餐飲自動化系統,可以慳到最少一個人手,有啲餐廳可以慳到4至5個。其實採用餐飲自動化系統都係想令服務質素提升,好似用tablet點餐,系統直接連接去廚房,加快咗個落單嘅流程。」 Web-On在上個年度有8位數字的營業額,但踏入2020年,武漢肺炎疫情嚴重,但Ben表示公司首個季度的業績未見影響,「我哋可能因餐廳結業少咗生意,但係網站製作方面,生意額反而有上升,好似幫食肆製作訂餐嘅網站,或其他公司嘅網站等。」 改良帶位機械人 Ben不停為公司注入新元素,如研發了一個新軟件,可透過電腦操作咖啡機,現已為微軟位於數碼港的辦公室安裝這部咖啡機。此外,3月時港鐵表示引入20部消毒機械人為車廂消毒,雖未有提供每部消毒機械人的購買價,但港鐵表示投入新科技總共用上2千多萬元。Ben表示:「我哋研發嘅帶位機械人,底部安裝咗激光雷達,可以scan餐廳嘅空間及枱凳嘅位置,機械記低晒呢啲資料後,就可以帶客人入座。最近我哋加以改良,安裝咗新配件,變成一部消毒機械人,可為食肆、辦公室等唔同嘅空間地方,噴消毒藥水進行消毒。每部售價只係3萬幾蚊。早排Viu TV嘅節目《今日疫情》,都有介紹過我哋嘅消毒機械人。」 Web-On www.web-on.com Ben不時去講talk,介紹餐飲自動化的好處。 Web-On本身只從事網站製作的業務,Ben看到餐飲自動化的商機,便大力發展。 自助等位派籌系統(俗稱排隊機)是Web-On的主要業務之一。 電子顯示屏與自助付款機可連接POS系統,更改資料會更加方便。 Ben改良帶位機械人,加上配件便可噴消毒藥水進行消毒。

幼兒導師最啱增值 從Messy Play觀察小朋友行為

2020-05-13T10:53:14+08:005 月 12th, 2020|自我增值|

現今十分重視幼兒教育,各式各樣的playgroup亦應運而生,當中messy play在近年興起並流行起來,原來正確的messy play,是不介入小朋友的玩樂當中,從旁觀察小朋友的行為。想了解更多有關messy play的運用方法,可報讀坊間舉辦的課程,十分適合幼兒導師及家長,為自己增值。 由香港青年協會持續進修中心舉辦的幼兒Messy Play導師培訓課程,由馬惠屏導師任教,她具有多年教授有關幼兒教育及課程的經驗。馬導師表示近年很流行messy play的playgroup,「顧名思義,messy play係畀小朋友去玩得好混亂及污糟,如果家長接受唔到,就唔應該畀小朋友參加。正確嘅messy play係畀小朋友去自由玩樂。」 馬導師於上年到紐西蘭進修幼兒教育時,認識到messy play的正確玩法,她表示在messy play進行中,家長或照顧者都不應介入小朋友的玩樂模式。「即使顏料揩到塊面,搞到啲嘢好亂成身污糟晒,都唔好理小朋友。除非有危險,好似小朋友將物件或物料放入口中,驚會骾親,就要阻止。如果小朋友撩家長玩,例如係扮餵你食嘢,家長只係扮食就得,唔需要回應,或者問問題,咁會打斷咗小朋友下一步嘅思路。」 解難是messy play的其中一個重點,馬導師說:「例如我會畀米小朋友玩,預備唔同嘅量杯,包括有20及50毫升等,又會預備叉及匙羮畀佢哋去潷米。小朋友會發現大容量嘅量杯裝到多啲米,而叉係潷唔到米,要小朋友自己親身及重複體驗,比父母話畀佢哋聽更加入腦。當遇到喺玩樂時小朋友之間出現爭拗,都唔好介入,畀小朋友自己去解決問題。」 觀察圖式行為 在進行messy play的過程中,會看到小朋友的圖式行為,可分為9種,包括封閉、改變、軌跡、連接、旋轉、分開、空間關係、運輸及排列。馬導師指幼兒導師及家長要認清楚自己是觀察者的角色,是十分重要,他們可以用手機或相機錄影小朋友的玩樂過程,找出他們的圖式行為,再給他們相應的玩具或玩意,引發學習興趣。 馬導師說:「Messy play導師或者照顧者要設計及設置引發圖式行為嘅教具,令圖式行為喺活動中呈現,滿足有圖式行為嘅小朋友,或增加圖式行為嘅發生,發現小朋友鍾意某幾種圖式行為。例如喺messy play嘅活動中,畀泥沙小朋友去玩,小朋友鍾意用模具嚟改變泥沙嘅形狀,會知道佢有改變嘅圖式行為;如果小朋友鍾意將泥沙放入模具或其他器皿,就知道佢有運輸嘅圖式行為;或者,小朋友鍾意喺沙上寫字,係滿足緊軌跡嘅圖式行為。」 材料生活化 馬導師表示應該用圖式行為去設計一個messy play的活動,及設計一個free play的場地。「好多學員都唔知點去set場,及應該喺場地擺啲乜。其實材料可以就地取材及生活化,好似最近我舉行嘅聖誕messy play活動,我將珍珠奶茶嘅飲管剪開,加上發泡膠粒扮雪,再放咗煲及煎pan等,畀小朋友去玩。」 學員主要是幼稚園老師及社工,其次為家長,馬導師表示擁有舉辦messy play活動的知識及經驗,對入幼兒教育行業會有優勢,「招聘機構知道你識開messy play嘅playgroup,係會為工作增值,入職機會會大好多。」 舉辦機構:香港青年協會持續進修中心 課程名稱:幼兒Messy Play導師培訓課程 對象:幼兒教育工作者及家長 [...]

老字號藥行與星級髮型屋合作 創香港品牌推出護髮湯包

2020-03-27T14:15:51+08:003 月 27th, 2020|創業故事|

近年潮牌都愛crossover,為品牌及產品帶來新鮮感。其實百年老店都一樣可以玩聯乘,就如過百年歷史的協德榮參茸藥行,最近與星級髮型屋Hair Corner,合作推出護髮寶湯包,有防脫髮及烏髮功效,照顧客人需要,切合近年流行健康飲食的大前提。 「協德榮係百年老字號,Hair Corner都有三十幾年歷史,喺髮型界嚟講都算係老字號,我覺得大家可以合作創造一個香港品牌出嚟,護髮寶嘅宗旨係想幫人保養好頭髮。」Hair Corner的老闆Jofee說。 護髮寶分養髮系列的核桃製何首烏湯及烏髮系列的黑豆枸杞湯,共兩款湯包,售價為$118兩包。核桃製何首烏湯的材料包括杜仲、紅棗、薑、核桃仁及何首烏;黑豆枸杞湯的材料則有黑芝麻、黑豆及枸杞。Jofee說:「養髮系列可以令毛囊更加鞏固,減少頭髮折斷;而烏髮系列可以改善白髮問題,減慢出白髮嘅速度。中國人煲湯好鍾意加豬肉,但肉會令啲湯好油膩,最後決定唔加肉,湯包會啱素食人士飲用。」 客人常問養髮問題 近年流行健康飲食,如無機食品、素食十分受歡迎,連黑色飲食也有不少人關心。 身為髮型屋老闆的Jofee說:「近年有好多客人都有甩頭髮及多白頭髮嘅問題,會成日問我點去保養,佢哋又問我食多啲黑色嘅食物係咪會有效,好似用何首烏、合桃、黑芝麻及黑豆等嚟煲湯,飲咗會有烏髮嘅作用。咁啱髮型師Sue都遇到同樣嘅問題,我哋傾開係咪可以推出一啲保健食品嚟養髮,幫到客人?」 Jofee醒起多年來幫襯的客人潘先生,是百年老字號協德榮參茸藥行的老闆,他應該懂得有關養髮的藥方。潘先生說:「我識咗Jofee好多年,傾開呢方面嘅問題,其實藥行有很多關於護髮嘅藥方,我會知道邊啲藥方會比較好,可用嚟推出湯水系列。」 製作過程跟足規格 有見及此,潘先生、Jofee及Sue決定合資7位數,今年3月開始籌備,至10月護髮寶正式推出,製作過程十分順利。潘先生說:「我哋設有廠房,之前有試過幫客人製作湯包,有相關嘅經驗。成個製作過程跟足政府規格,要經過高溫消毒,不含防腐劑及人造色素,湯包可存放兩年。」 Sue表示從中醫嘅角度看,補腎對護髮有幫助,所以愈早調理愈好,希望能透過現今流行的速食文化去幫助客人。「我哋採用鋁膜包裝嘅湯包,客人可將湯包摺合放入咖啡杯內,加入熱水坐3分鐘,用手撕開就飲得,好方便。如果喺屋企可以用碗嚟坐熱,貪快可以用微波爐叮10秒鐘,但我唔建議,用微波爐冇咁健康。」 不同地方陸續上架 首階段試市場反應,兩款湯包合共推出2千包,Jofee表示反應不俗,推出首月已售出超過一半。「依家護髮寶湯包喺協德榮及Hair Corner各分店有售,另外仲傾緊去唔同地方上架,好似Soda Mall、HKTV Mall及點點綠等。」 護髮寶 地址:尖沙咀廣東道116至120號海威商業中心8樓 查詢:2869 4333(Abbie/May) 潘先生(中)、Jofee(右)及Sue表示推出湯包是從幫人的角度出發,「近年多咗人關頭髮護理嘅問題,愈早調理愈好,血氣足就冇咁易脫髮。」 護髮寶分養髮系列的核桃製何首烏湯(右)及烏髮系列的黑豆枸杞湯,採用鋁膜包裝,售$118兩包。 核桃製何首烏湯(右)的材料包括杜仲、紅棗、薑、核桃仁及何首烏;黑豆枸杞湯的材料則有黑芝麻、黑豆及枸杞。 潘先生(右)找Jofee剪髮多年,現今成為生意上的拍檔。 Sue建議湯在中午飲,血氣好了,令成個人更精神。「放晒黑色食材喺枱面,我都唔識點煲,幸好潘生一口答應可以造髮寶湯出嚟。」 [...]

屋宇裝備工程學 出路廣 男女都啱讀

2020-03-18T14:49:55+08:003 月 18th, 2020|自我增值|

城市急速發展,有不少新樓宇落成,亦有不少大廈開始老化需要維修保養,造就屋宇裝備相關行業需要大量人才。Natalie是香港專業教育學院(IVE)屋宇裝備工程學高級文憑的畢業生,她報讀這科也是因為出路夠廣,她認為這科目也適合女生報讀,她也愈讀愈有興趣,故選擇繼續升學,以做工程師為目標。 今年21歲的洪得琳(Natalie)是香港專業教育學院(IVE)屋宇裝備工程學高級文憑的畢業生,在中學畢業時,Natalie表示曾對自己的前路感到迷惘,「聽到親戚朋友講過讀屋宇裝備工程呢科出路好廣,加上自己對physic有興趣,覺得會有能力修讀呢科。」 Natalie表示作為女生修讀這門學科,都會有優勢。「課程內容會有practicial training,好以學裝水喉、駁電線、扭銅管及裝分體式冷氣機等,即使將來唔使自己落手落腳做,都要學相關嘅知識。雖然呢方面女仔體力會輸蝕啲,但喺某啲方面,女仔會細心啲,好似畫layout plan會仔細啲,寫report會工整啲。」 課程內容實用為主 香港專業教育學院(IVE)摩理臣山院校工程系高級講師歐陽耀南指,屋宇裝備工程學高級文憑課程獲香港特區政府機電工程署認可,符合該署註冊電業工程人員「B」牌的學術水平要求,「只要得到相關嘅工作經驗,就可以正式攞牌。」 課程共分5個學期,內容以實用為主,歐陽sir說:「第一個學期會教technical嘅學科,好似關於屋宇裝備工程嘅數學及科學,會係職業向嘅科目,同學要畀啲時間去適應。之後嘅課程內容好多都係project based為主,需要同學由零開始去做設計,將風火水電嘅理論應用出嚟。導師會從旁指導,會提供參考圖,同學有唔明可以請教導師。」 職場實習夠實用 歐陽sir表示課程最大特色是最後一個學期的職場實習,「Final year project係同學有為時3個月嘅職場實習,喺呢段期間,佢哋會完成一個相關嘅工作,作為一個final year report。目的係令學員得到實際嘅工作經驗,兼做到無縫就業,搵到第一份工。當中有一半嘅同學會獲提供實習嘅機構繼續聘用,亦有畢業嘅同學會選擇升學。」 Natalie的職場實習是到了一間顧問公司工作,「學校有問我哋意向,會去提供實習嘅公司面試。我去咗一間顧問公司嘅電team工作,包括負責文書,好似計數、處理數據、做投標圖等,亦會跟上司落地盤及去開會。我嘅final year report係設計一幢先進科技嘅工廠大廈,喺過程中,有請教師兄,及將實習學到嘅數據應用番出嚟。」 到英國交流開眼界 在修讀課程期間,Natalie曾到英國紐卡素交流,「去參觀位於紐卡素嘅莊園,發現喺洋裝嘅年代,豪宅內已經有lift,而浴室已裝有花灑,當時嚟講已經好先進。城堡古宅已經設有風火水電裝置,令我眼界大開。」 此外,Natalie參加了香港工程師學會,她成為屋宇裝備工程分部大專學生聯絡組的委員會成員,「我做咗兩年財政,曾為大學或大專修讀屋宇裝備相關課程嘅學生舉辦生涯規劃講座、參觀商場、比賽及與現職工程師嘅交流活動等。成為委員會成員有好多得着,吸收好多搞活動嘅經驗,及擴闊咗自己嘅人脈關係。」 畢業生出路廣 歐陽sir表示同學畢業後出路很廣,「可以去顧問公司做有關設計嘅工作;亦可以去判頭公司工作,落地盤或到相關現場工作。另外,設施管理公司都需要人才,因為有好多大廈需要進行修維保養嘅工程,甚至改建重建,都需要人手去做設計。畢業生出嚟工作,起薪點約為$14,000至$15,000。」 在畢業後,Natalie選擇繼續升學,她現在本地某大學修讀yr. 3,「呢科我愈讀愈有興趣,尤其喺冷氣方面。我希望先完成學士學位課程,再累積工作經驗,最終目標係希望晉升至工程師。」 課程名稱:屋宇裝備工程學高級文憑 舉辦機構:IVE(摩理臣山、沙田、屯門) 修讀年期:2年全日制 入學要求:香港中學文憑考試5科成績達第二級或以上,包括英國語文、中國語文及數學;或VTC基礎文憑(級別三)/基礎課程文憑及完成其基礎數學(三)單元;或VTC中專教育文憑/職專文憑及完成其數學3G / 3E單元;或毅進文憑及完成其延伸數學單元;或同等學歷。 學費:每年$31,570 課程內容:學習屋宇裝備設計的知識,包括風火水電的設備裝置,最後學期有職場實習等。 [...]

80後女生搞廣告公司 宗旨是為客戶解決問題

2020-02-07T14:53:44+08:002 月 7th, 2020|創業故事, 各行各業|

香港人夠創意,令廣告行業百花齊放。兩位同為80後的女生Carman及Chucky,也看好這一行的潛力,故一起創業搞廣告公司。她們在以往的工作中累積各方面的人脈,認識不少演員、導演、攝影師及化妝師等,令工作安排得更順利。她們表示在工作上不會視其他人為競爭對手,只會是合作伙伴,希望為客戶及同行解決問題,願景是令公司愈走愈遠,全香港人都認識她們。 Carman及Chucky相識於8年前,大家都在某電訊公司的廣告部工作,之後她們各自出來創業,Carman經營wifi蛋生意,Chucky開製作公司。Carman說:「16年尾,咁啱大家遇到,出嚟食過幾次飯,喺傾偈時講起大家喺以往嘅工作中,識落唔少演員及模特兒,我哋覺得市場對生面口嘅演員需求好大,覺得可以開廣告公司,以呢個做我哋嘅賣點,加上Chucky係開製作公司,會有唔少呢方面嘅工作經驗。」 17年頭,Chucky及Carman成立Everyone Agency,「將公司叫做Everyone,係因為我哋覺得每個人都可以係演員,有發揮自己嘅舞台,可以演出電影裏面嘅唔同角色。我哋搵演員唔會局限於靚仔靚女,都會搵talent,可能客戶會有唔同嘅需要,好似拍樓盤廣告想,要搵有鄰家feel嘅演員嚟演一家大細。」現時Everyone擁有過千位演員、模特兒的資料庫,可安排他們出演各類型的廣告及活動。 Everyone Agency的宗旨是為客戶解決問題,Chucky表示連開製作公司在內,入行多年都未有接過任何投訴,令她感到很自豪。「我哋覺得自己係一個百寶袋,要幫客戶及行家精準地解決問題。我們唔會視其他人做競爭對手,客戶、模特兒公司、導演及製作公司等,大家只會係合作伙伴。有時一齊合作嘅製作團隊超過百人,每個project 都會有唔同嘅需要,加上每位導演、攝影師及化妝師都有唔同style,我們要精準地去配對,確保每個細節能夠run得更有效率,做到最大嘅成本效益。」 公司開業至今,拍過不少廣告,當中包括鑽飾、食品、運動用品及樓盤等,每年營業額達7位數字。Carman表示銀碼不是問題,最緊要令客戶滿意。「每個project嘅收費由幾千到過百萬不等,即使只叫我哋幫手搵演員都冇問題。」 在工作上,Carman及Chucky遇過不少難忘事,Chucky說:「試過搵一位明星拍嘢,本身都好地地,有位工作人員即場提佢就番個位,搞到佢唔開心,跟住走咗入化妝間唔拍。如果因為咁搞到要ot,就會增加製作成本。我要入去氹番佢,好在佢最後都肯拍番。」 做廣告這行,捱更抵夜少不免,有時忙起上來,通頂一個星期對Carman及Chucky來說也是小事。「我們覺得沒有事情是解決不到,要拍嘢假期都照樣開工,好似有次遇着做冬,我哋去咗航拍一個樓盤廣告。我哋又試過用3日拍好一條TVC兼出埋街;有次去台灣,掛10號風球都照樣出去拍嘢。」 拍某些廣告,不時會出動數十至過百演員,Carman表示見識過國際級的工作團隊,令她們眼界大開。「之前幫一個國際品牌喺香港搵40個瑜伽導師出鏡,呢次合作需要簽保密協議。喺拍攝嗰日,我哋去到拍攝場地,工作人員要求用貼紙貼住手機鏡頭,以防洩露廣告內容,去唔同嘅區域又要戴唔同嘅手帶,去識別工作人員。」 Carman認為拍攝廣告,除了記性要好,還要有即場要有執生能力。「有次去澳門,幫旅遊局拍攝宣傳片,有個演員竟然冇嚟到,我們惟有即場搵人代替,最後搵咗拍攝場地嘅餐廳廚師幫手出鏡,好彩澳門旅遊局嘅負責人冇反對。」 說到未來目標,她們希望令全香港人都認識Everyone,Chucky說:「我哋依然睇看好香港嘅市場,因香港人有創意及彈性,遇到任何困難都會克服到。」 Everyone www.everyone.agency 有次賭場開幕,Carman(中左)及Chucky(中右)帶領model出席活動。 拍某些廣告未必要見樣,可能只需讓model的靚手靚腳出鏡。Carman說:「我哋有時都會親自出馬。我哋試過做耳仔model,戴耳環拍廣告,我哋仲要即場剪走耳仔旁邊嘅的水。」 圖為Carman(中)及Chucky(右)與一位年長的演員,為鑽飾品牌Mabelle拍廣告,飾演一家人。 Carman(左)及Chucky表示最緊要是互相信任,「我哋兩個都係80後,背景差唔多,志趣相投,喺工作上好有默契。有時做決定大家都唔需要商量,會信任對方。」

開小朋友專用salon 剪髮要有夢幻體驗

2020-01-03T16:51:16+08:001 月 3rd, 2020|創業故事, 各行各業|

現今父母肯使錢在子女身上,令到與小朋友有關的事情,衣食住行也變成了一門商機。髮型師Sue開設了專為小朋友而設的髮型屋,全店裝修猶如兒童樂園,令小朋友愛上剪頭髮,並希望培養他們剪頭髮的習慣及興趣。 只要走近位於K11 MUSEA的So Sweet,你已看到店外的排到密麻麻的冬甩裝飾,店內的雪糕及糖果造型的座位,加上粉色的主調,十分夢幻。老闆兼髮型師Sue表示:「店鋪已成為打咭位,大人小朋友都鍾意喺度影相,有啲小朋友仲主動拉媽咪入嚟剪頭髮。」 Sue表示家長都好放心帶小朋友來剪頭髮,「啲小朋友喺度剪緊頭髮嘅時候,好多家長都會好放心坐喺店外面等。好多小朋友唔鍾意洗頭,家長都想剪短佢哋嘅頭髮。其實好多小朋友都好貪靚,如果佢哋個髮型剪得好睇,被人讚會記住;反之,如果頭髮突然被剪得太短,佢哋又會好唔開心,所以我同髮型師都會喺剪髮前,問下小朋友嘅意見。」 與小朋友溝通,Sue有不少心得,「小朋友可能見到把梳會驚,我哋會畀把梳佢掂下,原來係唔痛架喎。喺剪髮時,有啲小朋友見頭髮跌落嚟會伸手去接,咁會影響到我哋剪髮,所以會畀玩具或木頭佢哋拎住。要小朋友開心,最緊要溝通,好似有個女仔本身係留長髮,突然想剪短係有機會受朋友影響,或者鍾意嘅明星係短髮。如果佢哋想留長頭學跳舞,我哋就唔會剪太短,幫佢哋修下個型。」 剪髮要舒服環境 本在Hair Corner擔任星級髮型師的Sue,很喜歡小朋友,她發現有些小朋友會驚剪頭髮,「佢哋可能嚟到陌生環境,甚至見到髮型師高大啲都會驚。有次我遇到一個小朋友大喊大叫,要拉佢入VIP房先冇事,發現原來小朋友身處舒服嘅環境情緒會穩定啲,所以我之後同老闆商量,我哋決定合資開一間專為兒童而設嘅salon,以So Sweet作為主題,畀一個合適嘅環境小朋友剪髮。」 So Sweet的宗旨是童心童型,從小裁培剪頭髮的習慣及興趣。而裝修風格走樂園路線,全因Sue希望讓小朋友留下美好回憶。「以前自己細個去剪頭髮,覺得係一件好幸福嘅事,呢度嘅氣氛似玩具反斗城,我都想小朋友嚟剪頭髮都會有一個開心回憶。」 長方形鋪一字排開 由選址到訂造座位與用具,So Sweet總共用了4年時間來籌備開業,Sue說:「之前有睇過愉景新城及Yoho Mall等商場,都覺得唔合適。我哋最後揀咗喺K11 Musea開業,因為哋想要一個長方形嘅鋪位,夠長夠薄夠淺,座位可以一字排開,途人只要經過都會知道我哋係髮型屋。加上商場附近會有滑梯、Legoland,隔離鋪係playgroup,會吸引到一班親子客。」 Sue指訂造店內的座位也花了兩年時間,「用咗3個月設計、倒模又要用咗3個月,我哋希望個座要夠穩支持到個雪糕造型;張凳要造到完美高度就到髮型師剪頭髮,呢度都改動過十幾次;鏡位仲可以播放卡通片。另外,我哋有一個糖果造型嘅座位,可以畀小朋友剪完髮夾扭蛋,個造型可以話係全球獨家。」 捲Elsa頭做獎勵 So Sweet在8月尾開業,共投資7位數字開業,現每月要投入6位數字去營運,她有信心可半年至9個月回本。Sue說:「啱啱開業,家長經過好願意過嚟拎咭片同查詢,到9月已有超過90%新客。星期六日最多人,平日就多3歲以下嘅小朋友嚟剪髮,因為唔使返學。有家長會喺小朋友去學校面試前,帶佢哋嚟剪髮;可能小朋友表現好,又會帶佢哋嚟捲Elsa頭做獎勵。」 在推廣及發展方面,Sue已有不少計劃,「嚟緊會開workshop,教家長點樣幫小朋友剪髮、吹頭,正確使用捲髮器捲頭髮。又會搞法國週講法文播法國音樂。喺11月尾,我哋會同model公司合作,喺model總決賽幫小朋友設計造型。另外,我哋正同跳舞學校傾合作,當小朋友出去表演時,幫佢哋扮靚。我哋都有計劃開分店,想開喺太古城、將軍澳等地區,吸納多啲家庭客。」 店鋪流滿兒童樂園的氣氛。 胡諾言的仔仔也是由Sue剪頭髮。 店內的雪糕造型座位很受小朋友歡迎,鏡的位置可播放卡通片。 另一張糖果機械人造型座位,可讓小朋友夾扭蛋。 剪髮前,Sue會與小朋友溝通,問問他們想剪甚麼髮型。 都有不少家長帶小朋友來電髮,Sue說:「小朋友用嘅電髮藥水,我哋係重新調配成gel狀,唔會掂到小朋友嘅頭皮。」 [...]

入行前做足準備 做醫務所助理冇難度

2020-01-02T12:51:02+08:001 月 2nd, 2020|自我增值|

香港醫護界對人才不斷有需求,當中醫務所助理並不需要高學歷,具初中程度已可應徵,十分受年輕人歡迎。為了令應徵者對醫務所助理的工作職責更加了解,香港青年協會持續進修中心便開辦了醫務所助理證書課程,讓有意入行者學到專業的知識與技巧,做好事前準備。 香港青年協會持續進修中心開辦的醫務所助理證書課程,由有多年教學經驗的魯慶榮博士任教。魯博士表示:「學員會學到醫務所嘅日常運作,包括常規嘅工作程序及文件處理,好似幫病人登記資料,除咗登記個人資料外,仲要問佢有冇藥物敏感等。」 學習工作程序 課程要學員學習不同的醫務所工作知識,醫務所助理的職責是從旁協助醫生工作,要懂得所有程序,包括學習基礎配藥、傷口消毒、量血壓及抽血等。魯博士說:「要學跟醫生嘅處方執藥:此外,會有假手示範抽血嘅正確方法,學員都有機會親身用到假手嚟練習。」 魯博士指在醫務所工作是提供醫療服務,除了要學一般的工作知識外,還要學待人接物的禮儀。「好似助理喺量血壓或抽血時,唔只做啱所有動作或程序,仲可以同病人傾下偈,例如問下佢哋食咗飯未,咁可以令病人平伏到情緒,又可以留下好嘅印象。」 學習英文用字 在課堂上,學員要吸收不少工作知識,魯博士表示學員一般都覺得學習英文最困難,「好多學員都習慣用中文,但好多醫療用語都會採用英文,學員要讀熟呢啲英文用字,你就唔會搞錯醫生寫肺炎定係上呼吸道感染。」 魯博士表示考核會由平時課堂練習開始,「學員喺練習量血壓、抽血及洗傷口等嘅時候,已開始為佢哋評分,最後要通過考試。」如果評核合格,學員便正式畢業,可入行成為醫務所助理,起薪點約$11,000至$12,000。魯博士說:「青協都有與唔同嘅醫務所聯絡,如果有合適嘅職位空缺,都會轉介工作畀畢業學員。」   香港青年協會持續進修中心 課程名稱:醫務所助理證書 入學要求:年滿18歲人士,具初中或以上程度 上課地點:銅鑼灣公理堂大樓21至22樓 學費:$5,800 查詢:2130 4000 網址:https://clc.hkfyg.org.hk 魯慶榮博士(左)是課程導師,有多年教學經驗,他表示學員要學習不同的醫務所的工作程序。 圖中魯博士正教授學員血型和血糖的實際測試方法。 學員還要學習傷口的清洗方法及護理程序。

幼師創自家品牌 賣新派水果乳酪飲品

2019-12-05T15:11:37+08:0012 月 5th, 2019|創業故事|

現今年輕人最愛喝茶,飲品店開到成行成市。Ivy見有商機,想挑戰自己做老闆,放棄幼稚園教師的工作,開設飲品店輕時光,她用天然健康作賣點,專賣水果乳酪飲品。雖然創業過程遇到挫折,但她仍積極面對,不斷推出新口味及吸跨區寫字樓客,令生意打穩陣腳。 18年9月,Ivy在天后開設了專賣新派水果乳酪飲品的「輕時光」飲品店,提供優格果昔及水果優格蓋茶等飲品。Ivy本為幼稚園教師,但她不理家人的反對,辭去工作選擇創業。「雖然教書係我嘅志願,但我想趁年輕嘗試搵新個方向,可以有其他嘅挑戰,所以想做老闆,發展自家嘅品牌。其實家人知我想創業都有反對,擔心我太過冒險。我有幼師嘅資格,如果創業唔成功,都可以返去教書。」 令Ivy放棄教了6年教職,全因她喜愛手搖飲品,「之前我去澳洲工作假期時,我好鍾意當地流行嘅新鮮水果飲品。到17年嘅聖誕節,我去咗泰國旅行,喺當地試咗一杯士多啤梨乳酪,我覺得好好飲,味道好難忘,令我想開一間屬於自己嘅飲品店。」 Ivy決定完成該學期才正式創業,但在這大半年間,她不停去研發產品,「要研究點樣去沖調飲品,每個週未我都去深圳幫襯喜茶,參考佢哋嘅飲品款式及味道;我又飛去台灣,試勻當地嘅飲品店。」 以健康作賣點  棄用糖漿 Ivy希望以健康作賣點,故想到以水果配乳酪,「我冇做飲食業嘅經驗,發現入貨好難,原來香港嘅水果係入口為主,價格都幾貴,為咗保持新鮮,最後決定每日喺果欄直接入貨。我又上網搵其他材料嘅供應商資料,最終都解決到入貨嘅問題。」 當時每天Ivy都不停沖調飲品,試了過百杯,創出了主打的優格果昔及水果優格蓋茶。「我想再健康啲,唔想有添加劑,所以唔用糖漿嚟沖調飲品。我上YouTube見到製作桂花糕嘅短片,我得到啟發,我教書通常會飲冰糖水嚟潤肺降火,我試下將兩者結合,發現桂花冰糖水好清,同水果好夾,飲品入口有桂花嘅清香。另外,我將乳酪嘅味道,調得清淡啲,令到乳酪唔會遮蓋水果嘅原味。」 揀天后鋪位啱budget 到18年7月,學期結束,Ivy正式辭去工作,並為店鋪選址,準備開業。「我細個嗰陣住鰂魚通,好鍾意區內嗰份人情味,所以想揀喺港島區開業。我仲想揀一個單邉鋪位,旁邉有後巷,可以擺放植物,可以畀客人好舒服咁坐低飲嘢傾偈。銅鑼灣區內嘅租金太貴,最後發現只有西環及天后嘅鋪位啱預算,最後揀天后,因為呢度有單邊鋪,租鋪前有去電器道觀察過,發現人流都唔少。」 18年9月,輕時光正式開業, Ivy開業前預算,每天賣100杯飲品便可收支平衡,但現實中理想與現實差距很大,「開業初期每日賣得30杯,同預期差好遠,頭兩個月要蝕錢。之前明明見到會有人流行入橫街,但後來發現多數係住喺附近嘅街坊,佢哋趕住返屋企,好少會入嚟買飲品。」Ivy並沒有灰心,她想盡方法去改善業績,如在facebook落廣告,但成效不大。「我有去派傳單及搞免費試飲,又去附近嘅工廈攝優惠券入信箱。」 傳媒採訪生意好轉 直至上年12月,有傳媒來採訪,令生意反彈,Ivy說:「篇報導出街後,個迴響好大,多咗好多跨區客嚟幫襯,令到呢個月開始有錢賺,仲賺咗8萬。」高峰過後,盈利漸見回落,現時每月平均約賺兩三萬。為了吸回頭客,Ivy務求先做好口碑,「我參考咗starbuck及麥當勞嘅做法,推出期間限定,好似冬天推出熱飲,及抹茶系列;我仲會每個半月推出新口味,好似8月推出西瓜優格蓋茶,9月推出優格鮮果杯,依家就有榴槤優格果昔等。有客人問我賣唔賣魚蛋燒賣等小食,我驚會偏離品牌形象,暫時唔會考慮。」 為了增加競爭力,Ivy繼續研發新產品,如今年6月推出了樽裝陳皮冰糖燉檸檬及陳皮川貝冰糖燉檸檬,她秉承品牌健康形象的作風,全採用低糖配方,味道不太甜,有下火潤喉的功效。「反應好好,有唔少回頭客,間唔中會賣到斷貨。」另一方面,Ivy表示會主力吸納寫字樓客,甚至會跨區送貨,西環、上環及中環的寫字樓客會透過WhatsApp落order買飲品,「我會叫GOGOVAN或LALAMOVE送貨,我會用紙盒包裝好放上貨van,最遠試過送去火炭。」 與TNG合作開cafe 最近Ivy與TNG合作,在他們公司內開設café,只供員工使用,她會派員工駐場提供飲品。「呢個係一個好嘗試,我都有諗過開分店,但暫時唔會考慮特許經營,驚保持唔到品質。雖然創業過程唔係好順暢,但我想將輕時光發展成一個成功嘅香港品牌,我會繼續去達成呢個目標。」 開業成本 租金:$180,000(3按1上+經紀佣金) 裝修:$110,000 器材:$50,000 總投資:$340,000 每月收支 營業額:$145,000 租金:$40,000 人工:$38,000(2名全職) 材料:$35,000 雜費:$6,000 盈利:$26,000 TAKE YOUR TIME 輕時光 [...]

Load More Posts