About admin

該作者尚未填入任何詳細資訊
So far admin has created 33 blog entries.

受疫情影響 IVE學生創智能監察Watching U系統幫助長者

2020-10-14T17:28:30+08:0010 月 14th, 2020|其他, 自我增值|

新冠肺炎在香港爆發至今已有大半年時間,在這段期間,正常社交受到嚴重影響。現於香港專業教育學院(IVE)修讀電腦及電子工程的張海鈴和家人因未能探望年邁的祖母,故啟發她開發創智能監察Watching U系統,可以監察長者的生活及健康情況,並提供適當的幫助。 智能監察Watching U系統是由4位於IVE修讀電腦及電子工程高級文憑課程的yr.1及yr.2的學生所開發,採用了物聯網、大數據及傳感器應用等技術,可遙距監察長者的健康情況,整個系統透過智能手表、智能眼鏡及手機應用程式一同使用。 智能監察Watching U系統共有4項主要功能,包括監測定位、監測心跳、跌倒提示及配藥。開發系統的學生之一何俊瑜說:「智能手表具備定位及監測心跳率嘅功能,當長者戴上智能手表後,手機應用程式可以顯示長者嘅位置、心跳率等健康資訊。若長者嘅心跳率有異常或離家超出預設嘅距離,應用程式會即時通知家人。」 看到現場實況 另一位負責開發系統的學生張海鈴表示智能手表亦具備動作偵測功能,若長者不慎跌倒,系統會透過應用程式發出警告短訊通知子女,程式會顯示地圖提供長者即時位置,及建議供參考的最短前往路徑,助子女盡快抵達意外現場。「若事發時,長者身旁有傭人或看護,佢哋可以配戴智能眼鏡,子女可以透過手機應用程式睇到現場情況,提供合適嘅協助。」 由於新冠病毒肺炎的疫情持續,令不少需長期服藥的長者去覆診亦受影響。何俊瑜說:「系統可以儲存長者所服用嘅藥物資料,傭人可替長者到藥房配藥,只需利用智能手表向配藥員展示二維條碼,就會顯示到患者姓名、藥物名稱等資料,方便之餘,亦可減低配錯藥嘅機會。系統同時設有提醒定時服藥嘅功能,子女亦可親自錄低提醒長者食藥訊嘅息,增加親切感。」 自身需要得到啟發 張海鈴是IVE電腦及電子工程高級文憑課程的一年級學生,智能監察Watching U系統的開發是源於她的生活體驗。「我嫲嫲患有肺病,係獨居長者,平日主要由傭人照顧,家人不時會去探望嫲嫲,但受疫情影響,我哋較難經常上門探佢。咁啱我讀電腦及電子工程,覺得可以開發一個系統去協助家人喺保持社交距離嘅同時,亦可了解到嫲嫲嘅生活及健康狀況,而唔識講廣東話嘅傭人都可以幫嫲嫲去配藥,遇到意外時,都可即時知道有關情況提供協助。」 張海鈴指報讀IVE的課程,全因實用性高,「我報讀電腦及電子工程高級文憑課程,係因為讀中學時自己嘅數學成績比較好,我亦睇好5G嘅市場發展;而IVE嘅課程實用,好多嘢都要自己落手落腳去做,適合將來嘅工作發展。課程內容好豐富,學到AR、VR等技術,我最鍾意寫mobile app,可以創造版面。最初上堂都會有啲吃力,因為喺中學時我未讀過相關內容,幸好老師會安排學前班畀我哋去適應,又會安排師兄跟進我哋嘅進度。」 由師兄帶住工作 IVE黃克競院校工程系講師余紫達表示智能監察Watching U系統正正是由師兄姐帶領學弟妹一起去開發。「IVE嘅課程以職業為本,好多嘢都要同學親身參與,由於4位負責開發嘅同學,個別嘅程度及經驗都唔同,除咗幫佢哋解決硬件及軟件上嘅問題外,我亦會指派工作畀佢哋,而yr.2嘅同學經驗豐富啲,會帶住yr,1嘅同學去工作。」 余sir表示智能監察Watching U系統是與業界合作的開發項目,獲IVE工程學科畢業生創立的科技公司「MAD Gaze」支持,他們為師弟妹對智能眼鏡及智能手表的研發提供技術諮詢及意見。 物聯網傳送數據 何俊瑜是IVE電腦及電子工程高級文憑課程的二年級學生,他認為開發智能監察Watching U系統比課堂學到的更深入和困難。「系統係由物聯網,傳送數據到後台,再將資訊傳去唔同嘅裝置。系統牽涉到智能手表、智能眼鏡及手機應用程式,最初做唔到3個裝置互傳訊息,互相溝通得到,我哋要請教老師及師兄,原來首先要做到一個傳一個,再去完善個系統。」 何俊瑜表示開發系統時都有不少難忘事,「好似老師教每做完一個新版本,都要save低舊嗰個,如果遇到新加嘅function唔啱用,可以用番舊版本再做過。我試過唔記得save低舊版本,重新做過要花多啲時間。」 現時智能監察Watching U系統的原型大致完成,余sir指系統會被安排到護老院去進行測試,之後會再進一步優化,例如加入體溫監測、取藥提示及監察伸展動作等功能,「我哋會同MAD Gaze商量系統嘅發展方向,希望日後會推出市場,照顧到長者嘅需要。」 繼續進修升讀大學 張海鈴與何俊瑜在學時都有很好的開發系統經驗,他們對將來都有了打算。何俊瑜說:「我今年畢業,會繼續進修升讀大學,大學畢業後會從事與電腦工程有關嘅行業,希望可以開發創新嘅手機程式,對社會有貢獻。」而張海鈴表示畢業後都會晉升本地大學,進一步提升自己的知識水平,「將來我想加入創科公司,提供到新科技畀大眾去使用。」 余sir表示電腦及電子工程高級文憑課程的畢業生,有約40%會繼續升讀大學,其餘會出來社會工作。「畢業生通常會做技術員、助理工程師。依家有好多新樓盤都提供智能家居服務,都有我哋嘅同學去參與。畢業生嘅起薪點約$14,000至$16,000不等。」 電腦及電子工程高級文憑課程 舉辦機構:香港專業教育學院(IVE) 入學要求:香港中學文憑考試5科成績達第二級或以上,包括英國語文及中國語文;或VTC基礎文憑(級別三)/基礎課程文憑;或VTC中專教育文憑/職專文憑;或毅進文憑;或同等學歷。 [...]

良心炸魚薯條店回饋社會 抗疫堅持到底

2020-09-09T12:47:46+08:009 月 9th, 2020|創業故事|

香港人創業愛選擇開餐廳,從英國讀書回來的Vicky也不例外,她先在社福界工作,她認為經營社會企業應以可持續發展為宗旨,之後她先後開設2間炸魚薯條店,以回饋社會為目標。店內聘用智障、自閉症人士或少數族裔人士工作;同時採用環保餐具及包裝,超過80%餐具包裝都可作生物分解。雖近來受新冠肺炎影響,生意跌了4成,但Vicky仍樂觀面對,望能堅守到最後。   新冠肺炎疫情持續,香港各行各業均大受影響,當中飲食業可謂首當其衝。Vicky開設的CHIP IN,現有西貢及灣仔兩間分店,主做外賣炸魚薯條生意,她表示受疫情影響,生意額下跌4成,「條街少咗人行,好在我哋主力做外賣生意,附近街坊都會嚟幫襯,總算捱到大半年。」 面對疫情的打擊,Vicky認為經營食肆很難有應對的方法,「我哋冇要員工放無薪假、減少工作時間等,因為佢哋都要開飯。雖然有申請政府資助補貼,但幫到嘅好有限,呢段時間做老闆惟有堅持,我有同業主商量可唔可以減租,及同銀行傾借貸。」 要可持續持發展 Vicky在英國修讀心理學,06年回港後到社福界工作,她主要擔任社會企業管理的角色。「我發現香港做NGO及社福機構好依靠funding,如果申請唔到,咪冇得繼續落去?社會企業應該要可持續發展先至啱,我覺得自己可以經營一門咁樣嘅生意。」剛巧當時Vicky有創業的念頭,她發現香港少有專門食炸魚薯條的食肆,「呢樣嘢係英國好流行,我覺得可以開鋪頭做留港外國人嘅生意。」 Vicky認為做外賣炸魚薯條較有成本效益,「租金相對較低 ,做外賣店的尺數不用太大,200呎就夠。需要人手又相對較少,一間店鋪一般只需2位員工已可以運作。餐單會簡單啲,食材亦相對簡單,食材流動性高,坐貨時間短,資金流動得快。」 西貢開業試反應 當時Vicky做過調查,發現香港最多外國人居住的地區是中西區,有23%,其次為西貢的9%。「喺12年,我決定喺西貢開業試反應,因為中西區範圍太大,西貢外國人口會集中啲,租金亦相對平啲。我揀咗西貢碼頭附近嘅敬民街約200呎鋪位,租金連裝修等,開業花咗約30萬。」 開設CHIP IN,Vicky秉承着社會企業的宗旨,希望可以回饋社會,店內的6至7成的支出是用來付社會責任,並以可持續發展來經營。「我哋係推廣有質素嘅快餐,所有食物即叫即造,減少使用副食品,不含味精。加上製作炸魚薯條唔複雜,重複性高,我會聘請智障或自閉症人士嚟做服務台幫客人落單。而店內有超過80%餐具包裝都係可以作生物分解,支持環保。」 透過社企請人 Vicky表示透過NGO及勞工處展能就業科聘請智障或自閉症人士,「可能佢哋幫手落單會有啲慢,最初要喺側邊幫下佢,都會好快上手。環保餐具方面,其實成本同普通餐具差不多,只要你肯,實搵到貨源。」 西貢店反應不俗,1年內回本,便想到開分店,Vicky說:「15年,喺九龍城開分店,間鋪有800呎,月租$65,000,可以做埋堂食,諗住客源係區內嘅中產客,區內仲有唔少服務式住宅,都有唔少外籍人士。但做落發覺生意發展潛力唔大,冇想像中咁好,做咗半年就結業,好彩可以平手離場。」 灣仔再開分店 直至18年,Vicky再到灣仔皇后大道中開分店,店內請了少數族裔人士來當服務生。最初生意都不錯,每月有近18萬的生意額,但直至上年中社會運動開始至現在的新冠肺炎疫情第三波爆發,令店鋪生意下跌4成,經營日漸困難。 Vicky說:「其實依家政局混亂都唔睇好前景,覺得政府好忽略中小企嘅力量,支助唔多,好似灣仔店會請兩個全職員工,如果結業代表住有兩個家庭受到影響。業主好好都肯減租,由$55,000慢慢減到$40,000,但如果經營環境繼續差落去,真係做唔住,依家作為老闆,只好堅持到最後一刻。」 CHIP IN www.chipin.com.hk Vicky表示會善用所有食材,達至近0%廚餘。「好似用淨嘅魚可以造魚柳包,而洋蔥嘅蕊可以做他他醬。」 做外賣店不需太多人手,CHIP IN只需兩個人便可以運作。圖為Vicky與廚師研究餐單有否改進空間。 店內採用的都是環保餐具。 這隻偵探貓是CHIP IN的吉祥物,店內有大小的擺設。 灣仔店內牆上印上了CHIP [...]

唔做銀行要做演講教練 80後女生教說話技巧 目標創造一個行業

2020-08-20T15:43:34+08:008 月 20th, 2020|創業故事, 各行各業, 自我增值|

當你打銀行工,會被認為是有前途兼安穩的工作。曾是銀行經理的Yuki(黃銓玉),因熱愛說話演講,希望當一位演講教練。她毅然辭去工作,創立公司主攻司儀工作及教說話技巧班。憑着一股熱血,她將公司帶上軌道,雖然受新冠肺炎疫情打擊,但她透過zoom視像開班,令生意回穩,她誓要走過這個難關,向着自己的夢想進發。 新冠肺炎疫情持續大半年,Yuki自言公司生意也大受影響,「喺疫情影響下,今年2、3月開始已經冇公司搞event,冇司儀工作。」慶幸的是她也有舉辦說話技巧班,令公司生意維持得到,「自6月開始,生意回穩,依家係100%教班。」 Yuki所創立的司博禮,以司儀及教班為主,開業5年來,主持超過千場活動及舉辦超過2百個說話技巧班,以商業客戶為主,當中包括貿發局、銀行等。「我哋試過一星期接100項工作,星期一至六由朝到晚,全靠一班同事幫手。」 Yuki在科大修讀市場學,11年畢業後在銀行擔任經理一職,一次到海外培訓令她得到啟發,「發現外國教人講嘢可以係一門職業,我都想做一位演講導師。」Yuki鍾情演講及說話技巧,由小到大,她參加過大大小小有關演講的比賽,贏得四、五十個獎杯。但當朋友家人知道她的夢想後,都大潑冷水,家人說:「揀老師都唔揀你,你都唔夠老。」仲威脅要丟掉她的所有獎杯。 銀行工作成轉捩點 令Yuki真正走上成為演講導師的轉捩點是在工作上的領會,「當時做銀行經理自己只係廿零歲,有次開OT,同事同我講佢個女叫工人姐姐做媽咪,因為返工時間長少見個女,搞到咁。而喺2013年嘅生日時,我照返工,好記得嗰日氣溫得9度,我喺公司做緊嘢時打咗一個噴嚏,喺眼跌咗嚿膠出嚟,隻眼跟住開始矇,我同上司講要請假,但上司唔批,我照走去睇醫生,原來係分泌物走錯位,好在隻眼冇事。呢兩件事令我覺得咁辛苦工作唔知為乜,我想做自己想做嘅事,努力向演講教練方向發展。」 之後Yuki上過不少有關說話技巧的課程,看有關的事,不斷進修。到2015年,她開設司博禮,「我有上網搵過有冇演講教練嘅職業,原來香港冇人請,冇就自己開。理想總是美滿,最初以為開公司就有生意,但現實當然係相反,都捱咗一段時間。我第一單生意都係媽媽求人畀一個婚禮司儀我做;喺冇生意嘅情況下,惟有上網cold call成百間PR公司,結果只得一間回覆,最後畀我做咗一個海外婚禮嘅司儀。」 加入商會學做生意 Yuki並沒有放棄,在不斷努力下,找到學校讓她開演講技巧班,「雖然當時係初創公司,資歷同經驗係唔夠,但我讀書時贏過唔少比賽,加上我係國際演講會嘅area director,有啲學校信任我,畀我教班。」Yuki認為加入BNI商會,都學到怎樣做生意,「應該做B TO B,唔係做B TO C,即係要做批發,同公司機構簽約要簽1年,教班要簽2年。」 貿發局、星展銀行及香港大學等都有找司博禮合作,在這些機構的名氣幫助下,令客人對公司有信心,客源也漸漸增多。Yuki指做司儀的應變執生能力及注意細節都非常重要,「我試過主持一個政府嘅event,有位嚟參加嘅局長原來喺昨日升咗職,但份稿係前日寫,我冇為意。當我讀咗局長個舊職位出嚟時,先醒起局長升咗職,惟有即時補鑊,話局長原來啱啱升咗職。所以做司儀唔係照稿讀咁簡單,要注意好多細節。」 最主要教講故事 公司發展至2017年,有7成生意是司儀,其餘為演講教學,到2019已經變為五五之比。證明Yuki的初心沒有錯,市場對說話技巧有需求,她表示演講技巧不外乎講故事、應用在重要場合及有特殊需要。「講故事係幫助銷售產品嘅技巧,以sell保險產品為例,應該講一啲case,份保單係點樣幫到客戶,唔係齋講乜嘢可以賠乜嘢唔可以。例如個客買咗份保單,原來可以保障到佢6個月嘅生活開支,可以照顧到小朋友。」 「重要場合即公司鼓勵大會發言、見工面試或與投資者會面等。特殊情況可能係結婚時,新人需要講一段嘢。我哋試個有客人要面試香港小姐搵我哋教佢說話技巧;又試過教上市公司嘅法律顧問點樣同同事講嘢。」 學生年齡冇限制 司博禮所開設的說話技巧班,學生的年齡並沒有限制,教班由1對1 到 1對12-15不等。Yuki說:「我主要教大學以上,公司都有開中小學嘅班,主要由同事負責,會教小朋友講故事、朗誦、drama及聲音運用等。其實同說話技巧有關都會開,好似教拍Tik Tok嘅技巧,即教講故事嘅結構。」 教班亦有不少難忘事,Yuki說:「試過教60歲以上嘅長者班,最初都怕老人家反應慢,原來佢哋好有活力,反應好快,仲成日講笑,問我係咪中大畢業?原來係中央肥大學院咁解。落堂後,會同佢哋傾偈,分享好多人生閱歷,都學到好多嘢。」 zoom教班生意回穩 Yuki指擔任司儀工作及教班,在高峰期每月收入可達15萬,平時平均每月也可逹5、6萬,但年初疫情爆發,令生意一落千丈。幸好在2月頭,Yuki拍了一條片教人怎樣使用zoom,放在facebook有超過3萬個瀏覽人數,亦帶來不俗的反應。「二月歸零,變回創業初時,點都要交租。喺呢段時間會積極問客戶有乜嘢幫到手,當時都冇咁多人認識zoom,條片用有趣嘅角度介紹zoom嘅功能,好似點樣去分房。有個客畀我哋用zoom教班,之後慢慢多咗用zoom嚟開班。由6月開始生意穩定,雖然司儀方面冇生意,但教班方面嘅生意都有上升,依家有7成係透過zoom教班,有3成係實體班。」 現在家人由反對變支持,Yuki表示:「媽媽會煲湯畀我飲,屋企人仲會一齊幫我準備班課物資」。說到未來目標,Yuki的夢想十分宏大,「我好想改變呢個世界嘅溝通模式,小朋友教育好,可以改變到生活。好似我出身基層家庭,因為讀到書,可以做演講教練,我希望創造一個行業,提供到就業機會畀年經人。」 司博禮 http://www.spotknight.com Yuki自少已開始參加演講比賽,贏過四、五十個獎杯。圖為她參加南中國演講比賽得到亞軍。 [...]

參賽獲25萬奬學金 THEi時裝設計畢業生:「會到外國升學深造。」

2020-08-12T18:45:04+08:008 月 12th, 2020|各行各業, 自我增值|

自小能擁有志願及夢想,是一件多麼幸福的事,可以隨着自己喜歡的事去發展。Andrew 自中學開始便有一個時裝夢,畢業後,他到香港高等教育科技學院(THEi) 修讀時裝設計(榮譽)文學士課程。在導師的指導下,Andrew 樹立了自己的風格及找到路向,他更是THEi 首位得到由香港設計中心主辦的「DFA香港青年設計才俊獎」,並獲得25萬元,他決定利用這筆獎學金到英國深造,為將來發展自己的時裝品牌鋪路。 Andrew修讀香港高等教育科技學院(THEi) 的時裝設計(榮譽)文學士課程,並於2019年畢業。Andrew 表示自中學起便愛上時裝設計,「當時我有修讀visual art,亦有幫手製作校刊,我會同啲師兄匿喺校刊房一齊睇 fashion show,受到薰陶,開始對時裝設計產生興趣。」完成香港中學文憑考試(DSE)後,Andrew 便報讀 THEi 的時裝設計(榮譽)文學士課程,「因為表姐係讀THEi,佢話THEi 唔錯,課程好實用,可以為將來出嚟工作做好準備。」 THEi 環境及設計學院設計學系副教授Alice (朱惠靖)表示時裝設計(榮譽)文學士課程,旨在培育有創意及國際視野的人才,教授設計、產品開發及管理等知識,畢業的學生能夠適應社會,幫助時裝企業解決問題。「入學前,都需要面試,我哋都想發掘多啲有才華嘅學生。」 課程內容夠實用 Alice 指課程實用,着重設計之餘,亦希學生能與市場接軌,「學生唔識畫嘢唔緊要,yr.1會教授繪圖技巧,會有好多訓練。學生最緊要有passion及勤力,要不停去搵設計靈感,要有新思維。到yr.2時會有分流,學生可揀時裝設計或時裝管理,後者要讀市場學、零售學等。其實整個課程嘅內容都會與時並進,好似有關環保、可持續性嘅課題。課程亦會教授運用唔同嘅繪圖軟件,好似CATS system、AI及Photoshop等;為方便學生學習,學校亦增添3D打印機、laser cutting機器及紡織印刷機等器材。」 雖然在分流時,Andrew沒有揀選時裝管理,但他表示在不同的設計科目上都會用到一些管理的知識。「喺yr.3時,有一科係畀我哋去建立一個品牌,我哋要從商業角度出發,服裝設計要考慮乜嘢嘅市場,目標係乜嘢收入嘅人士,亦要考慮潮流所在,又要睇埋布嘅成本及點去推廣等。」 實習冇難度 課程包括126小時的實習,學生會到不同的公司工作。Andrew說:「我去咗一間針織公司實習,發現自己到真正工作時,同平時喺學校所學及做嘅功課好接近,工作好快上手,例如點樣去present樣辦畀個客睇。」 Andrew主攻男裝設計,他設計的男裝很具本土特色,如他其中一個設計系列《Nostalgia Express》,為一套6款的男裝,嘗試融入多種香港特有的藝術設計,包括男裝外套縫上傳統紅白藍帆布袋的圖案、混入中式馬賽克圖案、加入中式長衫的設計等。Andrew說:「其實喺讀yr.1時,自己冇乜自信,唔識點去present。學校好鼓勵學生去參加比賽,經過老師嘅幫忙及鼓勵,學識present嘅技巧,及去參加唔同嘅比賽,包括本地及國際嘅比賽。」 獲獎是對THEi的認同 Andrew的學業成績優異,他憑男裝系列《Hypocrisy》、為時裝品牌設計的學校作業《Take Me Home》及畢業作品《1996-》等,奪得DFA香港青年才俊獎的「創意智優青年設計才俊特別獎」,並獲得25萬港元奬學金。Alice表示Andrew 成為院校首位贏得DFA青年設計才俊獎的畢業生感到恩喜,「Andrew充分展現出時裝設計嘅天分及潛質,呢個亦係業界對THEi 畢業生嘅認同。」 [...]

學做物理治療師助理 入行自用都啱

2020-07-20T19:29:00+08:007 月 20th, 2020|職場消息, 自我增值|

都市人工作繁忙,令到不少人都患有痛症需要求診,對物理治療的需求大增,需要不少新血加入。坊間有不少機構舉辦有關課程,而 香港青年協會持續進修中心 舉辦的物理治療助理證書課程,適合對行業有興趣的人士報讀,除了解行業行情、學懂輔助物理治理師的技巧外,還能為自己增值,可照顧有需要的家人。 香港青年協會持續進修中心舉辦的物理治療助理證書課程由導師陳啟泰任教,陳sir具有多年教學經驗,他表示現今無論醫院或診所都需要物理治療服務,學識物理治療知識可做到幫人幫己。「課程適合打算投身物理治療行業嘅人士報讀,有8成學員都係想入行,嚟了解行業性質,有啲學員仲已經係其他醫護部門任職,想嚟了解多啲睇下有冇得轉行。其餘2成學員係為咗增值,可以自我照顧,或者家人有患病或殘障等,需要佢哋去照顧。」 陳sir指課程知識技術並重,理論與實務課的比重各佔一半。「學識物理治療嘅純技巧係唔足夠,喺論理課方面,學員要學解剖學、病理學及運動學等。解剖學、運動學等嘅專有名詞及醫學名詞對學員嚟講會好難,雖然考試會用中文,但實際工作就會用到英文,所以要記熟所有英文名詞及用字,有啲學員會覺得難溫難記,對佢哋嚟講係一個挑戰。」 內容深入淺出 此外,陳sir都會擔心有些學員屬基礎學歷,生理學知識不足。「學員嘅學歷由中三至大學畢業不等,我會遷就番唔同學歷背景嘅人士,內容會深入淺出,例如講解發炎,係細菌入侵身體,身體會有監控系統,好似白血球有分巡警及士兵,當巡警發現細菌就會呼召士兵嚟打仗。等學員易啲明白,有呢方面知識嘅學員,又可以溫故知新。」 在實務課方面,學員要學習使用物理治療的儀器及各種技巧。陳sir說:「我哋會透過workshop嘅形式去模擬整個診療過程,畀學會親身去體驗。學員會進行角色扮演,扮演助理去協助物理治療師去診斷,當中會用到超聲波、電療儀器、牽引儀器等。學員要學各種技巧,指導病人去做運動,如使用平衡板、練力帶、沙包啞拎等;又要學扶抱及助行技術,好似幫病人床過床、床過輪椅,教病人使用輪椅、學用四腳拐杖落樓梯等。」 畢業過3關 要成功畢業,學員要達到3個要求,包括出席率、筆試及實務試合格。陳sir說:「出席率要達75%,筆試係30分鐘嘅選擇題。而實務試方面,由於課程屬認可為資歷架構第二級,要求學員要識晒所有實務課嘅內容,我會將所有使用儀器及技巧嘅步驟做一個checklist,學員要喺導師前所有步驟要做啱一次。」 陳sir表示有學員畢業後會選擇繼續進修,有些學員則會入行。「除咗醫院診所外,老人院舍對助理嘅需求都好大,入行門檻相對較低,起薪點約有$12,000至$13,000。有學員都會去做到上門私家看護,月薪會有$15,000至$20,000不等。」 物理治療助理證書 舉辦機構:香港青年協會持續進修中心 入學要求:年滿21歲人士,具中三或以上程度。 上課地點:銅鑼灣公理堂大樓21至22樓 學費:$3,200 查詢:2130 4000 網址:https://clc.hkfyg.org.hk 圖為學員學習使用四腳拐杖,助理需要負責教病人如何使用輔助工具。 在實務課上,導師陳啟泰會教授使用各種物理治療需要用到的儀器。 實務課的內容,陳sir會做一個checklist,考試時,學員要在導師前正確示範一次,如可使用儀器及運用各種技巧的步驟。 陳sir會示範協助病人移動的技巧。

諗橋抗疫 做KOL直銷產品

2020-06-23T15:59:23+08:006 月 23rd, 2020|創業故事, 各行各業|

新冠肺炎爆發至今,有不少打工仔的生計受到影響,被迫放無薪計,甚至被炒。Sonic亦受到疫情打擊,正所謂窮則變,變則通,Sonic見在疫情下,出街購物人次大幅減少,便想到用KOL身分在facebook做直播推銷產品,吸引愛購物的香港人網購,結果銷情不俗,反應出乎意料,不足一個月,followers的人數已過萬。Sonic預計這盤生意在半年內可回本。 現時KOL直播賣每逢星期一及四在facebook開show,直播售賣產品,產品售價約是坊間的6折。Sonic是主持人之一,每次他都會與一位靚女KOL一同主持節目。「現時每場都有約8百人睇直播購物,我哋與其他直銷節目唔同嘅地方,除咗開show會較密外,限時購物時間會係由開show嘅9pm至第二日嘅12nn,唔會限死客人只能喺直播時段內購買。」 今年3月尾舉行第一場KOL直播賣,反應非常好,有超過1500人觀看。Sonic說:「第一場show一定要搞下gimmick,全場400件貨品,每件只需要$1,仲要包郵,貨品包括口罩等防疫用品及王朝滴雞精等。反應非常好,好快賣晒。」KOL直播賣的facebook專頁不足一個月便有過萬的followers,為了慶祝,Sonic更首創全港網上$10店,當日更有5百幾張訂貨單,保持專頁及網店的人氣。 辭工轉接wifi工程 今年35歲的Sonic,本身當媒體廣告推銷員,「我做過好多間媒體,好似《東Touch》、《蘋果日報》,但到佔中時,生意跌,收入減少,都有諗過轉行。」到15年,他認識了一班從事IT的朋友,成了轉行的契機,「Wifinnity係由佢哋成立,當時全港有成2千幾個免費wifi點。我覺得大家可以合作,市民免費用wifi前要睇廣告,會係一個商機。所以我辭咗份工,開公司接單再同佢哋分賬。頭一年生意唔錯,前景唔差。」 好景不常,Sonic最後被拍檔飛起。「當時我簽成咗同UA財務合作,收咗2百幾萬,同佢哋set up一個wifi工程,放廣告入wifi平台。但負責IT班拍檔收咗錢後就走咗佬,張約係我簽,結果要我揹起條數,我要賣表賣車,及直接同電訊商溝通,搞番掂佢。由於要還債,過咗6、7個月真係頂唔住,好彩最後有幾個商家朋友夾咗2百幾萬畀我,成功過渡。」 疫情下網購 在Sonic經營下,Wifinnity發展至今全港已有4千7百幾個免費wifi點,並接到不同的wifi工程,如政府資訊科技總監辦公室等。但自19年中起的社會運動及今年初的新冠肺炎疫情爆發,令生意一落千仗。「我本身唔鍾意網購,但見喺疫情期間,香港嘅網購生意反而不俗,香港人鍾意買嘢,冇得出街就多咗上網購物。」 Sonic希望在疫情下能夠生存,有了點子後,便積極找貨源及合作機會。「我以前做sales,識落唔少商家,可以畀我低價拎貨去賣。香港興KOL,我做埋一份,每次開show都搵個女仔KOL嚟一齊做直播,好似ToTo、黃榕等。而我賣出貨品先入貨,唔怕賣唔出,砸死晒啲貨。」 廣告客戶特約節目 KOL直播賣的反應好,開始有KOL自薦出show,Sonic表示:「嚟緊都會搵啲明星藝人上節目,好似最近邀請咗E-kids嘅Alan上嚟。」KOL直播賣的限時購物時段為開show的9pm至第二日的12nn,網店可吸引32,000多人次瀏覽,故得到不少廣告客戶垂青,開始有廣告客戶的特約節目,增加收入。Sonic說:「到依家呢刻,都有8、9場show有特約,直播時會有廣告客戶的特約banner。」 Sonic預計半年可收支平衡,雖然市面多了競爭者,但他自言不怕競爭,「先做好自己,嚟緊可能會開popup store,或者喺街做直銷,亦會做multi media,例如拍片賣廣告等。」 facebook@KOL直播賣 網址:kolliveshow.com 最近Sonic(右)邀請了E-kids的Alan一起做節目。 圖為Sonic(左)與E-kids的Alan一起主持節目,會介紹所賣的產品。 Sonic自言不怕上鏡,「我細個有被星探搵去拍廣告,唔怕面對鏡頭,加上自己做過sales,講嘢介紹產品,唔會有問題。 在facebook專頁會有預告,Sonic將會與那一位KOL一起主持節目。 最近多了廣告客戶的特約節目,直播時會見到廣告客戶的特約banner。

IVE成立「S-SHOP@TMIT」智慧商店 讓學生發揮創意

2020-06-06T16:06:09+08:006 月 6th, 2020|其他, 自我增值|

科技日新月異,香港慢慢發展成為智慧城市,為了趕及科技潮流,香港專業教育學院(IVE) 的屯門院校,於2020年初設立一所名為「S-SHOP@TMIT」的模擬智慧商店,呈現以科技營造的無人購物體驗。「S-SHOP@TMIT」智慧商店可供修讀軟件工程高級文憑,與人工智能及手機軟件開發高級文憑課程的學生學習之用,發揮他們的創意,將課堂學到的知識實踐出來,為將來社會工作做足準備。 「S-SHOP@TMIT」智慧商店(以下簡稱智慧商店)融合人工智能、金融科技、移動支付、數據分析及物聯網等科技的應用。香港專業教育學院(IVE)屯門院校資訊科技系講師鄧鼎革表示:「智慧商店喺今年初正式啟用,可以提供無人商店嘅購物體驗,即冇店員顧客都可以購物。智慧商店採用新技術,用人工智能數據進行分析。」 智慧商店內設有智慧銀行,團隊利用區塊鏈技術,設計了一款名為「Vitcoin」的虛擬加密貨幣,模擬讓顧客於店內消費及轉帳之用。鄧sir說:「店內會有顯示屏列出商店嘅交易紀錄、設施運作嘅狀態,同時可以睇到股票價格及保險計劃等資訊。顧客仲可以透過電話睇到廣告,提升宣傳效能,我哋利用AR技術,用手機scan貨品,就會popup貨品嘅資料,包括出產地、食物嘅材料等。系統亦會跟據顧客嘅購物紀錄及喜好,顯示啱佢哋嘅商品廣告。」 讓學生發揮創意 智慧商店內設有智慧售賣機和智慧儲物櫃,方便顧客透過手機應用程式選購及取得網購商品,更加方便。鄧sir說:「有咗呢個平台,可以畀學生發揮創意,開發自己嘅應用程式,喺出嚟工作前有實戰嘅經驗。」現時「S-SHOP@TMIT」計劃供IVE(屯門)軟件工程高級文憑,與人工智能及手機軟件開發高級文憑課程的學生學習之用,將課堂上學到的知識實踐出來。 李澤賢是IVE軟件工程高級文憑的二年級學生,因為喜歡IT及編程,故在中學畢業後,升讀IVE資訊科技的基礎課程文憑,及後再升讀IVE軟件工程高級文憑課程。「我自小已經自學編程及設計網站嘅技術,到中學時,我有選修資訊及通訊科技嘅科目,更自行開發家用嘅理財記賬系統。我睇好IT行業嘅前景及香港會成為智慧城市,所以選修呢科。」 應用區塊鏈技術 李澤賢有份參與智慧商店的部分開發項目,包括開發智慧銀行系統、智慧商店的應用程式及AR技術的應用等。「參與智慧商店可以應用到課堂學到嘅知識,喺開發嘅過程中,會學到項目管理、時間成本及用到企業級軟件,呢啲係之前比較少接觸。喺導師及拍檔嘅幫助下,學習將區塊鏈技術應用喺加密貨幣嘅交易紀錄儲存、資料加密及數據分析上,可以確保到資料嘅安全,令我對區塊鏈嘅技術加深了解。」 此外,李澤賢於修讀一年級時獲院校安排到日本東京交流,參與「亞洲電腦圖像和互動技術會議及展覽」(SIGGRAPH Asia 2018),認識擴增實境(AR)、虛擬實境(VR)及三維模型等多項先進技術。「畢業後,我想繼續進修,想學更多IT嘅知識。在工作方面,我比較偏向互聯網行業,希望去大企業工作,吸收更多項目管理嘅經驗。」 90小時實習 鄧sir表示課程有90小時的實習,讓學生到中小企實習工作。「通常畢業生升學及就業會各佔一半。軟件工程高級文憑課程嘅畢業生,可以做programmer、技術支緩人員及程式開發人員等。人工智能及手機軟件開發高級文憑課程嘅畢業生,可以擔任手機程式、人工智能及網頁開發等工作。」 軟件工程高級文憑 舉辦機構:香港專業教育學院(IVE) 入學要求:香港中學文憑考試5科成績達第二級或以上,包括英國語文及中國語文;或VTC基礎文憑(級別三)/基礎課程文憑;或VTC中專教育文憑/職專文憑;或毅進文憑;或同等學歷。 修讀年期:2年全日制 學費:$31,570 課程內容:為學生提供各類實用的電腦軟件開發技術,並着重軟件的設計及品質和項目管理,使畢業生能設計及開發智能電話、互聯網和企業應用軟件。 查詢:2897 6111 網址: http://www.vtc.edu.hk 人工智能及手機軟件開發高級文憑 舉辦機構:香港專業教育學院(IVE) 入學要求:香港中學文憑考試5科成績達第二級或以上,包括英國語文及中國語文;或VTC基礎文憑(級別三)/基礎課程文憑;或VTC中專教育文憑/職專文憑;或毅進文憑;或同等學歷。 修讀年期:2年全日制 學費:$31,570 課程內容:為有志成為智能手機、平版電腦及穿戴式裝置軟件開發專才提供專業培訓,融合人工智能及不同移動平台科技,配合行業多元化發展。 查詢:2897 6111 [...]

推動餐飲自動化 慳人手提升服務質素

2020-05-21T17:04:19+08:005 月 21st, 2020|創業故事, 各行各業|

去食肆用膳的過程中,有用過平板電腦點餐嗎?有用過自助點餐機嗎?這些都是餐飲自動化的實際例子。推行餐飲自動化,可以優化工序及節省人手,令食肆更有效率去提升服務,客人會有更好的用餐體驗。Web-On的創辦人Ben (李浩賢) 早着先機,近年大力發展餐飲自動化系統,當中包括電子顯示屏、平板電腦點餐、自助等位派籌系統 (俗稱排隊機)、自助點餐機及付款機等。最近由於武漢肺炎疫情嚴重,Ben將新研發的帶位機械人改良為消毒機械人,可以為辦公室及食肆等噴消毒藥水,進行消毒程序。 現時Ben與不少連鎖餐飲集團合作,當中包括太興、牛陣、牛角、OUTBACK、Pizza Hut及大家樂等,為他們提供POS系統、電子顯示屏、自助點餐平板電腦、自助等位派籌系統 (排隊機)、自助點餐機及付款機等服務。當中排隊機是公司主要業務之一,收費由2萬多元起。 Ben說:「我哋提供嘅餐飲自動化系統比坊間嘅唔同,好似我們嘅排隊機除咗有一般嘅功能外,仲可以接駁到領展嘅手機應用程式,客人可以透過手機app,就可以喺領展旗下商場嘅食肆拎籌等位。」此外,Ben所研發的POS系統可以直接連接前台的電子顯示屏及廚房的顯示系統,「當廚房通知前台有某啲食物要暫停供應,只要喺POS系統更改,廚房、電子顯示屏及點餐機都會同時更改,唔需要逐個系統去更新資料,方便及有效率好多。」   最低工資見商機 Ben是Web-On的創辦人,顧名思義,之前Web-On是為不同公司提供製作網站的服務,「我哋有幫過Pizza Hut製作可以畀客人上網訂pizza嘅網站,令我哋了解到餐廳系統嘅運作。之後我哋有為板長壽司製作畀客人訂外賣壽司嘅網站,當時板長嘅老闆Ricky(鄭威濤)問我可唔可以幫分店加設排隊機,其後再加入用平板電腦點餐的系統。咁啱政府喺12年開始實施最低工資,人工提高令餐飲業嘅營運成本增加,加上餐飲業亦好難請人,我覺得餐飲自動化係一個商機,因為可以節省到人手及提高營運效率。所以慢慢將Web-On嘅重心,轉移去提供餐飲自動化嘅服務。」 提高服務質素 餐飲自動化的最終目的是提高服務質素,令客人享受到優質的用餐體驗。Ben說:「我哋會同餐廳老闆講採用餐飲自動化系統,可以慳到最少一個人手,有啲餐廳可以慳到4至5個。其實採用餐飲自動化系統都係想令服務質素提升,好似用tablet點餐,系統直接連接去廚房,加快咗個落單嘅流程。」 Web-On在上個年度有8位數字的營業額,但踏入2020年,武漢肺炎疫情嚴重,但Ben表示公司首個季度的業績未見影響,「我哋可能因餐廳結業少咗生意,但係網站製作方面,生意額反而有上升,好似幫食肆製作訂餐嘅網站,或其他公司嘅網站等。」 改良帶位機械人 Ben不停為公司注入新元素,如研發了一個新軟件,可透過電腦操作咖啡機,現已為微軟位於數碼港的辦公室安裝這部咖啡機。此外,3月時港鐵表示引入20部消毒機械人為車廂消毒,雖未有提供每部消毒機械人的購買價,但港鐵表示投入新科技總共用上2千多萬元。Ben表示:「我哋研發嘅帶位機械人,底部安裝咗激光雷達,可以scan餐廳嘅空間及枱凳嘅位置,機械記低晒呢啲資料後,就可以帶客人入座。最近我哋加以改良,安裝咗新配件,變成一部消毒機械人,可為食肆、辦公室等唔同嘅空間地方,噴消毒藥水進行消毒。每部售價只係3萬幾蚊。早排Viu TV嘅節目《今日疫情》,都有介紹過我哋嘅消毒機械人。」 Web-On www.web-on.com Ben不時去講talk,介紹餐飲自動化的好處。 Web-On本身只從事網站製作的業務,Ben看到餐飲自動化的商機,便大力發展。 自助等位派籌系統(俗稱排隊機)是Web-On的主要業務之一。 電子顯示屏與自助付款機可連接POS系統,更改資料會更加方便。 Ben改良帶位機械人,加上配件便可噴消毒藥水進行消毒。

幼兒導師最啱增值 從Messy Play觀察小朋友行為

2020-05-13T10:53:14+08:005 月 12th, 2020|自我增值|

現今十分重視幼兒教育,各式各樣的playgroup亦應運而生,當中messy play在近年興起並流行起來,原來正確的messy play,是不介入小朋友的玩樂當中,從旁觀察小朋友的行為。想了解更多有關messy play的運用方法,可報讀坊間舉辦的課程,十分適合幼兒導師及家長,為自己增值。 由香港青年協會持續進修中心舉辦的幼兒Messy Play導師培訓課程,由馬惠屏導師任教,她具有多年教授有關幼兒教育及課程的經驗。馬導師表示近年很流行messy play的playgroup,「顧名思義,messy play係畀小朋友去玩得好混亂及污糟,如果家長接受唔到,就唔應該畀小朋友參加。正確嘅messy play係畀小朋友去自由玩樂。」 馬導師於上年到紐西蘭進修幼兒教育時,認識到messy play的正確玩法,她表示在messy play進行中,家長或照顧者都不應介入小朋友的玩樂模式。「即使顏料揩到塊面,搞到啲嘢好亂成身污糟晒,都唔好理小朋友。除非有危險,好似小朋友將物件或物料放入口中,驚會骾親,就要阻止。如果小朋友撩家長玩,例如係扮餵你食嘢,家長只係扮食就得,唔需要回應,或者問問題,咁會打斷咗小朋友下一步嘅思路。」 解難是messy play的其中一個重點,馬導師說:「例如我會畀米小朋友玩,預備唔同嘅量杯,包括有20及50毫升等,又會預備叉及匙羮畀佢哋去潷米。小朋友會發現大容量嘅量杯裝到多啲米,而叉係潷唔到米,要小朋友自己親身及重複體驗,比父母話畀佢哋聽更加入腦。當遇到喺玩樂時小朋友之間出現爭拗,都唔好介入,畀小朋友自己去解決問題。」 觀察圖式行為 在進行messy play的過程中,會看到小朋友的圖式行為,可分為9種,包括封閉、改變、軌跡、連接、旋轉、分開、空間關係、運輸及排列。馬導師指幼兒導師及家長要認清楚自己是觀察者的角色,是十分重要,他們可以用手機或相機錄影小朋友的玩樂過程,找出他們的圖式行為,再給他們相應的玩具或玩意,引發學習興趣。 馬導師說:「Messy play導師或者照顧者要設計及設置引發圖式行為嘅教具,令圖式行為喺活動中呈現,滿足有圖式行為嘅小朋友,或增加圖式行為嘅發生,發現小朋友鍾意某幾種圖式行為。例如喺messy play嘅活動中,畀泥沙小朋友去玩,小朋友鍾意用模具嚟改變泥沙嘅形狀,會知道佢有改變嘅圖式行為;如果小朋友鍾意將泥沙放入模具或其他器皿,就知道佢有運輸嘅圖式行為;或者,小朋友鍾意喺沙上寫字,係滿足緊軌跡嘅圖式行為。」 材料生活化 馬導師表示應該用圖式行為去設計一個messy play的活動,及設計一個free play的場地。「好多學員都唔知點去set場,及應該喺場地擺啲乜。其實材料可以就地取材及生活化,好似最近我舉行嘅聖誕messy play活動,我將珍珠奶茶嘅飲管剪開,加上發泡膠粒扮雪,再放咗煲及煎pan等,畀小朋友去玩。」 學員主要是幼稚園老師及社工,其次為家長,馬導師表示擁有舉辦messy play活動的知識及經驗,對入幼兒教育行業會有優勢,「招聘機構知道你識開messy play嘅playgroup,係會為工作增值,入職機會會大好多。」 舉辦機構:香港青年協會持續進修中心 課程名稱:幼兒Messy Play導師培訓課程 對象:幼兒教育工作者及家長 [...]

老字號藥行與星級髮型屋合作 創香港品牌推出護髮湯包

2020-03-27T14:15:51+08:003 月 27th, 2020|創業故事|

近年潮牌都愛crossover,為品牌及產品帶來新鮮感。其實百年老店都一樣可以玩聯乘,就如過百年歷史的協德榮參茸藥行,最近與星級髮型屋Hair Corner,合作推出護髮寶湯包,有防脫髮及烏髮功效,照顧客人需要,切合近年流行健康飲食的大前提。 「協德榮係百年老字號,Hair Corner都有三十幾年歷史,喺髮型界嚟講都算係老字號,我覺得大家可以合作創造一個香港品牌出嚟,護髮寶嘅宗旨係想幫人保養好頭髮。」Hair Corner的老闆Jofee說。 護髮寶分養髮系列的核桃製何首烏湯及烏髮系列的黑豆枸杞湯,共兩款湯包,售價為$118兩包。核桃製何首烏湯的材料包括杜仲、紅棗、薑、核桃仁及何首烏;黑豆枸杞湯的材料則有黑芝麻、黑豆及枸杞。Jofee說:「養髮系列可以令毛囊更加鞏固,減少頭髮折斷;而烏髮系列可以改善白髮問題,減慢出白髮嘅速度。中國人煲湯好鍾意加豬肉,但肉會令啲湯好油膩,最後決定唔加肉,湯包會啱素食人士飲用。」 客人常問養髮問題 近年流行健康飲食,如無機食品、素食十分受歡迎,連黑色飲食也有不少人關心。 身為髮型屋老闆的Jofee說:「近年有好多客人都有甩頭髮及多白頭髮嘅問題,會成日問我點去保養,佢哋又問我食多啲黑色嘅食物係咪會有效,好似用何首烏、合桃、黑芝麻及黑豆等嚟煲湯,飲咗會有烏髮嘅作用。咁啱髮型師Sue都遇到同樣嘅問題,我哋傾開係咪可以推出一啲保健食品嚟養髮,幫到客人?」 Jofee醒起多年來幫襯的客人潘先生,是百年老字號協德榮參茸藥行的老闆,他應該懂得有關養髮的藥方。潘先生說:「我識咗Jofee好多年,傾開呢方面嘅問題,其實藥行有很多關於護髮嘅藥方,我會知道邊啲藥方會比較好,可用嚟推出湯水系列。」 製作過程跟足規格 有見及此,潘先生、Jofee及Sue決定合資7位數,今年3月開始籌備,至10月護髮寶正式推出,製作過程十分順利。潘先生說:「我哋設有廠房,之前有試過幫客人製作湯包,有相關嘅經驗。成個製作過程跟足政府規格,要經過高溫消毒,不含防腐劑及人造色素,湯包可存放兩年。」 Sue表示從中醫嘅角度看,補腎對護髮有幫助,所以愈早調理愈好,希望能透過現今流行的速食文化去幫助客人。「我哋採用鋁膜包裝嘅湯包,客人可將湯包摺合放入咖啡杯內,加入熱水坐3分鐘,用手撕開就飲得,好方便。如果喺屋企可以用碗嚟坐熱,貪快可以用微波爐叮10秒鐘,但我唔建議,用微波爐冇咁健康。」 不同地方陸續上架 首階段試市場反應,兩款湯包合共推出2千包,Jofee表示反應不俗,推出首月已售出超過一半。「依家護髮寶湯包喺協德榮及Hair Corner各分店有售,另外仲傾緊去唔同地方上架,好似Soda Mall、HKTV Mall及點點綠等。」 護髮寶 地址:尖沙咀廣東道116至120號海威商業中心8樓 查詢:2869 4333(Abbie/May) 潘先生(中)、Jofee(右)及Sue表示推出湯包是從幫人的角度出發,「近年多咗人關頭髮護理嘅問題,愈早調理愈好,血氣足就冇咁易脫髮。」 護髮寶分養髮系列的核桃製何首烏湯(右)及烏髮系列的黑豆枸杞湯,採用鋁膜包裝,售$118兩包。 核桃製何首烏湯(右)的材料包括杜仲、紅棗、薑、核桃仁及何首烏;黑豆枸杞湯的材料則有黑芝麻、黑豆及枸杞。 潘先生(右)找Jofee剪髮多年,現今成為生意上的拍檔。 Sue建議湯在中午飲,血氣好了,令成個人更精神。「放晒黑色食材喺枱面,我都唔識點煲,幸好潘生一口答應可以造髮寶湯出嚟。」 [...]

Load More Posts