當你打銀行工,會被認為是有前途兼安穩的工作。曾是銀行經理的Yuki(黃銓玉),因熱愛說話演講,希望當一位演講教練。她毅然辭去工作,創立公司主攻司儀工作及教說話技巧班。憑着一股熱血,她將公司帶上軌道,雖然受新冠肺炎疫情打擊,但她透過zoom視像開班,令生意回穩,她誓要走過這個難關,向着自己的夢想進發。

新冠肺炎疫情持續大半年,Yuki自言公司生意也大受影響,「喺疫情影響下,今年2、3月開始已經冇公司搞event,冇司儀工作。」慶幸的是她也有舉辦說話技巧班,令公司生意維持得到,「自6月開始,生意回穩,依家係100%教班。」

Yuki所創立的司博禮,以司儀及教班為主,開業5年來,主持超過千場活動及舉辦超過2百個說話技巧班,以商業客戶為主,當中包括貿發局、銀行等。「我哋試過一星期接100項工作,星期一至六由朝到晚,全靠一班同事幫手。」

Yuki在科大修讀市場學,11年畢業後在銀行擔任經理一職,一次到海外培訓令她得到啟發,「發現外國教人講嘢可以係一門職業,我都想做一位演講導師。」Yuki鍾情演講及說話技巧,由小到大,她參加過大大小小有關演講的比賽,贏得四、五十個獎杯。但當朋友家人知道她的夢想後,都大潑冷水,家人說:「揀老師都唔揀你,你都唔夠老。」仲威脅要丟掉她的所有獎杯。

銀行工作成轉捩點

令Yuki真正走上成為演講導師的轉捩點是在工作上的領會,「當時做銀行經理自己只係廿零歲,有次開OT,同事同我講佢個女叫工人姐姐做媽咪,因為返工時間長少見個女,搞到咁。而喺2013年嘅生日時,我照返工,好記得嗰日氣溫得9度,我喺公司做緊嘢時打咗一個噴嚏,喺眼跌咗嚿膠出嚟,隻眼跟住開始矇,我同上司講要請假,但上司唔批,我照走去睇醫生,原來係分泌物走錯位,好在隻眼冇事。呢兩件事令我覺得咁辛苦工作唔知為乜,我想做自己想做嘅事,努力向演講教練方向發展。」

之後Yuki上過不少有關說話技巧的課程,看有關的事,不斷進修。到2015年,她開設司博禮,「我有上網搵過有冇演講教練嘅職業,原來香港冇人請,冇就自己開。理想總是美滿,最初以為開公司就有生意,但現實當然係相反,都捱咗一段時間。我第一單生意都係媽媽求人畀一個婚禮司儀我做;喺冇生意嘅情況下,惟有上網cold call成百間PR公司,結果只得一間回覆,最後畀我做咗一個海外婚禮嘅司儀。」

加入商會學做生意

Yuki並沒有放棄,在不斷努力下,找到學校讓她開演講技巧班,「雖然當時係初創公司,資歷同經驗係唔夠,但我讀書時贏過唔少比賽,加上我係國際演講會嘅area director,有啲學校信任我,畀我教班。」Yuki認為加入BNI商會,都學到怎樣做生意,「應該做B TO B,唔係做B TO C,即係要做批發,同公司機構簽約要簽1年,教班要簽2年。」

貿發局、星展銀行及香港大學等都有找司博禮合作,在這些機構的名氣幫助下,令客人對公司有信心,客源也漸漸增多。Yuki指做司儀的應變執生能力及注意細節都非常重要,「我試過主持一個政府嘅event,有位嚟參加嘅局長原來喺昨日升咗職,但份稿係前日寫,我冇為意。當我讀咗局長個舊職位出嚟時,先醒起局長升咗職,惟有即時補鑊,話局長原來啱啱升咗職。所以做司儀唔係照稿讀咁簡單,要注意好多細節。」

最主要教講故事

公司發展至2017年,有7成生意是司儀,其餘為演講教學,到2019已經變為五五之比。證明Yuki的初心沒有錯,市場對說話技巧有需求,她表示演講技巧不外乎講故事、應用在重要場合及有特殊需要。「講故事係幫助銷售產品嘅技巧,以sell保險產品為例,應該講一啲case,份保單係點樣幫到客戶,唔係齋講乜嘢可以賠乜嘢唔可以。例如個客買咗份保單,原來可以保障到佢6個月嘅生活開支,可以照顧到小朋友。」

「重要場合即公司鼓勵大會發言、見工面試或與投資者會面等。特殊情況可能係結婚時,新人需要講一段嘢。我哋試個有客人要面試香港小姐搵我哋教佢說話技巧;又試過教上市公司嘅法律顧問點樣同同事講嘢。」

學生年齡冇限制

司博禮所開設的說話技巧班,學生的年齡並沒有限制,教班由1對1 到 1對12-15不等。Yuki說:「我主要教大學以上,公司都有開中小學嘅班,主要由同事負責,會教小朋友講故事、朗誦、drama及聲音運用等。其實同說話技巧有關都會開,好似教拍Tik Tok嘅技巧,即教講故事嘅結構。」

教班亦有不少難忘事,Yuki說:「試過教60歲以上嘅長者班,最初都怕老人家反應慢,原來佢哋好有活力,反應好快,仲成日講笑,問我係咪中大畢業?原來係中央肥大學院咁解。落堂後,會同佢哋傾偈,分享好多人生閱歷,都學到好多嘢。」

zoom教班生意回穩

Yuki指擔任司儀工作及教班,在高峰期每月收入可達15萬,平時平均每月也可逹5、6萬,但年初疫情爆發,令生意一落千丈。幸好在2月頭,Yuki拍了一條片教人怎樣使用zoom,放在facebook有超過3萬個瀏覽人數,亦帶來不俗的反應。「二月歸零,變回創業初時,點都要交租。喺呢段時間會積極問客戶有乜嘢幫到手,當時都冇咁多人認識zoom,條片用有趣嘅角度介紹zoom嘅功能,好似點樣去分房。有個客畀我哋用zoom教班,之後慢慢多咗用zoom嚟開班。由6月開始生意穩定,雖然司儀方面冇生意,但教班方面嘅生意都有上升,依家有7成係透過zoom教班,有3成係實體班。」

現在家人由反對變支持,Yuki表示:「媽媽會煲湯畀我飲,屋企人仲會一齊幫我準備班課物資」。說到未來目標,Yuki的夢想十分宏大,「我好想改變呢個世界嘅溝通模式,小朋友教育好,可以改變到生活。好似我出身基層家庭,因為讀到書,可以做演講教練,我希望創造一個行業,提供到就業機會畀年經人。」

Yuki自少已開始參加演講比賽,贏過四、五十個獎杯。圖為她參加南中國演講比賽得到亞軍。

Yuki表示只要與說話技巧有關的班都可以開,如圖中她教楝篤笑班與學生合照。

Yuki曾在大學開過不少說話技巧班及分享會。圖為2017年她到科技大學主持説話技巧分享會。

現時貿發局是Yuki的主要客戶之一,圖為她在香港運動消閒博覽與麻利主持分享會。

Yuki認為當司儀要注意細節及要有執生能力。