沒有從天而降的英雄,只有挺身而出的凡人,漫畫中的英雄人物都只是虛構角色,但在現實中能經營一門助人的生意,也是一件美事。今年27歲的Alvin(張晧程)與拍擋創立HANDY REHAB,開發機械手去幫助中風病人進行復康治療;在疫情期間,他們所引入的機械人能幫助院舍的老人與親友溝通,並為一眾長者提供娛樂資訊服務。在這段非常時期,生意不跌反升,他們看好香港的復康市場前景,希望研發更多產品去幫助社會上有需要的人士。
HANDY REHAB的機械手十分輕巧,重量只有400克,記者試戴上手,感到重量只如一罐可樂。Alvin說:「醫用版會配有左手及右手,加一個平版電腦及機電感應器。機械手可使用被動或主動模式去幫助病人,病人喺中風後,隻手郁唔到,被動模式會幫病人去郁動隻手及手指,好似拎起隻杯、拿筷子及拎住個波;如果病人有一定嘅活動能力,手指能郁到某個幅度,機械手嘅主動模式可以畀病人自己去郁動,再協助去完成一個動作。治療師可以透過平板電腦睇番病人嘅數據,再去調節整個療程。」
與拍檔一起研發
今年27歲的Alvin於中文大學修讀商科,他曾到社福機構及NBA等公司實習,在社福機構實習時,認識到現時的拍檔,15年畢業後便與他一起發展機械手的業務。「因為我有個uncle喺三十幾歲時中咗風,有隻手郁唔到,呢十幾年嚟都要人照顧,亦只可以喺庇護工場工作。當時拍檔係研發緊機械手嘅原型,我覺得呢個理念好好,可以幫到中風嘅病人,佢哋嘅黃金復康期喺頭3至6個月,有好嘅設備,就可以解決到社會問題,所以決定同佢合作。」
機械手投資了7百萬,除了他們的投資外,資金主要是來自政府資助及天使投資者。經過3年的研發期,當中不斷改良,機械手於18年底正式推出市面。Alvin的加入,為機械手的設計進行優化,「喺外型設計入手,好似改良介面,會支援中文。機械手嘅物料改用塑膠,令重量減輕唔少。以前呢方面嘅復康設備會用濕電,使用時要駁好長嘅電線,我哋改良到可以更換電池,每嚿電池可用45分鐘,足夠一個療程使用。」
可幫助治療師
醫用版機械手每套售價十多萬,主要客戶來自公立醫院、老人院舍及日間復康中心等。Alvin說:「咁啱依家政府推廣樂齡科技,好多醫院或院舍都會接受有關嘅新產品。機械手係可以幫到中風癱咗嘅病人進行復康治療,幫到物理治療師及職業治療師去解決問題,好多治療師畀病人使用後,都立即引入。」
Alvin指要推廣機械手都要花不少心機,「最大困難係畀市民去認識,我哋會去擺展覽,但好多人見我係後生仔,未必有信心,所以事前要做好多準備工夫去介紹。」現時HANDY REHAB將會在2021年第一季推出家用版機械手,令價錢更大眾化讓市民去使用,Alvin表示:「家用版嘅售價約3至4萬,包一隻機械手及機電感應器,可以畀有需要嘅人士喺家中進行復康訓練。依家家用版喺海外市場已經有訂單。」
生意上升幾倍
新冠病情至今未有減緩的跡象,各行各業大受打擊,但Alvin公司的業務反而有增長,上升4、5倍。「上年年中,覺得喺以色列研發嘅Temi機械人有潛力,我哋引入嚟香港,當時已有安老院舍幫我哋購買。機械人可以進行巡房嘅工作,大大減輕人手嘅壓力。喺疫情爆發後,我哋為機械人新增唔少嘅功能,喺呢段時間,親友好難去院舍探訪老人家,佢哋可以透過機械人進行視像探訪,同長者傾計。」
此外,機械人也可以為長者提供娛樂,Alvin說:「我哋改良機械人識聽同識講廣東話,長者可以叫機械人讀新聞畀佢聽,亦可以播歌或者影片,又可以報時間天氣,令長者知道當日發生嘅事,防止認知障礙。」採訪當日,Alvin即席要求機械人講一個笑話,真的可以做到。
可做帶路機械人
Temi機械人每部售價約3萬,在疫情期間,銷情很好,Alvin表示全球計,香港加內地的銷量屬頭三位,「內地賣咗8百幾部,香港就賣咗2百幾部。機械人只要加裝設備就可以在室內進行消毒,又可以量體溫;而港鐵亦有引入機械人喺啟德站為乘客帶路。嚟緊同公立醫院傾合作,下年機械人有機會喺醫院內為市民帶路。」
未來發展方向都是以研發復康設備為主,代理設備為輔,Alvin說:「疫情加快咗香港人對有關科技嘅認識,我哋睇好香港嘅復康市場,公司會主力做長線嘅研發,短線會引入有潛力嘅產品。嚟緊目標可以籌集3百萬美元嘅資金,用嚟開發新產品及外國市場。」
HANDY REHAB

醫用版機械手會配有左手及右手,加一個平版電腦及機電感應器,可更換電池。


機械手可以為病人進行復康訓練,包括拿起水杯及筷子。

機械手採用塑膠物料,重量只有400克。

Alvin認為機械手可幫到中風病人,解決社會問題。

平時Alvin(左一)會透過展覽,介紹公司的產品讓客人認識。

Temi機械人可提供多項服務,如在院舍巡房、進行視像交談及提供娛樂資訊等。

機械人支援廣東話,可以報讀新聞。圖為機械人介面截圖。

機械人可提供各項資訊,如日期時間天氣等。圖為機械人介面截圖。

機械人可在室內進行消毒及變身帶路機械人。