以前學化妝可能只是一心入行當化妝師，但時移世易，現今年輕人學化妝可用來增值自己。星級化妝師Meegan表示學好化妝技巧，能一世受用，適用於不同的行業，「你做KOL出鏡都可以化個靚妝見人！」
星級化妝師Meegan入行多年，為不少明星藝人化妝，包括周汶錡、車婉婉、黎瑞恩、陳嘉寶、Angelababy及文詠珊等。Meegan表示現今學化妝，目的不只是為入行當化妝師，應視為自己增值的一門技巧，「學化妝對自己嘅人生及事業會好有幫助，好似畢業生識得化靚自己去影相，寄CV都會好睇啲；加上入職唔同嘅行業都會有用，例如平日返工或出席公司宴會，令老闆上司留下好印象。依家咁流行KOL，為自己化個靚妝，上鏡都會吸引到多啲觀眾嚟睇你。」
Meegan在澳門理工學院修讀商科，畢業後從事文職工作，但她心裏卻想當一位化妝師，「做文職都幾悶，話就話返朝9晚6，但成日要OT，有時一日要做成十幾個鐘，人工及自由度又唔高，當時覺得自己嘅人生唔應該係咁。」Meegan自小便有創業的念頭，她對化妝師的工作很有興趣，想創一番事業。「見周街都係大學生，想增加自己嘅競爭力，學一門自己鍾意嘅手藝，就決定辭職到香港及英國報讀化妝課程。」
由助手做起
以前做化妝師，要由低做起，Meegan也不例外，她自言「好肯跟人」，「我會跟唔同嘅化妝師做助手，主要負責執頭執尾，遞下化妝掃，做落當佢哋覺得我嘅工作態度及手藝好，遇到佢哋唔得閒接嘅job時，就會畀我去試。最初頭幾次可能冇錢收，我會當係一個學嘢嘅機會，凡事要睇遠啲。」亦因為這些機會，令Meegan的手藝得到賞識，接到的工作愈來愈多，包括為雜誌幫model化妝、接私人宴會或活動的化妝工作、為新娘及明星藝人化妝等。
由04年開始入行做化妝師，到10年，Meegan便開始設化妝學校，「之前有朋友叫我開學校，我都想將化妝呢門手藝傳承落去，學校就選址喺尖沙咀天文台道。開學校有自己嘅studio，可幫人化妝之餘，又可以開個人自學班。」
出書增教學信心
雖然開設學校，但Meegan認為自己還未夠經驗，未有信心教大型教學班，直至她推出《Meegan’s Magic Makeup Bible》一書，十分受歡迎。「呢本係將50個平凡人大變身嘅化妝工具書，會分析唔同個案嘅面形問題，作出唔同嘅化妝技巧，靈感源自台灣一個電視綜藝節目，將一個女仔一邊面保留素顏，另一邊面進行化妝。我發現當中有好多難題，好似眼形都可以分幾千種，喺製作完呢本書後，覺得自己做得到，可以教到大班，之後學校就搬到銅鑼灣一個較大嘅地方。」
不只化妝技術，連授課技巧都要與時並進，Meegan表示：「依家教學冇以前咁嚴謹，唔會每個化妝step跟到足，反而要啟發學生，由佢哋自由發揮。好似以前上堂會講明教乜嘢題目，依家我就會出一條題目，例如係關於舞台化妝，學生要自己上網搵資料消化咗先，等佢哋了解完再話畀我聽想學化乜嘢妝。」
用WhatsApp交功課
此外，溝通方式都會貼近年輕人，Meegan會透過WhatsApp引起學生的學習意欲，「我會透過WhatsApp畀啲參考圖片佢哋睇，佢哋亦會喺WhatsApp交功課，我會品評佢哋化嘅妝，其他同學又會睇到，大家互相學習。」Meegan認為實習亦十分重要，「畢業前，我會帶佢哋去唔同嘅地方實習，除咗婚宴化新娘妝工作外，仲會接演唱會及舞台劇等化妝工作。」
現Meegan有多年教學經驗，說到未來目標，她表示：「依家我計劃緊到廣東及澳門教班，畀多啲人認識我哋間學校。長遠嘅目標係希望帶學生到國際嘅層面，之前我都有去過美國紐約及法國巴黎嘅時裝show工作；亦去過西安教過班。我希望令自己嘅學生走向國際，令佢哋成為國際性嘅化妝師，化妝可以有自己嘅人生體驗，開到眼界。」
周汶錡是與Meegan合作的明星藝人之一。
《黎瑞恩感恩有你演唱會2018》宣傳海報的妝容由Meegan負責。
演唱會進行時，Meegan在後台為黎瑞恩補妝。
不少明星藝人為雜誌拍照都會找Meegan化妝，圖為羅敏莊和女兒陳禛。
田蕊妮是與Meegan合作的明星藝人之一。
朱智賢是與Meegan合作的明星藝人之一。
Meegan經常接受電視台邀請教化妝，圖為J2《今期流行》，她與張寶兒示範妝容。
《Meegan’s Magic Makeup Bible》推出後，銷量不俗。
《Meegan’s Magic Makeup Bible》書中講解不同的化妝難題，實用性高。
《出走紐約時裝周美妝遊記》是Meegan另一本著作。
陳嘉寶出嫁時，新娘妝是由Meegan親自操刀。
Meegan會帶學生去實習，例如到演唱會，令學生得到實戰機會。
