現今十分重視幼兒教育，各式各樣的playgroup亦應運而生，當中messy play在近年興起並流行起來，原來正確的messy play，是不介入小朋友的玩樂當中，從旁觀察小朋友的行為。想了解更多有關messy play的運用方法，可報讀坊間舉辦的課程，十分適合幼兒導師及家長，為自己增值。
由香港青年協會持續進修中心舉辦的幼兒Messy Play導師培訓課程，由馬惠屏導師任教，她具有多年教授有關幼兒教育及課程的經驗。馬導師表示近年很流行messy play的playgroup，「顧名思義，messy play係畀小朋友去玩得好混亂及污糟，如果家長接受唔到，就唔應該畀小朋友參加。正確嘅messy play係畀小朋友去自由玩樂。」
馬導師於上年到紐西蘭進修幼兒教育時，認識到messy play的正確玩法，她表示在messy play進行中，家長或照顧者都不應介入小朋友的玩樂模式。「即使顏料揩到塊面，搞到啲嘢好亂成身污糟晒，都唔好理小朋友。除非有危險，好似小朋友將物件或物料放入口中，驚會骾親，就要阻止。如果小朋友撩家長玩，例如係扮餵你食嘢，家長只係扮食就得，唔需要回應，或者問問題，咁會打斷咗小朋友下一步嘅思路。」
解難是messy play的其中一個重點，馬導師說：「例如我會畀米小朋友玩，預備唔同嘅量杯，包括有20及50毫升等，又會預備叉及匙羮畀佢哋去潷米。小朋友會發現大容量嘅量杯裝到多啲米，而叉係潷唔到米，要小朋友自己親身及重複體驗，比父母話畀佢哋聽更加入腦。當遇到喺玩樂時小朋友之間出現爭拗，都唔好介入，畀小朋友自己去解決問題。」
觀察圖式行為
在進行messy play的過程中，會看到小朋友的圖式行為，可分為9種，包括封閉、改變、軌跡、連接、旋轉、分開、空間關係、運輸及排列。馬導師指幼兒導師及家長要認清楚自己是觀察者的角色，是十分重要，他們可以用手機或相機錄影小朋友的玩樂過程，找出他們的圖式行為，再給他們相應的玩具或玩意，引發學習興趣。
馬導師說：「Messy play導師或者照顧者要設計及設置引發圖式行為嘅教具，令圖式行為喺活動中呈現，滿足有圖式行為嘅小朋友，或增加圖式行為嘅發生，發現小朋友鍾意某幾種圖式行為。例如喺messy play嘅活動中，畀泥沙小朋友去玩，小朋友鍾意用模具嚟改變泥沙嘅形狀，會知道佢有改變嘅圖式行為；如果小朋友鍾意將泥沙放入模具或其他器皿，就知道佢有運輸嘅圖式行為；或者，小朋友鍾意喺沙上寫字，係滿足緊軌跡嘅圖式行為。」
材料生活化
馬導師表示應該用圖式行為去設計一個messy play的活動，及設計一個free play的場地。「好多學員都唔知點去set場，及應該喺場地擺啲乜。其實材料可以就地取材及生活化，好似最近我舉行嘅聖誕messy play活動，我將珍珠奶茶嘅飲管剪開，加上發泡膠粒扮雪，再放咗煲及煎pan等，畀小朋友去玩。」
學員主要是幼稚園老師及社工，其次為家長，馬導師表示擁有舉辦messy play活動的知識及經驗，對入幼兒教育行業會有優勢，「招聘機構知道你識開messy play嘅playgroup，係會為工作增值，入職機會會大好多。」
舉辦機構：香港青年協會持續進修中心
課程名稱：幼兒Messy Play導師培訓課程
對象：幼兒教育工作者及家長
上課地點：銅鑼灣公理堂大樓21至22樓
學費：$1,900
查詢：2130 4000
馬導師(白衫)表示學員主要是幼稚園老師及社工，其次為家長。
幼兒Messy Play導師培訓課程由馬惠屏導師(右一)任教，圖為她教授學員如何運用水管設計教材。
顧名思義，messy play是讓小朋友自由地不受限制去玩樂，即使玩到全身好污糟都冇問題。
圖為給麵粉小朋友去玩，給他們不同容器去裝載，滿足運輸的圖式行為，並用自己的方法裝載，從中學習解決問題。
如果小朋友不用容器去裝載，愛將麵粉拋起，是滿足自己的軌跡圖式行為。
可運用日常的物品做教具，如將珍珠奶茶嘅飲管剪開做材料。
馬導師設計的messy play活動，可讓9個月至8歲的小朋友一起玩。
